ໄຊໂຄນນິຊາກາກຽມຖະຫລົ່ມມຸມໄບ ຄັ້ງທຳອິດໃນຮອບ 129 ປີ
ທາງການອິນເດຍກຽມພ້ອມຮັບມື ພາຍຸຫົວໃໝ່ມະຫຶມາທີ່ກຳລັງເຄື່ອນທີ່ຢູ່ໃນທະເລອາຣັບ ແລະ ມີທິດທາງພັດຂຶ້ນຝັ່ງເມືອງຫລວງທຸລະກິດການເງິນ, ມຸມໄບ, ທາງພາກຕາເວັນຕົກ ໃນຕອນທ່ຽງວັນທີ 3 ມິຖຸນານີ້.
ເຈົ້າໜ້າທີ່ສຳນັກອຸຕຸນິຍົມວິທະຍາອິນເດຍ ກ່າວວ່າ: ພາຍຸໄຊໂຄນນິຊາກາ (Cyclone Nisarga) ຈະພັດຂຶ້ນຝັ່ງໃກ້ເມືອງມຸມໄບ ໃນລັດມະຫາຣາຣະ ໃນເວລາ 6:30 ໂມງ ວັນທີ 3 ມິຖຸນາ ຕາມເວລາມາດຕະຖານສາກົນ (13:30 ໂມງ ຕາມເວລາຢູ່ລາວ) ໂດຍລັດຄຸຣາດ ທີ່ຢູ່ຕິດກັນ ຄາດວ່າຈະໄດ້ຮັບຜົນກະທົບຈາກພາຍຸນຳ.
ພາຍຸຫົວໃໝ່ພັດເຂົ້າຫາອິນເດຍບໍ່ຮອດ 2 ອາທິດຫລັງຈາກພາຍຸໄຊໂຄນ “ອຳພັນ” ພັດຂຶ້ນຝັ່ງຕາເວັນອອກຂອງອິນເດຍ ແລະ ບັງກະລາເທດ ເຮັດໃຫ້ມີຜູ້ເສຍຊີວິດ 85 ຄົນໃນ 2 ປະເທດ.
BBC ລາຍງານວ່າ: ຊາວເມືອງມຸມໄບຫລາຍໝື່ນຄົນທີ່ຢູ່ໃນພື້ນທີ່ສ່ຽງ ໄດ້ຖືກອົບພະຍົບໄປຢູ່ສູນອາໄສເພື່ອຄວາມປອດໄພແລ້ວ. ຂະນະທີ່ສຳນັກອຸຕຸນິຍົມວິທະຍາແຫ່ງຊາດອິນເດຍ (IMD) ລາຍງານໃນເວລາ 05:30 ໂມງ ຂອງວັນທີ 3 ມິຖຸນາ ຕາມເວລາທ້ອງຖິ່ນ ໄຊໂຄນນິຊາກາຢູ່ຫ່າງຈາກເມືອງມຸມໄບປະມານ 215 ກິໂລແມັດ ແລະ ໄດ້ທະວີກຳລັງ ແລະ ຄວາມໄວເພີ່ມຂຶ້ນ ຂະນະມຸ່ງໜ້າກຽມຂຶ້ນຝັ່ງເມືອງມຸມໄບ ເຊິ່ງອິດທິພົນຂອງໄຊໂຄນນິຊາກາໄດ້ສົ່ງຜົນໃຫ້ເກີດຄື້ນລົມແຮງ ແລະ ຝົນຕົກໜັກຢູ່ເມືອງມຸມໄບແລ້ວ ນັບແຕ່ວັນທີ 2 ມິຖຸນາຜ່ານມາ.
