ວັນທີ 8 ມິຖຸນາວັນທະເລໂລກ ຫລື ວັນມະຫາສະໝຸດໂລກ

ວັນທະເລໂລກ ຫລື ວັນມະຫາສະໝຸດໂລກ ກົງກັບວັນທີ 8 ມິຖຸນາຂອງທຸກໆປີ ເພື່ອເປັນການລະນຶກ ແລະຮ່ວມໃຈກັນອະນຸລັກໃຫ້ທະເລມີຄວາມງົດງາມ ມີຄວາມອຸດົມສົມບູນໄຮ້ສິ່ງເປຶ້ອນເປິຕ່າງໆ.

ວັນທະເລໂລກໄດ້ກຳນົດຂຶ້ນໃນວັນທີ 8 ມິຖຸນາປີ 1992 ດ້ວຍຄວາມຮ່ວມມືຂອງປະຊາຄົມໂລກ ທີ່ເມືອງຣີໂອ ເດີ ຈາເນໂຣ ປະເທດບຣາຊິລ ນັບຕັ້ງແຕ່ນັ້ນເປັນຕົ້ນມາ ວັນທີ 8 ມິຖຸນາຂອງທຸກໆປີ ເຊິ່ງເປັນວັນສຳຄັນທີ່ໜ້າຈົດຈຳອີກວັນໜຶ່ງ.

ການກຳນົດວັນດັ່ງກ່າວນີ້ຂຶ້ນມາກໍເພື່ອເຜີຍແຜ່ຄວາມຮູ້ຕ່າງໆກ່ຽວກັບການເບິ່ງແຍງ ແລະ ອະນຸລັກຮັກສາທຳມະຊາດທ້ອງມະຫາຫາສະໝຸດ ໄປຍັງປະຊາຊົນທົ່ວໂລກ ແລະບັນດາປະເທດທີ່ມີຊາຍແດນຕິດກັບທະເລ ພ້ອມກັນປຸກລະດົມໃຫ້ມີການຈັດກິດຈະກຳ ແລະ ສ້າງສິ່ງທີ່ປູກຈິດສຳນຶກໃຫ້ແກ່ຊົນປວງຊົນ ເຊັ່ນ: ຫໍພິພິທະພັນສັດນ້ຳໃນທະເລ, ສວນສັດ, ສູນສຶກສາ, ວິຊາຮຽນໃນໂຮງຮຽນ ແລະອື່ນໆຢ່າງຕໍ່ເນື່ອງ ເພື່ອເຮັດໃຫ້ທຸກຄົນໄດ້ເອົາໃຈໃສ່ຮັກສາສິ່ງແວດລ້ອມ ແລະ ຄວາມສົມບູນຂອງທະເລ.

ຫລາຍປະເທດເມື່ອເຖິງວັນທີ 8 ມິຖຸນາ ເຂົາເຈົ້າໄດ້ຈັດກິດຈະກຳຕ່າງໆເຊັ່ນ: ການໄປທັດສະນາການໃຫ້ຄວາມຮູ້ຕ່າງທກ່ຽວກັບທະເລ, ຮ່ວມກັນເກັບຂີ້ເຫຍື້ອຕາມຊາຍຫາດ, ເຜີຍແຜ່ການດຳລົງຊີວິດຂອງສັດໃນທະເລ ແລະຜົນກະທົບຕໍ່ຊີວິດສັດຈາກການຖິ້ມຂີ້ເຫຍື້ອຊະຊາຍ ດັ່ງນີ້ເປັນຕົ້ນ.

ເຖິງແມ່ນວ່າປະເທດລາວເຮົາບໍ່ມີທະເລກໍຕາມ ແຕ່ສາຍນ້ຳໃນລາວ ໂດຍສະເພາະແມ່ນ້ຳຂອງກໍໄຫລເຂົ້າສູ່ທະເລເຊັ່ນດຽວກັນ ຜົນກະທົບປະເທດລາວອາດຈະບໍ່ກະທົບທາງກົງ ແຕ່ມັນມີຜົນທາງອ້ອມ ຫາກເຮົາຍັງຖິ້ມຂີ້ເຫຍື້ອຊະຊາຍ, ບໍ່ຮູ້ຮັກສາສິ່ງແວດລ້ອມຊ່ວຍກັນ ພ້ອມດຽວກັນນີ້ເຮົາຈະໄດ້ຮັບຜົນກະທົບໂດຍກົງຄື ສ້າງສິ່ງເປິເປື້ອນໃຫ້ກັບສາຍນ້ຳຕ່າງໆໃນລາວອີກດ້ວຍ.

ທາງທີ່ດີ ພວກເຮົາທຸກຄົນຄວນຮູ້ຖິ້ມຂີ້ເຫຍື້ອຖືກບ່ອນ ແລະຢຸດເດັດຂາດຕໍ່ການຖິ້ມຂີ້ເຫຍື້ອຊະຊາຍ, ສຳລັບຜູ້ທີ່ໄດ້ມີໂອກາດໄປທ່ຽວທະເລແມ່ນຕ້ອງປະຕິບັດຕາມລະບຽບຂອງແຫລ່ງທ່ອງທ່ຽວໃຫ້ດີ, ມີຈິດສຳນຶກຮັກຕໍ່ສິ່ງແວດລ້ອມ.

ພ້ອມດຽວກັນນັ້ນ, ບັນດາໂຮງຈັກໂຮງງານຕ່າງໆຄວນປະຕິບັດຕາມຫລັກການບຳບັດນ້ຳເສຍ,​ ນ້ຳເປື້ອນ, ບໍ່ຄວນປ່ອຍນໍ້າເສຍ, ນ້ຳເປື້ອນລົງສູ່ແຫລ່ງນ້ຳຕ່າງໆ  ເພື່ອບໍ່ໃຫ້ມີຜົນກະທົບຕໍ່ສັດນ້ຳໃນທາງກົງ ແລະ ທາງອ້ອມ.

ສຳລັບການດຳລົງຊີວິດຂອງປະຊາຊົນ ພາກສ່ວນກ່ຽວຂ້ອງຄວນໄດ້ເອົາໃຈໃສ່ຕື່ມເລື່ອງການສ້າງວັງສະຫງວນ, ຮູ້ຫາປາຕາມລະດູການ, ການປ່ອຍປາສູ່ແຫລ່ງນ້ຳ, ການອະນຸລັກສັດນ້ຳທີ່ຫາຍາກ ແລະບໍ່ຫາປາດ້ວຍວິທີສູນພັນ ເຊັ່ນ ການຖິ້ມລະເບີດ, ການໃຊ້ຢາເບືອ,  ການໃຊ້ໄຟຊັອດ ດັ່ງນີ້ເປັນຕົ້ນ.

ວັນດ່ັງກ່າວນີ້, ມັນມີຄວາມສຳຄັນຕໍ່ທຸກຊີວິດບົນໜ້າໂລກ ພວກເຮົາຕ້ອງຮ່ວມແຮງຮ່ວມໃຈກັນອະນຸລັກຮັກສາສິ່ງແວດລ້ອມ ໃຫ້ດີ.