ກຸ່ມໄວລຸ້ນຍິງຊາວອັບການິດສະຖານ ຜະລິດເຄື່ອງຊ່ວຍຫາຍໃຈຈາກຊິ້ນສ່ວນລົດຍົນ
ທີມພັດທະນາຫຸ່ນຍົນຂອງເດັກຍິງຢູ່ອັບການິດສະຖານໃຫ້ຄວາມສຳຄັນຕໍ່ຜູ້ຕິດເຊື້ອໂຄວິດ-19 ໂດຍການສ້າງເຄື່ອງຊ່ວຍຫາຍໃຈລາຄາບໍ່ແພງຈາກຊິ້ນສ່ວນລົດຍົນ.
ອັບການິດສະຖານເປັນປະເທດທີ່ສະພາບສົງຄາມຕໍ່ເນື່ອງມາເປັນເວລາຫລາຍປີ ເຮັດໃຫ້ເຄື່ອງຊ່ວຍຫາຍໃຈໃນປະເທດມີຈຳກັດພຽງປະມານ 400 ເຄື່ອງເທົ່ານັ້ນ, ຂະນະທີ່ປະຊາກອນທົ່ວປະເທດມີເຖິງ 38,9 ລ້ານຄົນ. ປັດຈຸບັນ ອັບການິດສະຖານເປັນໜຶ່ງໃນປະເທດທີ່ມີຜູ້ຕິດເຊື້ອໂຄວິດ-19 ຫລາຍກວ່າ 7.650 ຄົນ, ເສຍຊີວິດ 178 ຄົນ, ແຕ່ທາງການຢ້ານວ່າສະຖານະການອາດຈະຮ້າຍແຮງອີກ ແລະ ເຮັດໃຫ້ລະບົບການເບິ່ງແຍງສຸຂະພາບທີ່ບອບບາງຢູ່ແລ້ວຍິ່ງຮ້າຍແຮງຂຶ້ນອີກ.
ນາງ ນາຣິດ ຣາຮີມີ (Nahid Rahimi) ສະມາຊິກທີມ “Afghan Dreamers” ອາຍຸ 17 ປີ ບອກວ່າ: “ພວກເຮົາສາມາດຊ່ວຍຊີວິດຄົນໄດ້ຈາກຄວາມພະຍາຍາມຂອງພວກເຮົາ”.
ໄວລຸ້ນກຸ່ມນີ້ເຄີຍເປັນຂ່າວດັງລະດັບໂລກມາແລ້ວໃນປີ 2017 ເມື່ອພວກນາງໄດ້ຮັບລາງວັນພິເສດໃນການແຂ່ງຂັນລະດັບນາໆຊາດຢູ່ອາເມລິກາ ແລະ ຕອນນີ້ພວກນາງກຳລັງແຂ່ງກັບເວລາເພື່ອຜະລິດເຄື່ອງຊ່ວຍຫາຍໃຈໃຫ້ໄດ້ຫລາຍທີ່ສຸດກ່ອນທ້າຍເດືອນພຶດສະພາ.
ກຸ່ມເດັກຍິງເຫລົ່ານີ້ມາຈາກເມືອງເຮຣັດ (Heart) ທາງຕາເວັນຕົກຂອງປະເທດ ເຊິ່ງເປັນພື້ນທີ່ທຳອິດທີ່ມີລາຍງານພົບຜູ້ຕິດເຊື້ອໂຄວິດ-19 ຂອງອັບການິດສະຖານ ແລະ ເປັນຈຸດແຜ່ກະຈາຍການລະບາດຂອງໂຄວິດ-19 ໃນປະເທດ ເນື່ອງຈາກຢູ່ໃກ້ກັບອີຣານ ເຊິ່ງເປັນສູນກາງການແຜ່ລະບາດຂອງພາກພື້ນຕາເວັນອອກກາງ.
ສະມາຊິກໃນທີມມີອາຍຸລະຫວ່າງ 14-17 ປີ ພວກນາງໄດ້ສ້າງຕົ້ນແບບເຄື່ອງຊ່ວຍຫາຍໃຈໂດຍໃຊ້ມໍເຕີຈາກລົດຍົນໂຕໂຢຕ້າທີ່ໃຊ້ແລ້ວ ແລະ ໂຊ່ຈາກລົດຈັກຮອນດ້າ. ພວກນາງກ່າວວ່າ: ເຄື່ອງຊ່ວຍຫາຍໃຈຈະຊ່ວຍບັນເທົາຜູ້ຕິດເຊື້ອໂຄວິດ-19 ທີ່ມີບັນຫາລະບົບທາງເດີນຫາຍໃນຊົ່ວຄາວໃນກໍລະນີສຸກເສີນເມື່ອບໍ່ມີເຄື່ອງຊ່ວຍຫາຍໃຈມາດຕະຖານ.
ບັນຫາການຂາດເຂີນເຄື່ອງຊ່ວຍຫາຍໃຈເປັນບັນຫາລະດັບໂລກ ແລະ ລາຄາໃນຕະຫລາດໂລກມີມູນຄ່າສູງເຖິງ 30.000 ໂດລາສະຫະລັດ ເຖິງ 50.000 ໂດລາສະຫະລັດ. ໝາຍຄວາມວ່າ: ປະເທດທຸກຍາກຈຳນວນຫລາຍບໍ່ສາມາດຊື້ໄດ້, ແຕ່ໄວລຸ້ນກຸ່ມນີ້ບອກວ່າ: ພວກເຂົາກຳລັງສ້າງເຄື່ອງຊ່ວຍຫາຍໃຈທີ່ມີລາຄາຕໍ່າກວ່າ 600 ໂດລາສະຫະລັດ.
