ລາວຍັງສືບຕໍ່ປ້ອງກັນ ແລະ ສະກັດກັ້ນ ການລະບາດຂອງພະຍາດ ໂຄວິດ-19
ໃນວັນທີ 12 ມິຖຸນານີ້ ຄະນະສະເພາະກິດເພື່ອປ້ອງກັນຄວບຄຸມ ແລະ ແກ້ໄຂພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃຫມ່ (COVID-19) ໃຫ້ຮູ້ວ່າ: ມາຮອດປັດຈຸບັນກໍເປັນເວລາກວ່າສອງເດືອນແລ້ວທີ່ລາວບໍ່ມີກໍລະນີຜູ້ຕິດເຊື້ອໂຄວິດ-19 ລາຍໃຫມ່, ໃນຂະນະທີ່ຜູ້ຕິດເຊື້ອ 19 ກໍລະນີຜ່ານມານັ້ນກໍສາມາດປິ່ນປົວຫາຍດີປົກກະຕິແລ້ວ, ແຕ່ເຖິງຢ່າງໃດ ລາວກໍຍັງສືບຕໍ່ປ້ອງກັນ ແລະ ສະກັດກັ້ນດ້ວຍມາດຕະການຕ່າງໆທີ່ລັດຖະບານ ກໍຄືຄະນະສະເພາະກິດວາງອອກໃຫ້ເຂັ້ມງວດ ແລະ ເອົາໃຈໃສ່ຄັດກອງຜູ້ເດີນທາງຈາກປະເທດທີ່ມີການລະບາດເຂົ້າມາປະເທດໃຫ້ຮັດກຸມຄືໃນວັນທີ 11 ມິຖຸນານີ້ ໄດ້ເກັບຕົວຢ່າງມາກວດວິເຄາະທັງໝົດ 249 ຄົນ, ໃນນັ້ນ ມີແຮງງານລາວກັບມາແຕ່ໄທ 224 ຄົນ, ແຮງງານໄທ 15 ຄົນ, ແຮງງານຈີນ 5 ຄົນ ແລະ ກໍລະນີສົງໄສ 5 ຄົນ, ແຕ່ຜົນກວດທັງຫມົດບໍ່ພົບເຊື້ອ, ໝາຍຄວາມວ່າ ບໍ່ມີຜູ້ຕິດເຊື້ອໃໝ່ເປັນເວລາ 61 ມື້ແລ້ວ. ແຕ່ເຖິງຢ່າງໃດ ຄະນະສະເພາະກິດຍັງໄດ້ຕິດຕາມສະພາບການລະບາດຂອງບັນດາປະເທດໃກ້ຄຽງ ແລະ ໃນໂລກ ເຫັນວ່າມາຮອດເວລາ 6:00 ໂມງເຊົ້າ ຂອງວັນທີ 12 ມິຖຸນານີ້, ທົ່ວໂລກມີລາຍງານການລະບາດທັງໝົດ 213 (ປະເທດ/ເຂດ) ມີຜູ້ຕິດເຊື້ອຫລາຍກວ່າ 7,57 ລ້ານຄົນ (ໃໝ່ 135.862ຄົນ), ເສຍຊິວິດ 422.842 ຄົນ (ໃໝ່ 4.886 ຄົນ) ເຊິ່ງກວມເອົາ 5,58% ຂອງຜູ້ຕິດເຊື້ອທັງໝົດ, ປິ່ນປົວຫາຍດີ 3,83 ລ້ານກວ່າຄົນ (ໃໝ່ 110.216 ຄົນ) ກວມເອົາ 50% ຂອງຜູ້ຕິດເຊື້ອທັງໝົດ ແລະ ຫນ້າເປັນຫ່ວງແມ່ນຍັງມີການລະບາດເປັນວົງກວ້າງຢູ່ໃນ ທະວີບອາເມລິກາ ແລະ ເອີຣົບ, ມີບາງປະເທດ ຈໍານວນຜູ້ຕິດເຊື້ອໃນມື້ດຽວສູງເຖິງ 30.412 ຄົນ (ເບຣຊິນ) ແລະ ເສຍຊີວິດເຖິງ 1.240 ຄົນຕໍ່ມື້. ສະເພາະຢູ່ຂົງເຂດອາຊີຂອງພວກເຮົາ ກໍແມ່ນປະເທດອິນເດຍ ທີ່ມີທ່າອ່ຽງໃນການຕິດເຊື້ອ COVID-19 ເພິ່ມຂຶ້ນ ຄືພຽງມື້ດຽວມີຈຳນວນຜູ້ຕິດເຊື້ອສູງເຖິງ 11.128 ຄົນ ແລະ ບັນດາກຸ່ມປະເທດອາຊຽນ ມາຮອດເຊົ້າວັນທີ 12 ມິຖຸນານີ້ ມີການຢັ້ງຢືນຜູ້ຕິດເຊື້ອ COVID-19 ຫລາຍເຖິງ 111.229 (ໃໝ່ 1.887 ຄົນ), ມີຜູ້ເສຍຊີວິດ 3.245 ຄົນ (ໃໝ່ 50 ຄົນ), ຍັງມີບາງປະເທດມີອັດຕາການຕິດເຊື້ອໃໝ່ສູງເຖິງ 979 ຄົນຕໍ່ມື້ (ອິນໂດເນເຊຍ) ແລະ 41 ຄົນຕໍ່ມື້.
ຄະນະສະເພາະກິດຕີລາຄາວ່າສະພາບການລະບາດຢູ່ປະເທດເຮົາ ແລະ ປະເທດທີ່ມີຊາຍແດນຕິດຈອດກັບ ສປປ ລາວ ແມ່ນຜ່ອນຄາຍລົງຫຼາຍແລ້ວ. ຍ້ອນມີການຮ່ວມແຮງຮ່ວມໃຈຈາກປະຊາຊົນບັນດາເຜົ່າ, ມີການສະໜັບສະໜູນຈາກບັນດາປະເທດເພື່ອນມິດ, ອົງການຈັດຕັ້ງສາກົນ, ຄູ່ຮ່ວມພັດທະນາ, ພາກທຸລະກິດ ແລະ ອົງການຈັດຕັ້ງທາງສັງຄົມທຸກພາກສ່ວນ ເຊິ່ງຈະເປັນບົດຮຽນອັນສຳຄັນໃຫ້ແກ່ພວກເຮົາໃນການກຳນົດນະໂຍບາຍ, ແຜນປະຕິບັດງານໃນຕໍ່ໜ້າ ເພື່ອສະກັດກັ້ນ ແລະ ແກ້ໄຂການລະບາດຂອງພະຍາດ COVID-19 ກໍຄືພະຍາດຕິດຕໍ່ອື່ນໆເຊັ່ນ: ພະຍາດໄຂ້ຍຸງລາຍ, ພະຍາດໝາກແດງ.
