‘ພາຍຸເຂດຮ້ອນ’ ອາຊີ ເພີ່ມ ຄວາມສ່ຽງອຸດສາຫະກຳການບິນ
ບັນດາສາຍການບິນ, ສະໜາມບິນ ແລະ ບໍລິສັດປະກັນໄພທົ່ວອາຊີກຽມຮັບມືຄວາມເສຍຫາຍຢ່າງໜັກແບບບໍ່ເຄີຍເກີດຂຶ້ນມາກ່ອນ ໃນຂະນະທີ່ລະດູການພາຍຸເຂດຮ້ອນຂອງພາກພື້ນເລີ່ມຕົ້ນຂຶ້ນແລ້ວ.
ຂະນະທີ່ເຮືອບິນໂດຍສານຫລາຍຮ້ອຍລຳ ຕ້ອງຈອດຢູ່ໂຮງຈອດ ຫລື ພາຍໃນສະໜາມບິນ ເພາະການແຜ່ລະບາດຂອງໂຄວິດ-19 ບໍ່ໄດ້ເຄື່ອນໄຫວໄດ້ງ່າຍ.
ສະໜາມບິນໃຫຍ່ໆທີ່ຕ້ອງຜະເຊີນພາຍຸຕາມລະດູການເຊັ່ນ: ສະໜາມບິນຮົງກົງ, ໄຕ້ຫວັນ, ຍີ່ປຸ່ນ, ຟີລິບປິນ, ໄທ ແລະ ອິນເດຍ ລ້ວນເປັນສະໜາມບິນທີ່ຕ້ອງປັບຕົວໄປເປັນບ່ອນຈອດເຮືອບິນຈຳນວນຫລາຍທີ່ບໍ່ໄດ້ຂຶ້ນບິນ ເພາະມາດຕະການເຂັ້ມງວດດ້ານການເດີນທາງຂອງທຸກປະເທດທົ່ວໂລກ.
ບັນດາຜູ້ຊ່ຽວຊານໃນອຸດສາຫະກຳການບິນ ກ່າວວ່າ: ຕອນນີ້ບໍລິສັດປະກັນໄພສາຍການບິນກຳລັງຜະເຊີນກັບຄວາມສ່ຽງເພີ່ມຂຶ້ນ ຈາກບັນຫາເຮືອບິນໂດຍສານຈຳນວນຫລາຍຈອດລວມກັນຢູ່ຕາມສະໜາມບິນຕ່າງໆ.
ຂະນະທີ່ ແອງເຈລາ ກິດເທນ ຜູ້ອຳນວຍການສະພາສະໜາມບິນສາກົນ (ACI) ລະບຸວ່າ: ສະພາບອາກາດທີ່ຮຸນແຮງສຸດໆເຊັ່ນ: ພາຍຸເຮີລິເຄນ, ພາຍຸໄຕ້ຝຸ່ນ ແລະ ພາຍຸໄຊໂຄນ ເປັນພາຍຸຮ້າຍແຮງຕາມລະດູການໃນຫລາຍພື້ນທີ່ຂອງໂລກ ແລະ ໃນໄລຍະຂອງການລະບາດໂຄວິດ-19 ເປັນອີກໜຶ່ງຄວາມສ່ຽງທີ່ເພີ່ມເຂົ້າມາໃນອຸດສາຫະກຳການບິນ ເຮັດໃຫ້ສະໜາມບິນຫລາຍແຫ່ງກາຍເປັນບ່ອນຈອດເຮືອບິນໂດຍສານຈຳນວນຫລາຍ.
ສຳນັກງານການບິນພົນລະເຮືອນຂອງຟີລິບປິນ ລະບຸວ່າ: ຢູ່ສະໜາມບິນນາໆຊາດນິນອຍອາຄິໂນ ໃນນະຄອນຫລວງມະນິລາ ປະເທດຟີລິບປິນ ມີເຮືອບິນໂດຍສານຈຳນວນຫລາຍຈອດຢູ່ພາຍໃນສະໜາມບິນ ແລະ ເຮືອບິນທີ່ຈອດມີພື້ນທີ່ມາເຖິງຣັນເວ.
ສ່ວນສຳນັກງານຄວບຄຸມກົດລະບຽບດ້ານການບິນພົນລະເຮືອນຂອງໄຕ້ຫວັນ ກ່າວວ່າ: ໄດ້ແຈ້ງໃຫ້ສະໜາມບິນຕ່າງໆທົ່ວປະເທດຈັດກອງປະຊຸມເພື່ອກຽມຮັບມືພາຍຸໄຕ້ຝຸ່ນລ່ວງໜ້າ 36 ຊົ່ວໂມງໃນປີນີ້ຈາກ 24 ຊົ່ວໂມງ ເພື່ອໃຫ້ບັນດາສາຍການບິນມີເວລາພຽງພໍຈະຮ້ອງຂໍພື້ນທີ່ຈອດເຮືອບິນ ແລະ ຖ້າມີຄວາມຈໍາເປັນ, ສຳນັກງານຄວບຄຸມກົດລະບຽບດ້ານການບິນພົນລະເຮືອນໄຕ້ຫວັນພ້ອມຈະເປີດພື້ນທີ່ສຳລັບໃຫ້ເຮືອບິນແທັກຊີ ພາຍໃນສະໜາມບິນນາໆຊາດຫລັກໃນນະຄອນຫລວງໄທເປໃຫ້ຈອດເຮືອບິນໄດ້ ໂດຍພື້ນທີ່ແຫ່ງນີ້ຮອງຮັບເຮືອບິນໄດ້ 160 ລຳ.
ອີວາ ແອເວ ຄອບ ບອກວ່າມີແຜນຈະບໍລິຫານແກ້ໄຂເຮືອບິນໂດຍສານຂອງຕົນເອງເຊັ່ນກັນ ເຊິ່ງລວມທັງໃຫ້ເຮືອບິນໂດຍສານໄປຈອດຢູ່ໂຮງຈອດ ແລະ ສົ່ງເຮືອບິນບາງລຸ້ນໄປຈອດຢູ່ສະໜາມບິນຕ່າງໆໃນໄຕ້ຫວັນ ແລະ ຕ່າງປະເທດ, ສ່ວນສາຍການບິນໄຊນາ ແອລາຍ ບອກວ່າ: ກຽມແຜນຮັບມືພາຍຸໄຕ້ຝຸ່ນໄວ້ແລ້ວ ແຕ່ປະຕິເສດຈະເປີດເຜີຍລາຍລະອຽດ.
ຂະນະທີ່ສະໜາມບິນນາໆຊາດຮົງກົງ ເຊິ່ງເປັນທີ່ຕັ້ງຂອງຄາເທ ປາຊີຟິກ ແອເວ ແລະ ຮົງກົງ ແອລາຍ ລະບຸວ່າ: ມີເຮືອບິນທີ່ຈອດຢູ່ພາຍໃນສະໜາມບິນ 150 ລຳ ແລະ ໄດ້ກຽມມາດຕະການປ້ອງກັນໄວ້ກ່ອນແລ້ວ ກໍລະນີເກີດພາຍຸ ເນື່ອງຈາກເລີ່ມເຂົ້າສູ່ໄລຍະມໍລະສຸມແລ້ວ.
ສ່ວນສະໜາມບິນນາໆຊາດຄັນໄຊໃນນະຄອນໂອຊາກ້າ ປະເທດຍີ່ປຸ່ນ ເຊິ່ງຣັນເວປະສົບບັນຫານ້ຳຖ້ວມຢ່າງໜັກຕອນພາຍຸໄຕ້ຝຸ່ນເຈບິພັດທຳລາຍກຳແພງກັ້ນທະເລໃນປີ 2018 ບອກວ່າ: ໄດ້ແກ້ໄຂເພີ່ມຄວາມສູງຂອງກຳແພງກັ້ນນ້ຳທະເລ ແລະ ຕິດຕັ້ງອຸປະກອນຕ່າງໆ ເພື່ອປ້ອງກັນນ້ຳຖ້ວມແລ້ວ.
