ລາວຈະປິ່ນປົວຜູ້ຕິດເຊື້ອໂຄວິດ-19 ຫາຍດີຫມົດແລ້ວ
ໃນວັນທີ 24 ພຶດສະພານີ້ ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ໄດ້ຖະແຫລງຂ່າວຕໍ່ສື່ມວນຊົນວ່າ: ມາຮອດປັດຈຸບັນ ລາວເຮົາ ສາມາດ ຈໍາກັດຜູ້ຕິດເຊື້ອພະຍາດໂຄວິດ-19 ໄດ້ເປັນເວລາ 42 ມື້ແລ້ວ ແລະ ຊຶ່ງຍັງມີຜູ້ປ່ວຍນອນຕິດຕາມຢູ່ໂຮງໝໍມິດຕະພາບຈຳນວນ 5 ຄົນ ຂອງຜູ້ຕິດເຊື້ອທັງຫມົດ 19 ຄົນ ແລະ ເຫັນວ່າມີອາການດີຂຶ້ນເປັນປົກກະຕິແລ້ວ, ແຕ່ກໍຕ້ອງ ສືບຕໍ່ຕິດຕາມອາການໃຫ້ລະອຽດຕື່ມອີກຈົນກ່ວາຜົນກວດຈະບໍ່ພົບເຊື້ອພະຍາດກໍຈະໃຫ້ອອກໂຮງຫມໍ ແລະ ຕິດຕາມອາການຕື່ມອີກຢູ່ເຮືອນ 14 ມື້ ກ່ອນຈະໃຫ້ອອກໄປເຄື່ອນໄຫວວຽກງານຕ່າງໆ.
ທ່ານຮອງລັດຖະມົນຕີໃຫ້ຮູ້ວ່າ:ມາຮອດເວລາ 6:00 ໂມງເຊົ້າ ຂອງວັນທີ 24 ພຶດສະພານີ້, ທົ່ວໂລກມີລາຍງານການລະບາດ ທັງໝົດ 213 (ປະເທດ/ເຂດ)ໃນນັ້ນມີຜູ້ຕິດເຊື້ອ COVID-19 ຫລາຍເຖິງ 5,39 ລ້ານກວ່າຄົນ (ໃໝ່93.546ຄົນ),
ມີຜູ້ເສຍຊິວິດ 343.500 (ໃໝ່4.075ຄົນ) ກວມເອົາ 6,37 % ຂອງຜູ້ຕິດເຊື້ອທັງໝົດ ແລະ ສາມາດປີ່ນປົວຫາຍດີ 2,23 ລ້ານກວ່າຄົນ (ໃໝ່86,591ຄົນ) ກວມເອົາ 41,47 % ຂອງຜູ້ຕິດເຊື້ອທັງໝົດ. ຫນ້າເປັນຫວ່ງ ແມ່ນຍັງມີການລະບາດເປັນວົງກ້ວາງຢູ່ ທະວີບອາເມລິກາ ແລະ ຍູຣົບ, ມີບາງປະເທດ ຈໍານວນຜູ້ຕິດເຊື້ອພຽງມື້ດຽວ ມີເຖິງ 20.921 ຄົນ ແລະ ເສຍຊີວິດ 1.000 ຄົນຕໍ່ມື້. ສ່ວນໃນກຸ່ມປະເທດອາຊຽນ ມາຮອດເວລາ 6:00 ໂມງເຊົ້າ ຂອງວັນທີ 24 ພຶດສະພານີ້, ມີການຢັ້ງຢືນ ຜູ້ຕິດເຊື້ອສູງເຖິງ 77.624 ຄົນ(ໃຫມ່1.825ຄົນ), ເສຍຊີວິດ 2.415 ຄົນ (ໃໝ່31ຄົນ), ຍັງມີບາງປະເທດທີ່ມີອັດຕາການຕິດເຊື້ອໃໝ່ສູງເຖິງ 949 ຄົນຕໍ່ມື້. ດັ່ງນັ້ນປະເທດເຮົາກໍຍັງຈະຕ້ອງໄດ້ສຸມໃສ່ປະຕິບັດມາດຕະການປ້ອງກັນໃຫ້ເຂັ້ມງວດເພື່ອຄວບຄຸມບໍ່ໃຫ້ມີການລະຍາດອີກຄັ້ງ.
