ກອງປະຊຸມພາກທຸລະກິດຈີນ-ອາຊຽນ ຄັ້ງທີ 1 ເນັ້ນຫາລືການຄ້າ ແລະ ການລົງທຶນເປັນຫລັກ
ກອງປະຊຸມພາກທຸລະກິດ ຈີນ-ອາຊຽນ ຄັ້ງທີ 1 (The1st China-Southeast Asia Business Forum), ໄດ້ຈັດຂຶ້ນໃນຕອນເຊົ້າຂອງວັນທີ 13 ມິຖຸນາ ນີ້ ທີ່ຄຸນໝິງ ສປ ຈີນ ເຊິ່ງມີບັນດາຜູ້ປະກອບການຂອງ 10 ປະເທດອາຊຽນ ແລະພາກທຸລະກິດຈີນ ເຂົ້າຮ່ວມ, ໂດຍກອງປະຊຸມດັ່ງກ່າວ ໄດ້ເນັ້ນຫາລືຮ່ວມກັນໃນຂົງເຂດການຄ້າ ແລະ ການລົງທຶນ ເພື່ອແນໃສ່ສ້າງໃຫ້ອາຊຽນ-ຈີນ ມີຄວາມເຂັ້ມແຂງທາງດ້ານອຸດສາຫະກຳ ໃນຍຸກເຊື່ອມໂຍງ.
ທ່ານ ນາງ ຢັງ ສຽວ ຜິງ (Yang Xiu Ping) ເລຂາທິການສູນການຮ່ວມມື ຈີນ-ອາຊຽນ (China-Asian Center ຫລື ACC) ກ່າວວ່າ: ກອງປະຊຸມນີ້, ພວກເຮົາຈະໄດ້ຮັບຟັງລາຍງານຈາກບັນດາຜູ້ຕາງໜ້າຂອງແຕ່ລະປະເທດ ແລະ ມີການປຶກສາຫາລືຮ່ວມກັນ ເພື່ອສ້າງຄວາມເຂັ້ມແຂງທາງດ້ານການຄ້າ-ການລົງທຶນສອງຝ່າຍ (ຈີນ-ອາຊຽນ) ໃຫ້ມີຄວາມໜັກແໜ້ນ ແນໃສ່ສົ່ງເສີ່ມການພັດທະນາເສດຖະກິດຂອງບັນດາປະເທດອາຊຽນ ເຕີບໃຫຍ່ຂະຫຍາຍຕົວຍິ່ງຂຶ້ນ. ສຳລັບຫົວຂໍ້ ທີ່ຈະຫາລືກັນໃນຄັ້ງນີ້ ປະກອບມີ: ການຮ່ວມມືທາງດ້ານພະລັງງານ, ຂົງເຂດອຸດສາຫະກຳ, ການຮ່ວມມື ລະຫວ່າງພາກທຸລະກິດດ້ວຍກັນ ການແລກປ່ຽນ ແລະ ການສະໜອງຂໍ້ມູນ-ຂ່າວສານ ເພື່ອເຮັດໃຫ້ພາກທຸລະກິດໄດ້ມີທາງເລືອກໃນການລົງທຶນ ແລະການເປັນຄູ່ຄ້າຮ່ວມກັນຂອງຂະແໜງການຕ່າງໆໃນຍຸກຂອງການເຊື່ອມໂຍງນີ້, ພ້ອມເປີດໂອກາດ ໃຫ້ຜູ້ປະກອບການແຕ່ລະປະເທດໄດ້ມີການຈັບຄູ່ທຸລະກິດ ໂດຍສະເພາະແມ່ນນັກທຸລະກິດຈີນ ກັບ ບັນດາປະເທດອາຊຽນ. ຄຽງຄູ່ກັນນັ້ນ, ພາກລັດຂອງແຕ່ລະປະເທດ ກໍຈະໄດ້ມີການຫາລືຮ່ວມກັນຊຸກຍູ້ສົ່ງເສີມໃຫ້ທຸລະກິດຈາກຈີນ ໄປລົງ ທຶນໂດຍກົງ ຫລື ຮ່ວມລົງທຶນກັບຜູ້ປະກອບການໃນ 10 ປະເທດອາຊຽນຫລາຍຂຶ້ນ.
ໂອກາດດຽວກັນ, ທ່ານ ຮອງປະທານ ສະມາຄົນອຸດສາຫະກໍາ (ສຄອ) ແຫ່ງຊາດລາວ ໄດ້ນຳສະເໜີ ພາບລວມຂອງທຸລະກິດລາວ ແລະ ການຮ່ວມມືກັບຕ່າງປະເທດ ໂດຍສະເພາະແມ່ນທ່າແຮງຂອງລາວ, ເປັນຕົ້ນ ແມ່ນການລົງທຶນໃນຂະແໜງພະລັງງານ, ບໍ່ແຮ່, ກະ ສິກຳ, ລະບົບໂລຈິສຕິກ, ຂະແໜງການຄ້າ, ການຂົນສົ່ງລະຫວ່າງປະເທດ ຫລື ການເຊື່ອມຕໍ່ໄປຍັງປະເທດທີ3, ເຊິ່ງໄລຍະຜ່ານມາກໍ ມີນັກທຸລະກິດຈາກອາຊຽນ ແລະ ຈີນ ມາລົງທຶນໃນລາວຫລາຍຮ້ອຍໂຄງການອັນໄດ້ ປະກອບສ່ວນເຮັດໃຫ້ຈີດີພີ ຂອງລາວຂະຫຍາຍຕົວຕໍ່ເນື່ອງ.
ທ່ານກ່າວຕື່ມວ່າ: ປັດຈຸບັນ ສປປ ລາວ ໄດ້ມີການຈັດເຂດເສດຖະກິດພິເສດ ແລະ ເສດຖະກິດສະເພາະ ເພື່ອເປັນບ່ອນລົງທຶນຂອງຕ່າງປະເທດ ເຊັ່ນ: ເຂດເສດຖະກິດສະເພາະບຶງທາດຫລວງ, ເຂດພັດທະ ນາກວມລວມໄຊເສດຖາ, ເສດຖະກິດພິເສດສາມຫລ່ຽມຄຳ ແລະ ອື່ນໆ ທີ່ມີນັກທຸລະກິດ ຈາກຈີນ ແລະ ປະເທດອາຊຽນ ໄປຮ່ວມລົງທຶນເປັນຈໍານວນຫລາຍ.
ໃນໂອກາດດຽວກັນທ່ານ ຮອງປະທານສະຖາບັນວິໄຈ ແລະ ການພັດທະນາ ແຂວງຢຸນນານ ໄດ້ມີຄໍາເຫັນວ່າ: ສິ່ງທີ່ໜ້າສົນໃຈລົງທຶນໃນລາວ ແມ່ນຂະ ແໜງການຂົນສົ່ງທາງອາກາດ ເນື່ອງຈາກວ່າການຂົນສົ່ງທາງອາກາດ ຍັງມີທ່າແຮງຂະຫຍາຍຕົວໃນອະນາຄົດ ແລະ ຕະຫລາດສ່ວນແບ່ງກໍ່ຍັງມີຢູ່ ເຊິ່ງສາຍການບິນຂອງລາວ ຍັງບໍ່ທັນມີທາງເລືອກທີ່ຫລາກຫລາຍເທົ່າທີຄວນ ແລະ ສປປ ລາວ ກໍເປັນປະເທດໃຈກາງທີ່ມີຊາຍແດນຕິດຈອດກັບ 5 ປະເທດ ລວມທັງ ສປ ຈີນ. ໄລຍະຜ່ານມານັກລົງທຶນຈາກຈີນໄປລົງທຶນໃນລາວ ມີຫລາຍຮ້ອຍໂຄງການເປັນຕົ້ນ ແມ່ນຂະແໜງອຸດສາຫະກຳ, ກະສິກຳ, ສູນການຄ້າ, ໂຮງແຮມ ແລະ ທ່ອງທ່ຽວ, ແຕ່ຂະແໜງການຂົນສົ່ງທາງອາກາດແມ່ນຍັງບໍ່ທັນມີ. ສະນັ້ນ ຈຶ່ງເປັນອີກທາງເລືອກໜຶ່ງທີ່ນັກທຸ ລະກິດຈີນ ຄວນເຂົ້າໄປລົງທຶນໃນດ້ານນີ້.
