ເຈົ້າໜ້າທີ່ເຜີຍສາເຫດໄຟໄໝ້ ເຮືອນປະຊາຊົນຢູ່ບ້ານ ສີໄຄ ໄດ້ຮັບຄວາມເສຍຫາຍ 4 ຫລັງ.

ພະແນກຕຳຫລວດສະກັດກັ້ນ ແລະ ມອດໄຟ ນະຄອນຫລວງວຽງຈັນ ເຜີຍສາເຫດລ່າສຸດຂອງການເກີດໄຟໄໝ້ເຮືອນປະຊາຊົນ ຢູ່ບ້ານ ສີໄຄທ່າ ເມືອງ ສີໂຄດຕະບອງ ນະຄອນຫລງວຽງຈັນ ໃຫ້ຮູ້ວ່າ: ພາຍຫລັງຈາກການສືບສວນ-ສອບສວນຂອງເຈົ້າໜ້າທີ່ ພົບວ່າ: ສາເຫດທີ່ແທ້ຈິງຂອງການເກີດໄຟໄໝ້ແມ່ນເກີດຈາກໄຟຟ້າລັດວົງຈອນ, ຊ໋ອດໄໝ້ ຢູ່ກະດານໄຟຊັ້ນສອງຂອງເຮືອນ ທ້າວ ວົງເພັດ ຫລວງໄຊ ອາຍຸ 66 ປີ ພະນັກງານບຳນານ, ຈາກນັ້ນໄດ້ລຸກລາມໄປໃສ່ເຮືອນໃກ້ຄຽງໄດ້ຮັບຄວາມເສຍຫາຍ 3 ຫລັງ, ຄື: 1. ເຮືອນນາງ ພວງຄຳ ພວງມະນີ ອາຍຸ 50 ປີ ອາຊີບພະນັກງານ ມູນຄ່າເສຍຫາຍ 400 ລ້ານກີບ, 2. ເຮືອນທ້າວ ອຸ່ນແສງ ວິໄຊ ອາຍຸ 66 ປີ ພະນັກງານບຳນານ ມູນຄ່າເສຍຫາຍ 40 ລ້ານກີບ, 3. ເຮືອນນາງ ພອນສະຫວັນ ຄຳບົງ ອາຍຸ 24 ປີ ອາຊີບຄ້າຂາຍ ( ເຮືອນຖືກລວກສາມາດສ້ອມແປງໄດ້) ມູນຄ່າເສຍຫາຍ 4 ລ້ານກີບ, ສຳລັບມູນຄ່າເສຍຫາຍຈາກໄຟໄໝ້ຄັ້ງນີ້ທັງໝົດຫລາຍກ່ວາ 1 ຕື້ກີບ, ຊຶ່ງເຫດການດັ່ງໄດ້ເກີດຂື້ນໃນຄ່ຳຄືນວັນທີ 30 ພຶດສະພາ ນີ້, ເຈົ້າໜ້າທີ່ໄດ້ລະດົມລົດມອດໄຟເຂົ້າສະກັດກັ້ນ ແລະ ຄວບຄຸມໄຟບໍ່ໃຫ້ຂະຫຍາຍວົງກວ້າງ ຊຶ່ງໃຊ້ເວລາ ກ່ວາ 2 ຊົ່ວໂມງຈຶ່ງສາມາດສະກັດກັ້ນໄວ້ໄດ້.
ເຈົ້າໜ້າທີ່ຍັງໃຫ້ຮູ້ວ່າ: ໃນເດືອນ ພຶດສະພາ ຜ່ານມານີ້, ຢູ່ ນະຄອນຫລວງວຽງຈັນ ມີອັກຄີໄພເກີດຂຶ້ນ 5 ຄັ້ງ, ເຮັດໃຫ້ມີເຮືອນປະຊາຊົນໄດ້ຮັບຄວາມເສຍຫາຍ 8 ຫລັງ, ສາເຫດການເກີດອັກຄີໄພຍ້ອນໄຟຟ້າລັດວົງຈອນ.