ເດັກນ້ອຍສ່ຽງຕິດໄວຣັສໂຄໂຣນາສາຍພັນໃໝ່ ຊໍ່າໃດເມື່ອກັບໄປໂຮງຮຽນ
ໃນຂະນະທີ່ນັກຮຽນບາງຊັ້ນຢູ່ອັງກິດກັບໄປໂຮງຮຽນວັນທີ 1 ມິຖຸນາ, ຢູ່ລາວ ກະຊວງສຶກສາທິການ ແລະ ກິລາ ປະກາດເປີດການຮຽນ-ການສອນໃນວັນທີ 2 ມິຖຸນາ.
ຫລາຍປະເທດມີການຖົກຖຽງກັນຫລາຍເຖິງມາດຕະການປ້ອງກັນບໍ່ໃຫ້ພະຍາດໂຄວິດ-19 ລະບາດຮອບໃໝ່.
ພະຍາດໂຄວິດ-19 ເປັນອັນຕະລາຍຕໍ່ເດັກຊໍ່າໃດ
ເດັກນ້ອຍມີຄວາມສ່ຽງຕິດເຊື້ອຈາກໄວຣັສໂຄໂຣນາສາຍພັນໃໝ່ຕໍ່າ, ກົງກັນຂ້າມກັບຜູ້ໃຫຍ່ທີ່ມີທ່າອ່ຽງຕິດເຊື້ອໜັກ ແລະ ມີອາການແຊກຊ້ອນເຖິງຂັ້ນເສຍຊີວິດ.
ທົ່ວສະຫະຣາຊະອານາຈັກ ການເສຍຊີວິດຈາກໂຄວິດ-19 ໃນເດັກອາຍຸຕໍ່າກວ່າ 15 ຄິດເປັນ 0,01%, ສຳລັບຄົນທີ່ອາຍຸ 15-44 ປີ ຄິດເປັນ 1%, ສ່ວນຄົນທີ່ອາຍຸຫລາຍກວ່າ 75 ປີ ຄິດເປັນປະມານ 75%.
ການວິໄຈຂອງອົງການການກຸສົນແຫ່ງໜຶ່ງລະບຸວ່າ: ຮອດວັນທີ 15 ພຶດສະພາ ເຄິ່ງໜຶ່ງຂອງຜູ້ຕິດເຊື້ອໂຄວິດ-19 ທີ່ຕ້ອງເຂົ້າພະແນກຜູ້ປ່ວຍໜັກຢູ່ອັງກິດ, ເວລ ແລະ ໄອແລນເໜືອເປັນຜູ້ຕິດເຊື້ອອາຍຸ 60 ປີຂຶ້ນໄປ ແລະ ອີກເຄິ່ງໜຶ່ງອາຍຸນ້ອຍກວ່ານັ້ນ. ແຕ່ໂດຍລວມແລ້ວ ຜູ້ຕິດເຊື້ອສ່ວນຫລາຍອາຍຸຫລາຍກວ່າ 50 ປີ ແລະ ນ້ອຍກວ່າ 10% ເປັນຄົນທີ່ອາຍຸນ້ອຍກວ່າ 40 ປີ.
ເດັກສາມາດແຜ່ເຊື້ອໄວຣັສໄປສູ່ເດັກນຳດັນໄດ້ບໍ່
ນີ້ຍັງເປັນປິດສະໜາຂໍ້ໜຶ່ງກ່ຽວກັບໄວຣັສໂຄໂຣນາສາຍພັນໃໝ່ ຍັງບໍ່ຊັດເຈນວ່າຜູ້ຕິດເຊື້ອຄົນໜຶ່ງທີ່ມີອາການບໍ່ໜັກ ຫລື ບໍ່ມີອາການ ບໍ່ວ່າຈະອາຍຸເທົ່າໃດ ມີທ່າອ່ຽງແຜ່ເຊື້ອຊໍ່າໃດ.
ເຮົາຈະເຂົ້າໃຈເລື່ອງນີ້ໄດ້ດ້ວຍການກວດແອນຕິບໍດີ ເພື່ອເບິ່ງວ່າໃຜແດ່ໃນໝູ່ປະຊາກອນທີ່ເຄີຍຕິດເຊື້ອໄວຣັສມາ ແລະ ສ້າງຄວາມເຂົ້າໃຈວ່າພວກເຂົາໄປຕິດເຊື້ອມາໄດ້ແນວໃດ.
ຢູນິເວີຊິຕີ ຄໍເລດ ລອນດອນ ໄດ້ຂໍ້ສະຫລຸບຈາກຫລັກຖານທີ່ມີວ່າເດັກມີທ່າອ່ຽງຕິດໄວຣັສໂຄໂຣນາສາຍພັນໃໝ່ໜ້ອຍກວ່າຜູ້ໃຫຍ່ເຄິ່ງໜຶ່ງ.
ກຸ່ມທີ່ປຶກສາດ້ານວິທະຍາສາດເພື່ອສະຖານະການສຸກເສີນ (Scientific Advisory Group for Emergencies) ຂອງລັດຖະບານສະຫະຣາຊະອານາຈັກ ບອກວ່າ: ມີຫລັກຖານພໍສົມຄວນທີ່ຊີ້ວ່າ ເດັກມີທ່າອ່ຽງຕິດເຊື້ອ ແລະ ແຜ່ເຊື້ອໜ້ອຍກວ່າ ແຕ່ຍັງມີຫລັກຖານບໍ່ພຽງພໍຈະສະຫລຸບໄດ້.
ການວິໄຈອັນໜຶ່ງເຊິ່ງມີການສຶກສາຜູ້ຕິດເຊື້ອຢູ່ເມືອງເຊິນເຈິ້ນຂອງຈີນໃນຕົ້ນປີຊີ້ວ່າ: ເດັກມີທ່າອ່ຽງຕິດເຊື້ອເທົ່າກັບຜູ້ໃຫຍ່ ເຮັດໃຫ້ເກີດຄວາມກັງວົນວ່າເດັກອາດແຜ່ເຊື້ອໂດຍບໍ່ສະແດງອາການໄດ້. ແຕ່ການວິໄຈຫລັງຈາກນັ້ນເປັນຕົ້ນມາ ເຮັດໃຫ້ຄົນຫລຸດຜ່ອນຄວາມກັງວົນລົງ.
ການວິໄຈຫລາຍອັນທີ່ສຶກສາກຸ່ມຜູ້ຕິດເຊື້ອໃນຄອບຄົວທົ່ວປະເທດຈີນ ເຊິ່ງໃຊ້ວິທີການຕາມຮອຍຜູ້ຕິດເຊື້ອ ລະບຸວ່າ: ບໍ່ມີທ່າອ່ຽງວ່າການຕິດເຊື້ອທີ່ເກີດຂຶ້ນມາຈາກການແຜ່ເຊື້ອໂດຍເດັກນ້ອຍ.
ການສຶກສາກຸ່ມຜູ້ຕິດເຊື້ອເຂດພູແອລໃນຝຣັ່ງພົບວ່າ: ເດັກຄົນໜຶ່ງທີ່ຕິດເຊື້ອມີປະຕິສຳພັນກັບຄົນຫລາຍກວ່າ 100 ຄົນລະຫວ່າງທີ່ມີອາການ ແຕ່ບໍ່ມີໃຜທີ່ຕິດເຊື້ອຈາກເດັກຄົນນີ້.
ການວິໄຈຢູ່ໄອແລນ, ສ.ເກົາຫລີ, ເນເທີແລນ ແລະ ອິຕາລີ ພົບຫລັກຖານວ່າ ເດັກມີທ່າອ່ຽງຕິດເຊື້ອໜ້ອຍກວ່າ.
ຄວາມສ່ຽງຕໍ່ບຸກຄະລາກອນໃນໂຮງຮຽນ
ເມື່ອເດັກກັບໄປໂຮງຮຽນຫລາຍຂຶ້ນ ເທົ່າກັບວ່າຕ້ອງມີຄູເພີ່ມຂຶ້ນນຳ ແລະ ຕ້ອງມີພໍ່ແມ່ທີ່ເດີນທາງມາເພື່ອຮັບ-ສົ່ງລູກ.
ມີລາຍງານວ່າໃນປະເທດສະຫະພາບເອີຣົບ 22 ປະເທດທີ່ໃຫ້ໂຮງຮຽນກັບມາເປີດເປັນບາງສ່ວນ ບໍ່ພົບວ່າເຮັດໃຫ້ເກີດຍອດຜູ້ຕິດເຊື້ອຫລາຍຂຶ້ນ ທັງໃນໝູ່ນັກຮຽນ ແລະ ຄູ-ອາຈານ.
ຝຣັ່ງລາຍງານວ່າມີຜູ້ຕິດເຊື້ອເພີ່ມຂຶ້ນເລັກໜ້ອຍຫລັງຈາກໃຫ້ໂຮງຮຽນບາງແຫ່ງກັບມາເປີດການຮຽນການສອນ.
ເຖິງຢ່າງໃດກໍດີ, ອົງການອະນາໄມໂລກບອກວ່າ ເດັກມີທ່າອ່ຽງຕິດເຊື້ອ ແລະ ແຜ່ເຊື້ອໜ້ອຍກວ່າຜູ້ໃຫຍ່.
ເປັນຫຍັງໃຫ້ເດັກອະນຸບານ ແລະ ປະຖົມກັບໄປຮຽນກ່ອນ
ລັດຖະບານສະຫະຣາຊະອານາຈັກຢາກໃຫ້ເດັກນັກຮຽນຊັ້ນອະນຸບານ, ປ.1 ແລະ ປ.6 ກັບໄປຮຽນກ່ອນເພາະວ່າ:
- ເດັກຊັ້ນຮຽນປີເຫລົ່ານີ້ມີຄວາມຕ້ອງການດ້ານການສຶກສາທີ່ສຳຄັນ
- ເດັກອາຍຸນ້ອຍມີທ່າອ່ຽງຕິດເຊື້ອໜ້ອຍກວ່າຖ້າຕິດເຊື້ອ
- ເດັກໃຫຍ່ກວ່າມີທ່າອ່ຽງຈະໄປມີປະຕິສຳພັນກັບຄົນອື່ນໆຫລາຍກວ່າ ແລະ ຈະຍິ່ງສ່ຽງແຜ່ເຊື້ອ
- ເດັກໃຫຍ່ກວ່າມັກຈະຮຽນໜັງສືຢູ່ເຮືອນໄດ້ດີກວ່າ.
ລັດຖະບານສະຫະຣາຊະອານາຈັກບອກວ່າ: ນັບແຕ່ວັນທີ 15 ມິຖຸນາ ຈະໃຫ້ນັກຮຽນຊັ້ນ ມ.4 ແລະ ມ.6 ກັບໄປຮຽນ. ເຖິງຢ່າງໃດກໍດີ ຈະໃຫ້ເດັກຈຳນວນ 1 ໃນ 4 ໄປໂຮງຮຽນເທົ່ານັ້ນໃນແຕ່ລະຄັ້ງ ແລະ ລັດຖະບານຍັງບໍ່ໄດ້ຕັດສິນໃຈວ່າຈະໃຫ້ນັກຮຽນຊັ້ນປະຖົມກັບໄປຮຽນພ້ອມກັນທັງໝົດເມື່ອໃດ.
