ມາດຕະການຕ້ານ ແລະ ຫລຸດຜ່ອນຄວັນຢາສູບ
ວິເສດ ສະແຫວງສຶກສາ
ວັນທີ 31 ພຶດສະພາຂອງທຸກໆປີ ໄດ້ຈັດໃຫ້ເປັນວັນຫ້າມສູບຢາ (No Somking Day ຫລື No Tabacco Day) ສາກົນ ເພື່ອໃຫ້ຊາວໂລກໄດ້ທົບທວນຫວນເຖິງໄພອັນຕະລາຍຈາກຢາສູບ ບໍ່ວ່າຈະເປັນຜູ້ສູບເອງ ຫລື ຜູ້ສູບມືສອງທີ່ໄດ້ຮັບຜົນກະທົບຈາກຄວັນຢາສູບຂອງຄົນອື່ນ. ໃນບັນຍາກາດປິ່ນອ້ອມວັນທີ່ມີຄວາມສຳຄັນຕໍ່ສຸຂະພາບຂອງຄົນໃນທົ່ວໂລກນີ້ ຜູ້ຂຽນມີເລື່ອງຍິກໆຍ່ອຍໆຈາກບາງປະເທດກ່ຽວກັບມາດຕະການຕ້ານໄພອັນຕະລາຍຈາກທາດນິໂກຕິນ ເຊັ່ນການຫ້າມສູບຢາຢູ່ຕາມລະບຽງເຮືອນທີ່ສະຫະພັນລັດເຊຍ ແລະ ອົດສະຕຣາລີ. ສຳລັບຢູ່ລັດເຊຍນັ້ນ ກົດໝາຍຫ້າມສູບຢາຕາມລະບຽງເຮືອນ ບໍ່ວ່າຈະເປັນເຮືອນຂອງຕົນເອງ, ເຮືອນລວມໝູ່ ກໍຄືໂຮງແຮມ ໄດ້ເລີ່ມມີຜົນສັກສິດແຕ່ວັນທີ 1 ກັນຍາ ປີ 2019 ເປັນຕົ້ນມາ. ກົດໝາຍມີສອງຈຸດປະສົງຄວບຄູ່ກັນຄື: ເພື່ອປ້ອງກັນບໍ່ໃຫ້ຄວັນຢາປິວໄປເຖິງເຮືອນຄົນອື່ນ ຫລື ຜູ້ທີ່ອາໄສຢູ່ຊັ້ນອື່ນໆຂອງຕຶກ (ສຳລັບຕຶກຫລາຍຊັ້ນ), ຈຸດປະສົງອັນທີສອງ ກໍຄືເພື່ອປ້ອງກັນບໍ່ໃຫ້ເກີດອັກຄີໄພຈາກການຖິ້ມກິດກອກຢາຊະຊາຍ. ສະຖິຕິຂອງລັດເຊຍໃນຊຸມປີຜ່ານມາຊີ້ອອກວ່າ: ອັກຄີໄພທີ່ເກີດຂຶ້ນປະມານ 60% ແມ່ນມາຈາກກິດກອກຢາທີ່ຖິ້ມຊະຊາຍ. ສຳລັບປີ 2019 ປີດຽວ ຢາສູບໄດ້ກໍ່ໃຫ້ເກີດເຫດໄຟໄໝ້ຢູ່ຕາມລະບຽງເຮືອນຈຳນວນຫລາຍກວ່າ 2.000 ຄັ້ງ (ໜັງສືພິມຜູ້ແທນປະຊາຊົນ ອາທິດຕົ້ນເດືອນຕຸລາ 2019) ຢູ່ອົດສະຕຣາລີກ່ອນນີ້ 5 ປີ ກໍມີຂ່າວອອກກ່ຽວກັບການຢັ່ງຫາງສຽງຢູ່ລັດຄວີນສະແລນ (Queensland) ອົດສະຕຣາລີ ກ່ຽວກັບແຜນປະກາດຫ້າມສູບຢາຢູ່ຕາມລະບຽງເຮືອນ. ການຄົ້ນຄວ້າຂອງອົງການປົກຄອງລັດ Queensland ໄດ້ໃຫ້ຮູ້ວ່າ: ຄວັນຢາຈາກລະບຽງເຮືອນນັ້ນສາມາດປິວໄປໄກກວມເອົາທີ່ພັກຫລາຍຫລັງໃນຄຸ້ມ ເປັນເຫດໃຫ້ຫລາຍຄົວເຮືອນຕ້ອງໄດ້ອັດປະຕູປ່ອງຢ້ຽມ ເພື່ອສະກັດກັ້ນຄວັນຢາສູບ. ສຳລັບເຮືອນລວມໝູ່ທີ່ມີຫລາຍຊັ້ນກໍຍິ່ງຜະເຊີນກັບຄວາມສ່ຽງສູງ ເພາະຄວັນຢາສາມາດລ່ອງລອຍກວມເອົາຫລາຍຊັ້ນຂອງຕຶກ.
ສະພາຄົ້ນຄວ້າກ່ຽວກັບພະຍາດມະເຮັງຂອງອົດສະຕຣາລີ ໄດ້ໃຫ້ຕົວເລກທີ່ໜ້າຢ້ານກົວວ່າ: ຜົນກະທົບຈາກຄວັນຢາສູບຂອງຄົນອື່ນນັ້ນໄດ້ສ້າງຄວາມສ່ຽງເປັນພະຍາດມະເຮັງເຖິງ 30%. ເລື່ອງຕໍ່ໄປແມ່ນກ່ຽວກັບມາດຕະການຫ້າມສູບຢາໃນສະຖານທີ່ທ່ອງທ່ຽວຢູ່ນະຄອນຫລວງຮ່າໂນ້ຍ ຫວຽດນາມ ແລະ ນະຄອນສຽມລຽບ ກຳປູເຈຍ. ຢູ່ນະຄອນຫລວງຮ່າໂນ້ຍ, ຂ່າວຕ່າງປະເທດໃນວັນທີ 7 ຕຸລາ 2019 ໃຫ້ຮູ້ວ່າ: ທາງການຫວຽດນາມໄດ້ກຳນົດໃຫ້ 30 ຈຸດທ່ອງທ່ຽວສຳຄັນພາຍໃນນະຄອນຫລວງຮ່າໂນ້ຍເປັນເຂດປອດຄວັນຢາສູບ, ໃນນັ້ນ ລວມມີເຂດວິຫານຫງອກເຊີນ, ບ່າກ້ຽວ, ຫໍພິພິທະພັນປະຕິວັດ, ວັດກວນສື້, ໂຮງລະຄອນໃຫຍ່, ຫໍສະໝຸດແຫ່ງຊາດ ແລະ ອື່ນໆ. ໃນບັນດາເຂດຫ້າມເຫລົ່ານີ້ ຖ້າໃຜລະເມີດກໍຈະຖືກປັບໄໝ. ສໍາລັບຢູ່ກຳປູເຈຍນັ້ນ, ສຽມລຽບ-ນະຄອນດາວດວງເດັ່ນດ້ານການທ່ອງທ່ຽວທີ່ລືຊື່ໄປທົ່ວໂລກ ກໍໄດ້ມີຂະບວນປຸກລະດົມ ເພື່ອໃຫ້ກາຍເປັນຕົວເມືອງປອດຢາສູບເຊັ່ນກັນ ແນໃສ່ສ້າງສິ່ງແວດລ້ອມທີ່ດີ ເພື່ອສຸຂະພາບຂອງຊາວນະຄອນ ແລະ ເພີ່ມມົນສະເໜ່ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ. ສຽມລຽບ ແມ່ນນະຄອນທີ່ຕັ້ງຢູ່ເຂດປູສະນິຍະສະຖານອັນລືລັ່ນຂອງໂລກ ເຊັ່ນອັງກໍວັດ, ອັງກໍທົມ ຕຣາປົມ ແລະ ອື່ນໆ ເຊິ່ງເປັນໜຶ່ງໃນສິ່ງມະຫັດສະຈັນຂອງໂລກ.
