ພາບຊາຍອິນເດຍຄົນໜຶ່ງນັ່ງໄຫ້ຢູ່ແຄມທາງ ສະທ້ານໄປທົ່ວໂລກ

ໂລກເມືອງພວນ

ພາບຄົນງານທຸກຈົນຊາວອິນເດຍຄົນໜຶ່ງນັ່ງໄຫ້ຢູ່ແຄມທາງ ເພາະບໍ່ມີເງິນຊື້ປີ້ລົດໄຟເພື່ອກັບບ້ານ ໄດ້ກາຍເປັນຈຸດສົນໃຈຂອງຜູ້ຄົນໃນທົ່ວໂລກຢາກຍື່ນມືໃຫ້ການຊ່ວຍເຫຼືອ.

ພາບຖ່າຍຄົນງານທຸກຈົນຄົນໜຶ່ງທີ່ໄປອອກແຮງງານຢູ່ໄກບ້ານ ນັ່ງໄຫ້ຢູ່ແຄມຖະໜົນນະຄອນ Delhi. ເບິ່ງໃບໜ້າຂອງເຂົາແລ້ວ ເຕັມໄປດ້ວຍຄວາມທຸກທີ່ແສນທໍລະມານ, ເຕັມໄປດ້ວຍຮອຍຕີນກາໃນໃບໜ້າຂອງເຂົາ, ເຂົາເວົ້າກັບຄົນຖ່າຍຮູບວ່າ: ເມຍ ແລະ ລູກນ້ອຍຂອງເຂົາກຳລັງເປັນໄຂ້ຢູ່ເຮືອນ, ຢາກເມືອຫາລູກເມຍແຕ່ບໍ່ມີເງິນ, ໃນຂະນະດຽວກັນກໍກຳລັງປິດບ້ານປິດເມືອງຢ່າງເຂັ້ມງວດຍ້ອນພະຍາດໂຄວິດ-19 ລູກເສຍຊີວິດກໍເມືອຫາບໍ່ໄດ້.

ຄວາມຫຍຸ້ງຍາກຂອງ Rampukar Pandit ນັ້ນ ມັນແມ່ນຄວາມຫຍຸ້ງຍາກລວມຂອງຄົນງານຮັບຈ້າງທີ່ອາໄສຢູ່ໃນອິນເດຍ. ບໍ່ມີພາຫະນະສາທາລະນະໃດໆທີ່ເຂົາຈະເມືອຫາລູກ-ເມຍໄດ້ທີ່ຢູ່ Begusarai ຊຶ່ງຢູ່ຫ່າງໄກບ່ອນທີ່ເຂົາເຮັດວຽກ 1.200 ກມ. ເຂົາເລີ່ມຍ່າງ, ແຕ່ເມື່ອຍ່າງໄປເຖິງຂົວ Nizamuddin ເຂົາຮູ້ສຶກໝົດແຮງ ແລະ ຫີວໂຫຍ, ເຂົາບໍ່ສາມາດທີ່ຈະກ້າວເດີນຕໍ່ໄປໄດ້ອີກ.

ຄົນຖ່າຍພາບຊື່ Atul Yadav ຂອງສຳນັກຂ່າວ Press Trust of Indiaກຳລັງກັບມາແຕ່ເຮັດວຽກກໍພົບເຫັນ Pandit ອາຍຸ 38 ປີ ກຳລັງນັ່ງໄຫ້ສະອຶກສະອຶື້ນຢູ່ແຄມຖະໜົນ. ຄົນຖ່າຍພາບ ໄດ້ເອົານໍ້າ ແລະ ເຂົ້າໜົມຍື່ນໃຫ້ເຂົາກິນ ແຕ່ເຂົາປະຕິເສດບໍ່ເອົາ. ເຂົາເວົ້າວ່າ ຂອງກິນຈະເຮັດໃຫ້ເຂົາສະໝັກ ເພາະບໍ່ສາມາດທີ່ຈະກືນມັນລົງໄດ້ ເພາະຄິດຮອດລູກນ້ອຍ 11 ປີທີ່ກຳລັງນອນໄຂ້ຢູ່ໃນຂະນະນີ້.

ຄົນຖ່າຍພາບເວົ້າວ່າ: “ເບິ່ງເຂົາແລ້ວສຸດທີ່ອີດູຕົນ ຂ້ອຍຈຶ່ງໄດ້ຖ່າຍເອົາພາບຂອງເຂົາໄວ້. ເຂົານັ່ງໄຫ້ຢູ່ແຄມທາງແຫ່ງນີ້ໄດ້ 3 ວັນແລ້ວ”.

ເຂົາບອກກັບຄົນຖ່າຍພາບວ່າ: “ຊາວຜູ້ອອກແຮງງານຄືພວກເຮົາ ບໍມີສັນຊາດ. ສິ່ງທີ່ຂ້ອຍປາຖະໜາໃນຂະນະນີ້ແມ່ນຢາກເມືອໃຫ້ເຖິງລູກຊາຍ”.

ຄໍ່າຄືນຂອງມື້ນັ້ນ, ເຂົາໄດ້ໄປຫາເຈົ້າໜ້າທີ່ຕຳຫຼວດທີ່ຍາມຢູ່ໃນປ້ອມຍາມແຫ່ງໜຶ່ງ. ໃນຂະນະທີ່ລໍຖ້າໃຫ້ເຈົ້າໜ້າທີ່ຊ່ວຍເຫຼືອຢູ່ນັ້ນ, ມີກຸ່ມຄົນຈຳນວນໜຶ່ງທີ່ມີຈິດໃຈໃຫ້ການຊ່ວຍເຫຼືອເຂົາກໍມາເຖິງ, ເພາະພວກເຂົາອ່ານພົບ ທະວິດເຕີ ຂອງຄົນຖ່າຍພາບ ໂພດໃນສື່ອອນລາຍ ຈຶ່ງໄດ້ພາກັນຊອກຫາ ແລະ ນຳມາ.

Pandit ມີຄວາມທຸກໃຈຫຼາຍ, ເມຍຂອງເຂົາຫາກໍໂທສາຍບອກເຂົາວ່າ ລູກຊາຍຂອງເຂົາໄດ້ເສຍຊີວິດແລ້ວ. ໜຶ່ງໃນຈຳພວກຄົນທີ່ມາຊ່ວຍເຫຼືອເຂົານັ້ນ ໄດ້ຊື້ປີ້ລົດໄຟໃຫ້ເຂົາ, ເຂົາສະອື້ນໄຫ້ ເພາະຮູ້ບຸນຄຸນຕໍ່ການຊ່ວຍເຫຼືອຂອງຄົນແປກໜ້າ.

ເຂົາເວົ້າວ່າ: ຖ້າຫາກໄດ້ກັບຄືນມາເຮັດວຽກຢູ່ Delhi ອີກ, ເຂົາຈະຊອກຫາຜູ້ຍິງທີ່ຊື້ປີ້ລົດໄຟໃຫ້ເຂົາ. ກ່ອນທີ່ພວກເຂົາຈະຈາກໄປ ຜູ້ຍິງຄົນນັ້ນໄດ້ເອົາທີ່ຢູ່ໃຫ້ເຂົາ. ເຂົາເວົ້າເວົ້າວ່າ: “ຜູ້ຍິງຄົນັ້ນຄືພະເຈົ້າຂອງຂ້ອຍ” .