ປກສ ນະຄອນຫລວງຈັບຕົວຜູ້ຂາຍເລກເຖື່ອນມາດຳເນີນຄະດີ

ຫົວໜ້າຫ້ອງຕຳຫລວດ ປກສ ນະຄອນຫລວງວຽງຈັນ ໃຫ້ຮູ້ວ່າ: ໃນວັນທີ 27 ພຶດສະພາຜ່ານມານີ້ ໄດ້ຮັບແຈ້ງຄວາມຈາກພົນລະເມືອງດີວ່າມີຄົນຂາຍເລກເຖື່ອນ (ເລກໄທ ແລະ ເລກຫວຽດນາມ) ແບບຈົດ ຢູ່ເຂດບ້ານດົງໂດກ ເມືອງໄຊທານີ ນະຄອນຫລວງວຽງຈັນ.

ມາຮອດເວລາປະມານ 13:30 ໂມງ ຂອງວັນດຽວກັນເຈົ້າໜ້າທີ່ສະເພາະກິດໄດ້ລົງກວດກາສະຖານທີ່ດັ່ງກ່າວ ພົບເຫັນເປົ້າໝາຍກຳລັງຂາຍເລກດັ່ງກ່າວແທ້, ຈຶ່ງໄດ້ນໍາຕົວຂຶ້ນຫ້ອງຕຳຫລວດ ພ້ອມຂອງກາງ ໃບສະຫລາກກິນແບ່ງຂອງລັດຖະບານໄທ, ກາຈ້ຳ ແລະ ອຸປະກອນໃນການຂາຍ.

ຊຶ່ງຜ່ານການສືບສວນສອບສວນ ຮູ້ວ່າ: ຜູ້ຕ້ອງຫາດັ່ງກ່າວມີຊື່ວ່າ: ນາງ ຂັນຄຳ ອາຍຸ 40 ປີ, ອາຊີບຄ້າຂາຍ, ຢູ່ບ້ານດົງໂດກ ເມືອງໄຊທານີ ຜູ້ກ່ຽວຍອມຮັບສາລະພາບວ່າ: ຜ່ານມາໄດ້ຂາຍທັງເລກໄທ ແລະ ເລກຫວຽດນາມແບບຈົດ, ຊຶ່ງໄດ້ສັ່ງຊື້ເລກໄທຢູ່ແຂວງອຸດອນ; ສໍາລັບເລກຫວຽດນາມ ແມ່ນໄດ້ຂຽນເວລາເລກອອກໃສ່ບິນໃຫ້ລູກຄ້າພ້ອມ ແລະ ໄດ້ຂຽນຄຳວ່າແດງ ໝາຍເຖິງລາງວັນທາງເທິງ ແລະ ຂຽນຄຳດຳ ໝາຍເຖິງລາງວັນທາງລຸ່ມ ແລະ ໄດ້ຈ້ຳກາ ວັນທີ, ເດືອນ, ປີ ໃສ່ບິນ ແລ້ວໃຫ້ລູກຄ້າໂດຍບໍ່ໄດ້ຮັບອະນຸຍາດຈາກລັດຖະບານ.

ພ້ອມນີ້ເຫັນວ່າຜູ້ກ່ຽວມີເຈຕະນາຂາຍເລກເຖື່ອນແທ້, ເຊິ່ງໄດ້ເຄື່ອນໄຫວຂາຍເລກເຖື່ອນມາໄດ້ 2 ປີກວ່າແລ້ວ ແລະ ຜ່ານມາກໍຖືກເຈົ້າໜ້າທີ່ນຳຕົວມາສຶກສາອົບຮົມແລ້ວ 2 ຄັ້ງຄື: ໃນວັນທີ 15 ຕຸລາ 2019 ແລະ ໃນວັນທີ 25 ກຸມພາ 2020, ແຕ່ຜູ້ກ່ຽວບໍ່ເຄັດລາ ສະນັ້ນ, ເຈົ້າໜ້າທີ່ຈະໄດ້ດໍາເນີນຄະດີຕາມລະບຽບກົດໝາຍ.