ເຢເມນຜະເຊີນວິກິດຄົນອຶດຫິວ-ອະຫິວາລະບາດໜັກ
ສຳນັກຂ່າວຕ່າງປະເທດລາຍງານວ່າ: ອົງການຊ່ວຍເຫລືອເດັກ “ເຊບ ເດິ ຊິວເດຣນ” ອອກມາເຕືອນວ່າ: ສະຖານະການລະບາດຂອງພະຍາດອະຫິວາຢູ່ປະເທດເຢເມນຍົກລະດັບສູ່ຂັ້ນວິກິດແລ້ວ, ພາຍຫລັງໄລຍະ 3 ອາທິດຜ່ານມາ, ອັດຕາຜູ້ຕິດເຊື້ອພະຍາດເພີ່ມຂຶ້ນເປັນ 3 ເທົ່າ ໂດຍສະເລ່ຍແລ້ວຈະມີເດັກ 1 ຄົນຕິດເຊື້ອໃນທຸກໆ 35 ວິນາທີ.
ທ່ານ ແກຣນ ພຣິດຊາດ ຜູ້ອຳນວຍການອົງການ ເຊບ ເດິ ຊິວເດຣນ ຢູ່ເຢເມນ ເຕືອນວ່າ: ປະເທດເຢເມນກຳລັງຢືນຢູ່ປາກເຫວຂອງການລົ້ມສະຫລາຍ, ພາຍຫລັງສະຖານະການອຶດຫິວພາຍໃນປະເທດ ແລະ ລະບົບໂຄງສ້າງພື້ນຖານທີ່ຖືກທຳລາຍຈາກສົງຄາມກາງເມືອງ ເຮັດໃຫ້ການລະບາດຂອງເຊື້ອອະຫິວາຮຸນແຮງຍິ່ງຂຶ້ນ.
+ ພະຍາດອະຫິວາຍັງລະບາດໜັກຢູ່ເຢເມນ
+ UN ຊີ້ເຢເມນໃກ້ລົ້ມສະຫລາຍ ວອນທົ່ວໂລກຊ່ວຍເຫລືອຈິງຈັງດ່ວນ
+ ເຢເມນປະກາດພາວະສຸກເສີນ ພາຍຫລັງພະຍາດອະຫິວາລະບາດ
ເຊບ ເດິ ຊິວເດຣນ ລະບຸວ່າ: ໄລຍະ 2 ອາທິດຜ່ານມາ, ອັດຕາການຕິດຕໍ່ຂອງພະຍາດເພີ່ມຂຶ້ນຫລາຍກວ່າ 3 ເທົ່າ, ຜູ້ຕິດພະຍາດສ່ວນຫລາຍເປັນຄົນອາຍຸນ້ອຍ ແລະ ເກືອບເຄິ່ງໜຶ່ງອາຍຸຕໍ່າກວ່າ 15 ປີ. ຂະນະທີ່ຕາມຂໍ້ມູນຂອງອຸຍນີເຊບລະບຸວ່າ: ນັບແຕ່ພະຍາດອະຫິວາເລີ່ມລະບາດໃນເດືອນເມສາຈົນເຖິງວັນທີ 13 ມິຖຸນາ, ມີຜູ້ສົງໄສຕິດເຊື້ອອະຫິວາທັງໝົດ 129.185 ຄົນ ໃນ 20 ລັດຈາກ 22 ລັດທົ່ວປະເທດເຢເມນ, ມີຜູ້ເສຍຊີວິດ 942 ຄົນ ໂດຍ 25% ໃນຈຳນວນນີ້ເປັນເດັກ.
ດຣ. ເມີຣິດເຊລ ເຣລານໂຍ ຜູ້ແທນອຸຍນີເຊບຢູ່ເຢເມນລະບຸວ່າ: ການລະບາດຂອງພະຍາດອະຫິວາກາຍເປັນວິກິດສູງສຸດສຳລັບຂະແໜງບໍລິການສາທາລະນະສຸກ ທີ່ລະບົບບສາທາລະນະສຸກ, ນ້ຳປະປາ ແລະ ສົ່ງເສີມສຸຂະພາບໃຊ້ບໍ່ໄດ້.
ທັງນີ້, ດຣ. ເຣລານໂຍ ເປີດເຜີຍອີກວ່າ: ປັດຈຸບັນມີເດັກອາຍຸຕໍ່າກວ່າ 5 ປີຢູ່ເຢເມນຫລາຍກວ່າ 2 ລ້ານຄົນປະສົບສະພາບຂາດສານອາຫານກະທັນຫັນ, ຄວາມເສຍຫາຍຕໍ່ໂຄງສ້າງພື້ນຖານທີ່ເກີດຈາກການປະທະກັນລະຫວ່າງກອງກຳລັງຝ່າຍກະບົດ ແລະ ລັດຖະບານໄລຍະ 2 ປີຜ່ານມາ ເຮັດໃຫ້ປະຊາຊົນ 14,5 ລ້ານຄົນ ໃນຈຳນວນນີ້ເປັນເດັກກວ່າ 8 ລ້ານຄົນ ບໍ່ສາມາດເຂົ້າເຖິງນ້ຳສະອາດ ແລະ ການສົ່ງເສີມສຸຂະພາບໄດ້.
