ສະພາບັນດິດວິທະຍາສາດ ແລະ ເຕັກໂນໂລຊີຫວຽດນາມ ມອບສານເຄມີ ຜະລິດນ້ຳຢາ ໃຫ້ກະຊວງວິທະຍາສາດ ແລະ ເຕັກໂນໂລຊີ ສປປ ລາວ
ໃນວັນທີ 22 ພຶດສະພາ 2020 ຢູ່ທີ່ສະຖານເອກອັກຄະລັດຖະທູດ ສປປ ລາວ ປະຈຳ ສສ ຫວຽດນາມ ໄດ້ມີພິທີມອບ-ຮັບເຄື່ອງຊ່ວຍເຫລືອ ຈາກສະພາບັນດິດວິທະຍາສາດ ແລະ ເຕັກໂນໂລຊີຫວຽດນາມ. ກ່າວມອບໂດຍ ທ່ານ ເຈີ່ນ ຕ່ວນແອງ ຮອງຫົວໜ້າສະພາບັນດິດວິທະຍາສາດ ແລະ ເຕັກໂນໂລຊີ ສສ.ຫວຽດນາມ ແລະ ກ່າວຮັບໂດຍ ທ່ານ ແສງເພັດ ຮຸ່ງບຸນຍວງ ເອກອັກຄະລັດຖະທູດ ວິ ສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ພ້ອມດ້ວຍພະນັກງານທັງສອງຝ່າຍເຂົ້າຮ່ວມ ເປັນສັກຂີພິຍານ.
ເຄື່ອງຊ່ວຍເຫລືອໃນຄັ້ງນີ້, ມີສານເຄມີ ພ້ອມດ້ວຍອຸປະກອນການຜະລິດນ້ຳຢາລ້າງມືແຫ້ງ ປະ ກອບມີ: ຜະລິດຕະພັນເຫລົ້າ90 ຈໍານວນ 5.000 ລີດ ພ້ອມດ້ວຍທາດປະສົມອື່ນໆອີກ 4 ຊະນິດ ແລະ ກະຕຸກຢາງຂະໜາດ 500 ml 1.200 ອັນ, ເພື່ອສົ່ງຕໍ່ໄປຍັງກະຊວງວິທະຍາສາດ ແລະ ເຕັກໂນໂລຊີຂອງລາວ ເພື່ອການຜະລິດນ້ຳຢາລ້າງມືແຫ້ງ ຕ້ານພະຍາດໂຄວິດ-19 ຢູ່ ສປປ ລາວ. ເຖິງວ່າແມ່ນວ່າ ສສ.ຫວຽດນາມ ຍັງປະສົບກັບຄວາມຍຸ້ງຍາກຫລາຍປະການ ໂດຍສະເພາະການຟື້ນຟູເສດຖະກິດທີ່ຖຶກກະ ທົບຈາກການລະບາດພະຍາດໂຄວິດ-19 ທີ່ຫາກໍ່ຄວບຄຸມໄດ້ບໍ່ດົນມານີ້, ແຕ່ບົນຈິດໃຈການພົວພັນມິດຕະ ພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ, ກໍ່ຄື ນ້ຳໃຈສາກົນກຳມະຊີບອັນສູງສົງຂອງຕົນ ລັດຖະບານ ແລະ ປະຊາຊົນຫວຽດນາມ ໂດຍສະເພາະສະພາບັນດິດ ວິທະຍາສາດ ແລະ ເຕັກໂນໂລຊີຫວຽດນາມ ຍັງໄດ້ບິແບ່ງວັດຖຸປັດໄຈມາຊ່ວຍລັດຖະບານ ກໍ່ຄື ປະຊາຊົນລາວ ໂດຍສະເພາະກະຊວງວິທະຍາສາດ ແລະ ເຕັກໂນໂລຊີໃນການຕ້ານພະຍາດໂຄວິດ-19.
ໃນໂອກາດກ່າວຮັບເຄື່ອງຊ່ວຍເຫລືອດັ່ງກ່າວ, ທ່ານ ແສງເພັດ ຮຸ່ງບຸນຍວງ ໄດ້ສະແດງຄວາມຮູ້ບຸນຄຸນ ແລະ ຂອບອົກຂອບໃຈຢ່າງຈິງໃຈ ມາຍັງສະພາບັນດິດວິທະຍາສາດ ແລະ ເຕັກໂນໂລຊີຫວຽດນາມ, ພັກ, ລັດຖະບານ ແລະ ປະຊາຊົນຫວຽດນາມ ທີ່ມອບເຄື່ອງຊ່ວຍເຫລືອດັ່ງກ່າວ ໃຫ້ແກ່ ສປປ ລາວ ພ້ອມຢືນຢັນວ່າ ອຸປະກອນທີ່ໄດ້ຮັບການຊ່ວຍເຫລືອຄັ້ງນີ້ ຈະສົ່ງຕໍ່ໄປຍັງກະຊວງວິທະຍາ ສາດ ແລະ ເຕັກໂນໂລຊີຂອງລາວ ເພື່ອຜະລິດນ້ຳຢາລ້າງມືແຫ້ງຮັບໃຊ້ສັງຄົມ ເພື່ອນຳໃຊ້ເຂົ້າໃນການສະກັດກັ້ນ ແລະ ຕ້ານພະຍາດໂຄວິດ-19 ຢູ່ ສປປ ລາວ ຢ່າງມີປະສິດທິຜົນສູງ.
