ຫັນອາຊີບສ້ອມແປງ ມາປູກພືດສະບຽງອາຫານປ້ອນຕະຫລາດ ເຮັດໃຫ້ຄອບຄົວພົ້ນທຸກ

ຄອບຄົວ ທ້າວ ພູມມາ ວົງສັກດີ ອາຍຸ 42 ປີ ອາຊີບສ້ອມແປງລົດ, ຢູ່ບ້ານນາສ້ານ, ເມືອງ ບໍ່ແຕນ ແຂວງ ໄຊຍະບູລີ, ແມ່ນຄອບຄົວໜຶ່ງ ທີ່ຫັນຈາກອາຊີບສ້ອມແປງ ມາເຮັດອາຊີບປູກພືດສະບຽງອາຫານເປັນອາຊີບຕົ້ນຕໍ, ພາຍໃນຄອບຄົວມີ ທັງໝົດ 7 ຄົນ, ຍິງ 3 ຄົນ, ມີແຮງງານຕົ້ນຕໍ 2 ແຮງງານ, ເປັນຄອບຄົວທີ່ສູ້ຊົນເພື່ອເຮັດໃຫ້ຄອບຄົວຫລຸດພົ້ນອອກຈາກຄວາມທຸກຍາກ ແລະ ພັດທະນາໃຫ້ຮັ່ງມີຂຶ້ນ ແລະ ດ້ວຍຄວາມສະຫງວນມັກໃນອາຊີບການປູກພືດ ໂດຍສະເພາະການປູກພືດ, ຜັກ, ໃນນັ້ນແມ່ນສາລີຫວານ ທີ່ເປັນຄວາມຕ້ອງການຂອງຕະຫລາດທັງພາຍໃນ ແລະ ຕ່າງເມືອງ.

ທ້າວ ພູມມາ ວົງສັກດີ ໄດ້ເລົ່າສູ່ຟັງວ່າ: ໃນເບື້ອງຕົ້ນ ຄອບຄົວແມ່ນເຮັດອາຊີບສ້ອມແປງລົດຂະໜາດນ້ອຍ ແຕ່ລາຍຮັບບໍ່ກຸ້ມລາຍຈ່າຍ, ຕໍ່ມາຈຶ່ງໄດ້ເຮັດກິດຈະການບໍລິການສີເຂົ້າ, ປູກໄມ້ໃຫ້ໝາກ, ລ້ຽງໝູພັນເນື້ອ ເປັນອາຊີບສໍາຮອງ, ມາຮອດ ປີ 2014 ກໍ່ໄດ້ຫັນມາປູກພືດຢ່າງຈິງຈັງ ດ້ວຍການນຳໃຊ້ພື້ນທີ່ຂ້າງທົ່ງນາຂອງຕົນ ທີ່ຕິດກັບແຄມນ້ຳຮອຍ, ຊຶ່ງມີເນື້ອທີ່ 0,16 ເຮັກຕາ ໃນເບື້ອງຕົ້ນແມ່ນປູກສາລີຫວານ, ຖົ່ວດິນ ໜູນວຽນກັນໄປ ແລະ ສົ່ງຂາຍຕະຫລາດແບບເຄິ່ງສຳເລັດຮູບ (ຂາຍດິບ) ເຫັນວ່າໄດ້ຂາຍດີ, ມາຮອດປີ 2016 ຈຶ່ງໄດ້ຕັດສິນໃຈ ຂະຫຍາຍເນື້ອທີ່ການປູກຂອງຕົນ ເຊິ່ງຫັນຈາກເນື້ອທີ່ນາບາງສ່ວນ ແລະ ພື້ນທີ່ຫວ່າງຈາກແຄມສວນ ເພີ່ມເປັນ 0,80 ເຮັກຕາ ດ້ວຍການປູກແບບປະສົມປະສານ ແລະ ນໍາໃຊ້ເຕັກນິກແບບໃໝ່ເຂົ້າຊ່ວຍ ດ້ວຍການແບ່ງເນື້ອທີ່ອອກເປັນລ໋ອກ ເພື່ອໃຫ້ປູກພືດຜັກ ເປັນຮອບວຽນກັນໄປ ເຊັ່ນ: ສາລີຫວານ, ໝາກແຕງ, ຖົ່ວຝັກຍາວ, ກະລ່ຳປີ ແລະ ອື່ນໆ ສາມາດເກັບກູ້ໄດ້ຕະຫລອດປີ ແລະ ເຫັນວ່າໄດ້ຮັບຜົນຜະລິດດີ ແລະ ມີຄຸນນະພາບ,  ສາມາດຕອບສະໜອງໃຫ້ຕະຫ]າດພາຍໃນເມືອງ ແລະ ຕ່າງເມືອງ. ຕໍ່ມາກໍ່ໄດ້ຍົກລະດັບຈາກການສົ່ງຂາຍສາລີຫວານ ແບບເຄິ່ງສຳເລັດຮູບ (ສາລີດິບ) ມາເປັນສຳເລັດຮູບ (ຕົ້ມສຸກ) ຂາຍຕາມຄວາມຕ້ອງການຂອງລູກຄ້າ ແລະ ສົ່ງຕະຫລາດພາຍໃນ, ຮອດປີ 2018 ໄດ້ຕັ້ງຮ້ານວາງຂາຍຢູ່ແຄມທາງ ຕໍ່ໜ້າສວນຂອງຕົນເອງ ເພື່ອສະດວກໃນການບົວລະບັດຮັກສາສວນພືດຂອງຕົນ ແລະ ເປັນການດຶງດູດຜູ້ບໍລິການໃຫ້ມາຊື້ກັບທີ່, ຜ່ານການປູກພືດໃນໄລຍະຜ່ານມາ ເຫັນວ່າມີຄວາມຮັບປະກັນ ແລະ ໝັ້ນຄົງກ່ວາເກົ່າ, ເຮັດໃຫ້ຄອບຄົວ ມີລາຍຮັບຈາກການປູກພືດ-ຜັກໄດ້ 33 ລ້ານກວ່າກີບຕໍ່ປີ, ຮັບຈາກການຜະລິດເຂົ້າໄດ້ 10 ລ້ານກວ່າກີບ. ຄຽງຄູ່ກັນນັ້ນ, ກໍ່ມີລາຍຮັບຈາກການບໍລິການສີເຂົ້າ ແລະ ຂາຍໝາກໄມ້ 26 ລ້ານກີບຕໍ່ປີ ແລະ ລາຍຮັບອື່ນໆ 15 ລ້ານກີບ ລວມລາຍຮັບທັງໝົດ 84 ລ້ານກວ່າກີບຕໍ່ປີ, ສະເລ່ຍຕໍ່ຄົນໜຶ່ງ ໄດ້ 12 ລ້ານກີບ ຕໍ່ຄົນຕໍ່ປີ, ຜ່ານການປ່ຽນອາຊີບຈາກຊ້ອມແປງ ມາປູກພືດເຫັນວ່າສາມາດສ້າງລາຍຮັບໃຫ້ແກ່ຄອບຄົວຢ່າງໝັ້ນຄົງ ແລະ ເຮັດໃຫ້ຊີວິດການເປັນຢູ່ຂອງຄອບຄົວໄດ້ຮັບການປັບປຸງດີຂຶ້ນ.