ພຽງ 1 ອາທິດ ມີຜູ້ເສຍຊີວິດຈາກອຸປະຕິເຫດ 7 ຄົນ

ເຈົ້າໜ້າທີ່ພະແນກຕຳຫລວດຈະລາຈອນ ນະຄອນຫລວງວຽງຈັນໃຫ້ຮູ້ວ່າ: ໃນອາທິດຜ່ານມາ (ວັນທີ 1-8 ມິຖຸນາ 2020) ມີອຸປະຕິເຫດເກີດຂຶ້ນ 25 ຄັ້ງ, ພາຫະນະເປ່ເພເລັກໜ້ອຍ 15 ຄັນ, ເປ່ເພສົມຄວນ 31 ຄັນ, ໄດ້ຮັບບາດເຈັບເລັກໜ້ອຍ 7ຄົນ, ສົມຄວນ 12 ຄົນ, ສາຫັດ 7 ຄົນ ແລະ ເສຍຊີວິດ 7 ຄົນ.

ໃນນັ້ນ, ເມື່ອເວລາປະມານ 17:30 ໂມງ ຂອງວັນທີ 1 ມິຖຸນາຜ່ານມາ ມີລົດຈັກກັບລົດບັນທຸກຕຳກັນຢູ່ບ້ານອ່າງນ້ອຍ ເມືອງສັງທອງ ເຮັດໃຫ້ ທ້າວຈອມທອງ ອາຍຸ 65 ປີ, ຢູ່ບ້ານນາສາ ເມືອງສັງທອງເສຍຊີວິດ, ຕໍ່ມາໃນມື້ດຽວກັນເວລາປະມານ 21:10 ໂມງ ລົດຈັກຕຳລົດຈັກຢູ່ເຂດບ້ານສາລະຄຳ ເມືອງຫາດຊາຍຟອງ ນະຄອນຫລວງວຽງຈັນ ເຮັດໃຫ້ທ້າວ ບຸນເພັງ ອາຍຸ 21 ປີ, ບ້ານດົງໂພນແຮ່ ເມືອງຫາດຊາຍຟອງ ເສຍຊີວິດ, ໃນເວລາປະມານ 23:20 ໂມງ ລົດຈັກຕຳລົດໃຫຍ່ຢູ່ບ້ານໂພນເຄັງ ເມືອງໄຊເສດຖາ ເຮັດໃຫ້ມີຜູ້ເສຍຊີວິດ 1 ຄົນເປັນເພດຊາຍ ອາຍຸ 28 ປີ, ຢູ່ບ້ານດ່ານຊ້າງ ເມືອງໄຊທານີ ແລະ ໃນເວລາຕໍ່ມາປະມານ 23:30 ໂມງ ລົດຈັກຕຳເສົາໄຟຟ້າຢູ່ເຂດບ້ານສີວິໄລ ເມືອງໄຊທານີ ເຮັດໃຫ້ ນາງ ປາເຢັງວ່າງ ອາຍຸ 21 ປີ ຢູ່ບ້ານດົງໂດກ ເມືອງໄຊທານີ ເສຍຊີວິດ.

ນອກນີ້, ໃນວັນທີ 5 ມິຖຸນາຜ່ານມາ ເວລາປະມານ 20:00 ໂມງ ລົດໃຫຍ່ຕຳລົດຈັກຢູ່ເຂດບ້ານໂຊກໃຫຍ່ ເມືອງໄຊເສດຖາ ເຮັດໃຫ້ທ້າວ ພອນສຸ ອາຍຸ 39 ປີ, ຢູ່ບ້ານອາມອນ ເມືອງໄຊເສດຖາ ເສຍຊີວິດ ແລະ ໃນມື້ດຽວກັນເວລາປະມານ 20:10 ລົດໃຫຍ່ຕຳກັນຢູ່ເຂດບ້ານໄຊສະຫວ່າງ ເມືອງໄຊທານີ ເຮັດໃຫ້ທ້າວ ຄຳແຖວ ອາຍຸ 60 ປີ ຢູ່ບ້ານໂພນປ່າເປົ້າ ເມືອງສີສັດຕະນາກ ເສຍຊີວິດ ແລະ ກໍຍັງມີອຸປະຕິເຫດລົດຕູ້ຕຳຄົນຍ່າງຢູ່ບ້ານປາກທ້າງ ເມືອງສີໂຄດຕະບອງ ເຮັດໃຫ້ຄົນຍ່າງເສຍຊີວິດ.