ຍ້ອນຂາດຄວາມເປັນເຈົ້າການໃນການ ຮັກສາອະນາໄມສິ່ງແວດລ້ອມຈິ່ງເຮັດໃຫ້ ໄຂ້ຍຸງລາຍລະບາດເປັນວົງກວ້າງ

ປັດຈຸບັນການແຜ່ລະບາດຂອງພະຍາດໄຂ້ຍຸງລາຍຢູ່ປະເທດເຮົາໄດ້ຂະຫຍາຍເປັນວົງກວ້າງ ແລະ ຍັງມີທ່າອ່ຽງເພີ່ມຂຶ້ນເລື້ອຍໆ. ເຖິງວ່າຂະແໜງການກ່ຽວຂ້ອງໄດ້ເອົາໃຈໃສ່ໃນການປ້ອງກັນ ແລະ ຄວບຄຸມພະຍາດດັ່ງກ່າວດ້ວຍຫລາຍວິທີການ ໂດຍສະເພາະແມ່ນການສຸມໃສ່ເຮັດວຽກງານໂຄສະນາສຸຂະ ສຶກສາ ແລະ ປຸກລະດົມໃຫ້ອຳນາດການປົກຄອງ ແລະ ປະຊາຊົນມີຄວາມຮັບຮູ້ ແລະ ເຂົ້າໃຈກ່ຽວກັບຜົນຮ້າຍ, ວິທີການປ້ອງກັນ ແລະ ສະກັດກັ້ນການແຜ່ການລະບາດຂອງພະຍາດນີ້ ໂດຍສະເພາະແມ່ນການເຮັດວຽກງານຮັກສາອະນາໄມສິ່ງແວດລ້ອມ, ທຳລາຍແຫລ່ງເພາະພັນຂອງຍຸງລາຍ ແລະ ການປະຕິບັດຫລັກການນອນຕ້ອງກາງມຸ້ງ, ແຕ່ຜ່ານການຈັດຕັ້ງປະຕິບັດຍັງເຫັນວ່າບໍ່ມີປະສິດທິຜົນເທົ່າທີ່ຄວນ, ປະຊາຊົນຈຳນວນໜຶ່ງຍັງຖືເບົາ ແລະ ຂາດສະຕິໃນການເຮັດວຽກງານດັ່ງກ່າວ ຈຶ່ງເຮັດໃຫ້ການລະບາດຂອງໄຂ້ຍຸງລາຍບໍ່ມີທ່າອ່ຽງທີ່ຈະຫລຸດລົງ, ຍິ່ງໄປກວ່ານັ້ນ ຍັງເຮັດໃຫ້ຕົວເລກຂອງຜູ້ຕິດເຊື້ອພະຍາດດັ່ງກ່າວເພີ່ມຂຶ້ນ ແລະ ການປະຕິບັດມາດຕະການ 5 ປ ຂອງປະຊາຊົນຍັງບໍ່ທັນເປັນຂະບວນຟົດຟື້ນ ແລະ ຍັງຖືເບົາໃນການເຮັດອະນາໄມເຮືອນຊານບ້ານຊ່ອງຂອງຕົນ.

ກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ລາຍງານໃຫ້ຮູ້ວ່າ: ມາຮອດປັດຈຸບັນຕົວເລກກໍລະນີຜູ້ຕິດເຊື້ອໄຂ້ຍຸງລາຍພຽງ 5 ເດືອນ ມີຫລາຍເຖິງ 1.382 ກໍລະນີ ແລະ ເສຍຊີວິດ 4 ກໍລະນີ ເຊິ່ງຮ້າຍແຮງກວ່າໝູ່ແມ່ນຢູ່ນະຄອນຫລວງວຽງຈັນມີ 355 ກໍລະນີ ແລະ ເສຍຊີວິດແລ້ວ 2 ຄົນ, ຮອງລົງມາແມ່ນແຂວງອັດຕະປືມີ 192 ກໍລະນີ, ວຽງຈັນ 187 ກໍລະນີ, ຄຳມ່ວນ 118 ກໍລະນີ, ບໍລິຄຳໄຊ 113 ກໍລະນີ, ສະຫວັນນະເຂດ 92 ກໍລະນີ, ສາລະວັນ 88 ກໍລະນີ, ໄຊຍະບູລີ 80 ກໍລະນີ, ເຊກອງ 47 ກໍລະນີ, ຫລວງນໍ້າທາ 29 ກໍລະນີ, ອຸດົມໄຊ ແລະ ໄຊສົມບູນ ແຂວງລະ 25 ກໍລະນີ, ຫລວງພະບາງ 13 ກໍລະນີ, ຈຳປາສັກ 7 ກໍລະນີ, ບໍ່ແກ້ວ 6 ກໍລະນີີ ແລະ ແຂວງຜົ້ງສາລີ 5 ກໍລະນີ ຊຶ່ງທັງຫມົດມີຜູ້ເສຍຊີວິດ 2 ກໍລະນີ.  ສໍາລັບແຂວງຊຽງຂວາງ ແລະ ຫົວພັນຍັງບໍ່ພົບກໍລະນີຜູ້ຕິດເຊື້ອໄຂ້ດັ່ງກ່າວ.

ດັ່ງນັ້ນຈຶ່ງຂໍຮຽກຮ້ອງໃຫ້ພ້ອມກັນເອົາໃຈໃສ່ທຳລາຍແຫລ່ງເພາະພັນຂອງຍຸງລາຍກຳຈັດພາຊະນະທີ່ມີນໍ້າອັ່ງຂັງຢູ່ຕາມບ້ານເຮືອນຂອງໃຜລາວ ເພື່ອບໍ່ໃຫ້ຍຸງລາຍມີບ່ອນວາງໄຂ່ ແລະ ປະຕິບັດຫລັກການ 5 ປ ໃຫ້ເຂັ້ມງວດດ້ວຍການໃກ້ຊິດຕິດແທດຂອງຂະແໜງສາທາລະນະສຸກໃນການແນະນຳຈັດຕັ້ງປະຕິບັດຕົວຈິງກໍຈະເຮັດໃຫ້ການສະກັດກັ້ນພະຍາດນີ້ມີປະສິດທິຜົນສູງຂຶ້ນ.