ພົບການລະບາດຄັ້ງໃໝ່ຂອງພະຍາດອັກເສບຕັບຊະນິດ A ຢູ່ແຂວງວຽງຈັນ ແລະ ນະຄອນຫລວງວຽງຈັນ
ພະແນກສາທາລະນະສຸກນະຄອນຫລວງວຽງຈັນ ລາຍງານໃຫ້ຮູ້ໃນວັນທີ 15 ມິຖຸນານີ້ວ່າ: ໄດ້ພົບການລະບາດຄັ້ງໃໝ່ຂອງພະຍາດອັກເສບຕັບເອ (A) ຢູ່ແຂວງວຽງຈັນ ແລະ ນະຄອນຫລວງວຽງຈັນ.
ທ່ານ ຈັນທະໄລ ໄຊຍະວົງ ຫົວໜ້າຂະແໜງລະບາດວິທະຍາພະແນກສາທາລະນະສຸກນະຄອນຫລວງ ໃຫ້ຮູ້ວ່າ: ພາຍຫລັງໄດ້ຮັບລາຍງານຈາກໂຮງໝໍມະໂຫສົດວ່າມີຄົນເຈັບຕິດເຊື້ອພະຍາດອັກເສບຕັບ A ຫລາຍຄົນຈາກບ້ານໂນນສະຫວ່າງເມືອງວຽງຄໍາ, ບ້ານຫາດໄຊໃຕ້, ຫາດໄຊເໝືອ, ນາແກ່ວເໜືອ, ນາຫວາ, ບ້ານເກີນໃຕ້ ແລະ ບ້ານໄຮ່ຢ່ອນເມືອງທຸລະຄົມແຂວງວຽງຈັນ ແລະ ບ້ານທົ່ງມັ່ງເມືອງໄຊທານີ, ນະຄອນຫລວງວຽງຈັນ ມາປິ່ນປົວຢູ່ໂຮງໝໍດັ່ງກ່າວ, ຈິ່ງໄດ້ສົ່ງວິຊາການລົງກວດກາຢ່າງຮີບດ່ວນ, ໂດຍຜູ້ຕິດເຊື້ອມີອາການໄຂ້, ເຈັບຫົວ, ປວດຕາມກ້າມຊີ້ນ, ຕາ ແລະ ຜິວໜັງເຫລືອງ, ເຈັບທ້ອງ ແລະ ຮາກ ແລະ ຜູ້ຕິດເຊື້ອສ່ວນໃຫຍ່ມີອາຍຸລະຫວ່າງ 15-50 ປີຂຶ້ນໄປ. ພ້ອມນີ້ກໍໄດ້ສົ່ງໜ່ວຍງານວິຊາສະເພາະລົງເກັບຂໍ້ມູນຕົວຢ່າງຜູ້ຕິດເຊື້ອອີກຈໍານວນໜຶ່ງທີ່ໄປປິ່ນປົວຕາມໂຮງໝໍເມືອງ, ສຸກສາລາ ຫລື ຄລີກນິກເອກະຊົນແຫ່ງຕ່າງໆໃນເຂດມີການລະບາດ ແລະ ພົບວ່ານັບແຕ່ທ້າຍເດືອນມີນາມາຮອດວັນທີ 12 ມິຖຸນານີ້ມີຜູ້ຕິດເຊື້ອຫລາຍກວ່າ 50 ຄົນຢູ່ 10 ບ້ານຂອງເມືອງໄຊທານີທີ່ມີຊາຍແດນຕິດກັບເມືອງທຸລະຄົມ. ສ່ວນຕົວເລກຜູ້ຕິດເຊື້ອຢູ່ສອງເມືອງຂອງແຂວງວຽງຈັນແມ່ນຍັງບໍ່ທັນຮູ້ຕົວເລກທີ່ຊັດເຈນ.
ຫົວໜ້າຂະແໜງລະບາດວິທະຍາ ກ່າວວ່າ: ພະຍາດດັ່ງກ່າວມັກເກີດຂຶ້ນຢູ່ບັນດາປະເທດທີ່ລະບົບສຸຂາພິບານບໍ່ທັນດີ ແລະ ເມື່ອເກີດຂຶ້ນແລ້ວແມ່ນຈະມີການແຜ່ລະບາດຢ່າງໄວວາຜ່ານການບໍລິໂພກອາຫານ ແລະ ຊົມໃຊ້ນໍ້າທີ່ບໍ່ສະອາດຕ່າງໆ ແລະ ປັດໃຈຕົ້ນຕໍພາໃຫ້ເກີດລະບາດຄັ້ງໃໝ່ນີ້, ອາດເປັນຍ້ອນໄລຍະນີ້ແມ່ນມີບຸນປະເພນີຕ່າງໆ, ໂດຍສະເພາະບຸນບັ້ງໄຟທີ່ມີຜູ້ຄົນໄປເຕົ້າໂຮມກັນຫລາຍ, ການບໍລິໂພກອາຫານບໍ່ສະອາດ ແລະ ການຖີ້ມສິ່ງເສດເຫລືອຊະຊາຍພາໃຫ້ພະຍາດດັ່ງກ່າວກັບມາລະບາດອີກຄັ້ງໃໝ່.
ຫົວໜ້າຂະແໜງລະບາດວິທະຍາ ກ່າວວ່າ: ພະຍາດດັ່ງກ່າວເຄີຍເກີດລະບາດມາແລ້ວຄັ້ງໜຶ່ງເມື່ອປີ 2016 ຜ່ານມາຢູ່ແຂວງຊຽງຂວາງ, ຊຶ່ງມີຜູ້ຕິດເຊື້ອຫລາຍກວ່າ 500 ຄົນ, ປັດຈຸບັນພະຍາດນີ້ຍັງບໍ່ມີຢາປົວສະເພາະ, ພຽງແຕ່ອາໃສການປິ່ນປົວທົ່ວໄປ, ໂດຍຈະເຊົາເອງພາຍໃນໄລຍະເວລາ 2-4 ອາທິດ ແລະ ອັດຕາການເສຍຊີວິດຈາກພະຍາດນີ້ມີປະມານ 1-3 ຕໍ່ 1.000 ຄົນ. ສະນັ້ນເພື່ອຄວບຄຸມ ແລະ ປ້ອງກັນການລະບາດຂອງພະຍາດດັ່ງກ່າວ, ພະແນກສາທາລະນະສຸກໄດ້ອອກແຈ້ງການໃຫ້ຫ້ອງການສາທາລະນະສຸກໃນ 9 ຕົວເມືອງເອົາໃຈໃສ່ຕິດຕາມກວດກາບັນດາໂຮງງານຜະລິດນໍ້າດື່ມ, ນໍ້າກ້ອນ ຕ້ອງປະຕິບັດຫລັກສຸຂະອານາໄມໃນການຜະລິດຢ່າງເຂັ້ມງວດ, ພະນັກງານ-ກໍາມະກອນທຸກຄົນທີ່ພົວພັນກັບການຜະລິດຕ້ອງໄດ້ຮັບການກວດສຸຂະພາບຢ່າງເຄັ່ງຄັດ, ໃຫ້ບັນດາບ້ານ ຫລື ຊຸມຊົນເອົາໃຈໃສ່ປະຕິບັດຫລັກການອານາໄມສາມສະອາດ, ພ້ອມທັງລາຍງານໃຫ້ພາກສ່ວນກ່ຽວຂ້ອງຮັບຊາບເມື່ອພົບເຫັນຄົນເຈັບທີ່ມີອາການຕິດເຊື້ອພະຍາດດັ່ງກ່າວໃຫ້ໄດ້ຮັບການປິ່ນປົວໄວ ເພື່ອປ້ອງກັນບໍ່ໃຫ້ຂະຫຍາຍອອກກວ້າງ ແລະ ຄວນລ້າງມືໃຫ້ສະອາດທຸກຄັ້ງກ່ອນກີນອາຫານ ແລະ ບໍ່ຄວນໃຊ້ບ່ວງ, ຈອກ ແລະ ພາຊະນະອື່ນໆຮ່ວມໃນເວລາກິນອາຫານ ເພາະຈະເຮັດໃຫ້ພະຍາດສາມາດຕິດຕໍ່ໄດ້ງ່າຍ.
