ລາວຟອດຊີຕີໃຫ້ການຊ່ວຍເຫລືອສັງຄົມມາໂດຍຕະຫລອດ

ວັນທີ 15 ມີຖຸນານີ້, ບໍລິສັດ ລາວຟອດຊີຕີ ໄດ້ຈັດພິທີມອບ-ຮັບພາຫະ ນະເປັນລົດໃຫຍ່ ຮຸ່ນຟອດໂຟກັດ 1 ຄັນທີ່ມີມູນຄ່າ 40 ພັນໂດລາສະຫະລັດໃຫ້ສູນຝຶກອົບຮົມວິຊາຊີບດອນບອດໂກ ເພື່ອນຳໃຊ້ເຂົ້າໃນ ວຽກງານບໍລິຫານພາຍໃນສູນດັ່ງກ່າວ, ໂດຍການມອບຂອງທ່ານ ດິລິບ ເຈຊູທາຊານ ຜູ້ຈັດການທົ່ວໄປ ບໍລິສັດ ລາວຟອດຊີຕີ ແລະ ຮັບໂດຍ ຫລວງພໍ່ວິນເຊັນ ຜູ້ຕາງໜ້າສູນຝຶກອົບຮົມດອນບອດໂກ.

ການຊ່ວຍເຫລືອຄັ້ງນີ້ ແມ່ນໜຶ່ງໃນນະໂຍບາຍຂອງບໍລິສັດ ລາວຟອດຊີຕີ, ໂດຍໄດ້ມີການຊ່ວຍເຫລືອສັງຄົມໃນທຸກໆປີ ຊຶ່ງແຕ່ລະປີຈະສະລັບພັດປ່ຽນໄປເລື້ອຍໆ ເປັນຕົ້ນ ໃນປີ 2013 ໄດ້ມອບພາຫະນະ 1 ຄັນໃຫ້ໂຮງຮຽນເຕັກນິກລາວ-ເຢຍລະມັນ ໃນມູນຄ່າ 40 ພັນໂດລາສະຫະລັດ, ໃນປີ 2014 ໄດ້ມອບເງິນຈຳນວນ 20 ພັນໂດລາສະຫະລັດ, ໃຫ້ມູນິທິໜ່ວຍກູ້ໄພນະຄອນຫລວງວຽງຈັນ, ສ່ວນໃນປີ 2016 ໄດ້ມອບເງິນຈຳນວນ 25 ພັນໂດລາສະຫະລັດ ໃຫ້ອົງການຊ່ວຍເຫລືອຄົນທຸກຍາກເວີວີເຊີ້ນ ແລະ ໃນປີນີ້ ກໍໄດ້ມອບພະຫະນະ 1 ຄັນໃຫ້ສູນຝຶກອົບຮົມວິຊາຊີບດອນບອດໂກ ເພື່ອນຳໃຊ້ເຂົ້າໃນວຽກງານບໍລິຫານຂອງມີຄວາມສະດວກດີຂຶ້ນ.

ສູນຝຶກອົບຮົມດອນບອດໂກ ເປັນໜຶ່ງໃນໂຄງການພັດທະນາ ແລະ ຝຶກ ອົບຮົມວິຊາຊີບໃຫ້ແກ່ຊາວໜຸ່ມຜູ້ທຸກຍາກທີ່ອາໃສຢູ່ເຂດຫ່າງໄກສອກຫລີກ, ຜູ້ທີ່ບໍ່ມີວຽກເຮັດງານທຳ, ຊຶ່ງໂຄງການດັ່ງກ່າວຈະເນັ້ນໃສ່ການພັດທະນາຊັບພະຍາ ກອນມະນຸດ ເພື່ອສ້າງວິຊາຊັບໃຫ້ຊາວໜຸ່ມຜູ້ທີ່ທຸກຍາກຂາດເຂີນເປັນຕົ້ນຕໍ.