ໄທ ອະນຸຍາດໃຫ້ແຮງງານກຳປູເຈຍ, ລາວ, ມຽນມາ ຢູ່ໄທໄດ້ເຖິງ 31 ກໍລະກົດນີ້
ວັນທີ 2 ມິຖຸນາ 2020, ໂຄສົກປະຈຳສຳນັກງານນາຍົກລັດຖະມົນຕີ ເປີດເຜີຍວ່າ: ຄະນະລັດຖະບານເຫັນພ້ອມຫລຸດຜ່ອນໃຫ້ແຮງງານສັນຊາດກຳປູເຈຍ, ລາວ ແລະ ມຽນມາ ຢູ່ໃນຣາຊະອານາຈັກເປັນການຊົ່ວຄາວ ແລະ ການເຮັດວຽກນັບແຕ່ວັນທີ 1 ມິຖຸນາ ເຖິງ 31 ກໍລະກົດ 2020 ເພື່ອຫລຸດຄວາມສ່ຽງການແຜ່ລະບາດຂອງໂຄວິດ-19 ຫລື ກາຍເປັນແຮງງານຜິດກົດໝາຍ ລວມທັງຊ່ວຍບັນເທົາບັນຫາການຂາດເຂີນແຮງງານຂອງທຸລະກິດ ເພື່ອຜົນປະໂຫຍດໃນການຟື້ນຟູເສດຖະກິດຫລັງສະຖານະການໂຄວິດ-19 ຫລຸດຜ່ອນ.
ເນື່ອງຈາກຕາມປະກາດຂອງກະຊວງປ້ອງກັນປະເທດ ແລະ ກະຊວງແຮງງານທີ່ຫລຸດຜ່ອນໃຫ້ຄົນສັນຊາດກຳປູເຈຍ, ລາວ ແລະ ມຽນມາ ສິ້ນສຸດລົງໃນວັນທີ 31 ພຶດສະພາຜ່ານມາ, ແຕ່ມາດຕະການປ້ອງກັນການແຜ່ລະບາດຂອງເຊື້ອພະຍາດໂຄວິດ-19 ໃນປະເທດໄທຍັງມີທ່າອ່ຽງຢູ່ຢ່າງຕໍ່ເນື່ອງອີກໄລຍະໜຶ່ງ. ດັ່ງນັ້ນ ກະຊວງແຮງງານຈຶ່ງໄດ້ປະຊຸມຮ່ວມກັບໜ່ວຍງານທີ່ກ່ຽວຂ້ອງເຊັ່ນ: ສໍານັກງານກວດຄົນເຂົ້າເມືອງ, ກອງການຕ່າງປະເທດ, ຫ້ອງການກະຊວງປ້ອງກັນປະເທດ ແລະ ກົມການປົກຄອງ ເຫັນຄວາມຫລຸດຜ່ອນໃຫ້ແຮງງານສັນຊາດກຳປູເຈຍ, ລາວ ແລະ ມຽນມາ ຢູ່ໃນຣາຊະອານາຈັກຊົ່ວຄາວ ແລະ ການເຮັດວຽກ. ໃນ 2 ກຸ່ມເປົ້າໝາຍຄື: ແຮງງານກຳປູເຈຍ, ລາວ ແລະ ມຽນມາ ທີ່ຖືໜັງສືເດີນທາງ ຫລື ເອກະສານໃຊ້ແທນໜັງສືເດີນທາງ ແລະ ໄດ້ຮັບອະນຸຍາດໃຫ້ເຂົ້າມາເຮັດວຽກຢູ່ໄທພາຍໃຕ້ MOU ດ້ານແຮງງານ ແລະ ແຮງງານກຳປູເຈຍ ແລະ ມຽນມາທີ່ຖືບັດຜ່ານແດນທີ່ໄດ້ຮັບອະນຸຍາດໃຫ້ເຂົ້າມາເຮັດວຽກໃນຣາຊະອານາຈັກຕາມມາດຕາ 64 ໂດຍອະນຸຍາດໃຫ້ຢູ່ໃນຣາຊະອານາຈັກ ແລະ ເຮັດວຽກນັບແຕ່ວັນທີ 1 ມິຖຸນາ 2020 ເຖິງ 31 ກໍລະກົດ 2020.
ທັງນີ້ ເພື່ອຫລຸດຄວາມສ່ຽງການກັບມາແຜ່ລະບາດຂອງໂຄວິດ-19 ໃໝ່ຈາກແຮງງານທີ່ເດີນທາງເຂົ້າມາໃໝ່, ຫລຸດຄວາມສ່ຽງທີ່ແຮງງານບາງສ່ວນຈະປ່ຽນເປັນແຮງງານທີ່ບໍ່ຖືກຕ້ອງຕາມກົດໝາຍ, ຫລຸດສະພາບການຂາດເຂີນແຮງງານຂອງທຸລະກິດທີ່ຍັງຕ້ອງການຈ້າງແຮງງານຕ່າງປະເທດ ລວມທັງເພື່ອຜົນປະໂຫຍດໃນການຟື້ນຟູເສດຖະກິດຂອງປະເທດພາຍຫລັງສະຖານະການໂຄວິດ-19 ຫລຸດຜ່ອນ.
