‘WHO’ ຍົກເລີກທົດລອງໃຊ້ຢາຕ້ານ ມາລາເຣຍປິ່ນປົວໂຄວິດ-19
‘WHO’ ຍົກເລີກທົດລອງໃຊ້ຢາຕ້ານມາລາເຣຍປິ່ນປົວໂຄວິດ-19 ຫລັງຜົນສຶກສາພົບເພີ່ມຄວາມສ່ຽງເຖິງຊີວິດ.
ອົງການອະນາໄມໂລກ (WHO) ໂຈະການທົດລອງໃຊ້ຢາໄຮດຣອກຊີຄໍໂຣຄວິນ ຢາປິ່ນປົວມາລາເຣຍ ໃນຜູ້ຕິດເຊື້ອໂຄວິດ-19 ເນື່ອງຈາກກັງວົນດ້ານຄວາມປອດໄພ ຫລັງຈາກຜົນການສຶກສາພົບວ່າ: ຢາຊະນິດນີ້ມີສ່ວນເພີ່ມຄວາມສ່ຽງເສຍຊີວິດໃນຜູ້ຕິດເຊື້ອໄວຣັສໂຄໂຣນາສາຍພັນໃໝ່.
ທັງນີ້ WHO ເຊິ່ງວິໄຈກຸ່ມທີ່ເອີ້ນວ່າ ‘Solidarity Trial’ ຫລື ‘ການທົດລອງອັນເປັນນ້ຳໜຶ່ງໃຈດຽວກັນ’ ຂອງອົງການອະນາໄມໂລກ ເຊິ່ງເປັນໂຄງການວິໄຈທາງການແພດລະຫວ່າງປະເທດ ເພື່ອຄິດຄົ້ນ ແລະ ທົດລອງຢາຕ່າງໆທີ່ອາດໃຊ້ປິ່ນປົວໂຄວິດ-19 ໄດ້ຕັດສິນໃຈໂຈະການທົດລອງໃຊ້ຢາໄຮດຣອກຊີຄໍໂຣຄວິນໄວ້ຊົ່ວຄາວ.
ການຕັດສິນໃຈຂອງ WHO ມີຂຶ້ນຫລັງຈາກວາລະສານດ້ານການແພດແລນເຊດ ລາຍງານການສຶກສາໃນອາທິດຜ່ານມາ ບົ່ງບອກວ່າ: ການໃຊ້ຢາໄຮດຣອກຊີຄໍໂຣຄວິນໃນຜູ້ຕິດເຊື້ອໂຄວິດ-19 ອາດເພີ່ມຄວາມສ່ຽງເສຍຊີວິດໃນຜູ້ຕິດເຊື້ອເຫລົ່ານັ້ນ.
ໄຮດຣອກຊີຄໍໂຣຄວິນ ຢາປິ່ນປົວມາລາເຣຍ ທີ່ປະທານາທິບໍດີ ໂດນັລ ທຣຳ ຂອງອາເມລິກາ ແລະ ຄົນອື່ນໆ ແອບອ້າງວ່າອາດສາມາດປິ່ນປົວພະຍາດທີ່ມີຕົ້ນຕໍຈາກໄວຣັສໂຄໂຣນາສາຍພັນໃໝ່ ແລະ ຍັງບອກວ່າ: ທ່ານໃຊ້ເປັນປະຈຳ ແລະ ແນະນຳໃຫ້ຄົນອື່ນໃຊ້ນຳ.
ທ່ານ ດຣ. ໄມ ໄຣອັນ ຜູ້ອຳນວຍການຝ່າຍໂຄງການສຸກເສີນຂອງອົງການອະນາໄມໂລກ ບອກວ່າ: ການຕັດສິນໃຈໂຈະການທົດລອງໄຮດຣອກຊີຄໍໂຣຄວິນ ເປັນການດຳເນີນງານດ້ວຍຄວາມລະມັດລະວັງທີ່ສຸດ.
