ຫລາຍພັນຄົນຮ່ວມບໍລິຈາກເລືອດ ລະນຶກວັນຜູ້ບໍລິຈາກເລືອດໂລກ

ໃນວັນທີ 12 ມິຖຸນານີ້, ສູນເລືອດແຫ່ງຊາດ ຮ່ວມກັບ ອົງການກາແດງລາວ ໄດ້ຈັດກິດຈະກຳ ບໍລິຈາກເລືອດຊ່ວຍເຫລືອສັງຄົມ ເນື່ອງໃນໂອກາດລະນຶກວັນບໍລິຈາກເລືອດໂລກ 14 ມິຖຸນາ ຂຶ້ນທີ່ນະຄອນຫລວງວຽງຈັນດ້ວຍບັນຍາກາດຟົດຟື້ນ ເຊິ່ງມີຜູ້ເຂົ້າຮ່ວມບໍລິຈາກເລືອດຫລາຍກວ່າພັນຄົນ.

ຫົວໜ້າສູນເລືອດແຫ່ງຊາດ ກ່າວວ່າ: ວັນທີ 14 ມິຖຸນາ ຂອງທຸກໆປີ ເປັນວັນຜູ້ບໍລິຈາກເລືອດໂລກ ເຊິ່ງປະເທດຕ່າງໆໃນທົ່ວໂລກຕ່າງກໍໄດ້ພ້ອມກັນຈັດຕັ້ງສະເຫລີມສະຫລອງ ແລະ ລະນຶກວັນດັ່ງກ່າວເພື່ອສະແດງຄວາມຂອບໃຈຕໍ່ຜູ້ບໍລິຈາກເລືອດທີ່ເຂົາເຈົ້າໄດ້ມອບຂອງຂວັນຢ່າງມີຄ່າທີ່ສຸດຕໍ່ຊີວິດ ນັ້ນຄືການບໍລິຈາກເລືອດດ້ວຍຄວາມສະໝັກໃຈ ເພື່ອຊ່ວຍເຫລືອຄົນເຈັບ ແລະ ສ້າງຈິດສຳນຶກຕໍ່ກັບການເສຍສະລະອັນມີຄ່າດັ່ງກ່າວ ເພື່ອຊ່ວຍກອບກູ້ເອົາຊີວິດຂອງຜູ້ເຈັບປ່ວຍທີ່ກຳລັງຮັກສາປິ່ນປົວຕົນເອງຢູ່ໂຮງຫມໍຕ່າງໆໃນທົ່ວໂລກ.

ໃນປີ 2019 ຜ່ານມາ, ສຳລັບຢູ່ລາວເຮົາໄດ້ມີຄົນເຈັບທີ່ໃຊ້ເລືອດເຂົ້າໃນການປິ່ນປົວກວມເອົາ 40.587 ເທື່ອຄົນ, ໃນນັ້ນ ມີແມ່ຍິງທີ່ໄດ້ຮັບຜົນກະທົບຈາກການເກີດລູກ, ເດັກນ້ອຍທີ່ເປັນພະຍາດເລືອດຈາງຂັ້ນຮ້າຍແຮງ, ພະຍາດໄຂ້ຍຸງ, ໄຂ້ເລືອດອອກ, ການຂາດສານອາຫານ, ການຜ່າຕັດຕ່າງໆ ແລະ ຍ້ອນການບໍລິຈາກເລືອດຂອງທຸກຄົນໃນສັງຄົມກໍສາມາດຊ່ວຍເອົາຊີວິດຂອງຄົນເຈັບດັ່ງກ່າວໄດ້ເປັນຈຳນວນຫລວງຫລາຍ.

ທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ ກ່າວໃນພິທີວ່າ: ການບໍລິຈາກເລືອດ ສາມາດຕອບສະໜອງໃຫ້ແກ່ຄົນເຈັບໄດ້ພຽງພໍ, ປອດໄພ ແລະ ທັນເວລາ, ສຳລັບປີ 2020 ນີ້ໄດ້ມີເປົ້າໝາຍໃຫ້ໄດ້ຫລາຍກວ່າ 60.700 ຖົງ ແລະ ເພື່ອໃຫ້ບັນລຸເປົ້າໝາຍດັ່ງກ່າວຢ່າງຫນ້ອຍໃຫ້ມີການບໍລິຈາກເລືອດ 1% ຂອງປະຊາກອນຕໍ່ປີ. ດັ່ງນັ້ນ ຈິ່ງຂໍຮຽກຮ້ອງໃຫ້ປະຊາຊົນລາວບັນດາເຜົ່າໃນຂອບເຂດທົ່ວປະເທດຈົ່ງໄດ້ປຸກລະດົມນໍ້າໃຈປະກອບສ່ວນບໍລິຈາກເລືອດເພື່ອນຳໃຊ້ເຂົ້າໃນການຮັກສາຄົນເຈັບ ແລະ ຜູ້ຕ້ອງການເລືອດເພື່ອຊ່ວຍຊີວິດຂອງເຂົາເຈົ້າ.