ສະຫະລັດອາເມລິກາ ອັດສີດ 25 ຕື້ໂດລາ ເພື່ອໃຫ້ບັນດາທຸລະກິດຍ້າຍຖານການຜະລິດອອກຈາກຈີນ

ໂດຍ: ລູກເມືອງພວນ

ອຳນາດການປົກຄອງຂອງປະທານາທິບໍດີ ໂດນັລ ທຣຳ ກຳລັງວາງແຜນຊຸກຍູ້ໃຫ້ບັນດາບໍລິສັດຍ້າຍຖານການຜະລິດຢູ່ຈີນກັບຄືນສະຫະລັດ, ໂດຍສະເພາະແມ່ນບັນດາຂະແໜງການທີ່ສຳຄັນໆ.

ສຳນັກຂ່າວ Reutersໃຫ້ຮູ້ວ່າ: ບັນດານັກກົດໝາຍ ແລະ ເຈົ້າໜ້າທີ່ລັດຖະບານ ກຳລັງສ້າງແຜນການ ຊຸກຍູ້ໃຫ້ບັນດາບໍລິສັດຂອງສະຫະລັດອາເມລິກາຍ້າຍຖານການຜະລິດ ຫຼື ການຕອບສະໜອງທີ່ສຳຄັນໆອອກຈາກຈີນ ດ້ວຍຫຼາຍຮູບການ, ໃນນັ້ນແມ່ນການຜ່ອນຜັນພາສີ ແລະ ການອູດໜູນຕ່າງໆ ໃຫ້ແກ່ບໍລິສັດ.

Reuters ໄດ້ສຳພາດນັກການເມືອງ ແລະ ບັນດາຫົວໜ້າບໍລິສັດໃຫ່ຍໆ ແລະ ບັນດານັກກົດໝາຍ ກ່ຽວກັບແນວຄວາມຄິດອັດສີດ 25 ຕື້ໂດລານັ້ນ ແມ່ນເພື່ອຢາກສ້າງສາຍພົວພັນລະຫວ່າງສະຫະລັດ ແລະ ຈີນໃຫ້ດີຂຶ້ນ.

ປະທານາທິບໍດີ ທຣຳ ໄດ້ໃຫ້ຄຳໝັ້ນສັນຍາວ່າ ຈະຍ້າຍຖານການຜະລິດຢູ່ຕ່າງປະເທດໃຫ້ກັບຄືນສະຫະລັດ, ແຕ່ຍ້ອນມີການລະບາດ ຂອງພະຍາດໂຄວິດ-19 ແລະ ມີຄວາມເປັນຫວ່ງວ່າ ການຕອບສະໜອງອຸປະກອນທາງການແພດ ແລະ ທັນຍາຫານຈະຂຶ້ນກັບເຂົາ (ໝາຍເຖິງຈີນ) ຈຶ່ງໄດ້ຊຸກຍູ້ແຜນດັ່ງກ່າວໃຫ້ໄວຂຶ້ນ.

ວັນທີ 14 ພຶດສະພານີ້, ທຣຳ ໄດ້ລົງນາມຄຳສັ່ງສະບັບໜຶ່ງ ອະນຸຍາດໃຫ້ຫົວໜ່ວຍການລົງທຶນຕ່າງປະເທດມີອຳນາດໃໝ່ ໃນການຊຸກຍູ່ຊ່ວຍເຫຼືອບັນດາບໍລິສັດຂອງສະຫະລັດອາເມລິກາຍ້າຍຖານການຜະລິດອອກຈາກຈີນ. ຄຳສັ່ງດັ່ງກ່າວແມ່ນເພື່ອຈຸດປະສົງໃຫ້ອາເມລິກາສາມາດຜະລິດທຸກຢ່າງທີ່ມີຄວາມຕ້ອງການ ແລະ ເພື່ອການສົ່ງອອກ, ນັບທັງຜະລິດຕະພັນການຢາ.

ເຖິງຢ່າງໃດກໍຕາມ, ເຈົ້າໜ້າທີ່ພາຍໃນລັດຖະບານຂອງ ທຣຳ ກຳລັງແຕກອອກເປັນຫຼາຍຝ່າຍຕໍ່ກັບວິທີການດຳເນີນການຂອງເຂົາ ໂດຍສະເພາະແມ່ນການຈະຍ້າຍຖານການຜະລິດມື້ໜຶ່ງຍາມດຽວ ແມ່ນເປັນໄປໄດ້ຍາກ ແລະ ອີກຢ່າງໜຶ່ງການອັດສີດເງິນກ້ອນໄລຍະນີ້ ອາດຈະເປັນໄປໄດ້ຍາກ ເພາະຈະເປັນການແຕະຕ້ອງເຖິງແຜນງົບປະມານໄຕມາດຕໍ່ໄປ ແລະ ໃນເວລານີ້ກໍແມ່ນເວລາກຳລັງຟື້ນຟູເສດຖະກິດພາຍໃນປະເທດຄືນໃໝ່.

ປັດຈຸບັນບັນດານັກກົດໝາຍຂອງສອງພັກກຳລັງຮ່າງກົດໝາຍ   ໃໝ່ອອກມາ ເພື່ອຫຼຸດຜ່ອນການຂຶ້ນກັບຂອງສະຫະລັດຕໍ່ກັບຈີນ. ປີ 2019 ປະລິມານສິນຄ້າຂອງສະຫະລັດນຳເຂົ້າຈາກຈີນຢູ່ທີ່ 18%. ການຕອບສະໜອງດ້ານອຸປະກອນການແພດ ແລະ ຜະລິດພັນອື່ນໆ ທີ່ກ່ຽວຂ້ອງກັບການປ້ອງກັນຊາດກໍເຊັ່ນດຽວກັນ.

ຫາງສຽງທີ່ຟົດເດືອດອີກອັນໜື່ງຢູ່ໃນ ວໍຊິງຕັນ ໃນຂະນະນີ້ ແມ່ນການແບ່ງປັນກ້ອນເງິນ 25 ຕຶື້ໂດລາ ໃຫ້ບັນດາບໍລິສັດ ຜະລິດສິນຄ້າທີ່ຈຳເປັນຢູ່ພາຍໃນສະຫະລັດກ່ອນ ເພື່ອຮັບປະກັນໃຫ້ແກ່ການຕອບສະໜອງຢ່າງພຽງພໍຈຶ່ງຍ້າຍຖານການຜະລິດ.