ຊຸບເປີໄຊໂຄນ “ອຳພັນ” ຖະຫລົ່ມ ອິນເດຍ-ບັງກະລາເທດ ຕາຍ 14 ຄົນ
ອິນເດຍ ແລະ ບັງກະລາເທດ ລາຍງານຜູ້ເສຍຊີວິດມີຢ່າງໜ້ອຍ 14 ຄົນ ຈາກອິດທິພົນຮຸນແຮງຂອງ “ອຳພັນ” ຊຸບເປີໄຊໂຄນຫົວທຳອິດໃນຮອບ 21 ປີ ເຊິ່ງເກີດຂຶ້ນຢູ່ມະຫາສະໝຸດອິນເດຍ.
ສຳນັກຂ່າວຕ່າງປະເທດລາຍງານວ່າ: ສຳນັກງານອຸຕຸນິຍົມວິທະຍາແຫ່ງຊາດຂອງອິນເດຍ ລາຍງານວ່າ: ພາຍຸອຳພັນ ເຊິ່ງມີຄວາມໄວລົມສູງສຸດໃກ້ສູນກາງ 190 ກິໂລແມັດຕໍ່ຊົ່ວໂມງ ທຽບເທົ່າເຮີລິເຄນລະດັບ 3 ຕາມມາດຕາວັດແທກພາຍຸຊັບເຟີ-ຊິມສັນ ເຄື່ອນທີ່ຈາກອ່າວເບັງກໍໃນມະຫາສະໝຸດອິນເດຍເຂົ້າສູ່ແຜ່ນດິນຢູ່ລັດເບັງກໍຕາເວັນຕົກ ໃນຕອນແລງວັນທີ 20 ພຶດສະພາຕາມເວລາທ້ອງຖິ່ນ.
ທັງນີ້ ອິດທິພົນຂອງພາຍຸສົ່ງຜົນໃຫ້ເກີດຝົນຟ້າຄະນອງເປັນວົງກວ້າງ, ມີລາຍງານນ້ຳຖ້ວມກະທັນຫັນ ແລະ ດິນເຈື່ອນໃນຫລາຍພື້ນທີ່. ຂະນະທີ່ມີການຄາດຄະເນປະລິມານນ້ຳຝົນສະສົມໃນຮອບ 24 ຊົ່ວໂມງອາດສູງເຖິງ 300 ມິນລີແມັດ ແລະ ມີຄຳເຕືອນເລື່ອງຄື້ນພາຍຸພັດເຂົ້າຝັ່ງຂະໜາດໃຫຍ່ ເຊິ່ງອາດສົ່ງຜົນໃຫ້ມີນ້ຳທະເລໄຫລເຂົ້າຖ້ວມພື້ນທີ່ເປັນໄລຍະທາງໄກ 25 ກິໂລແມັດຈາກແຄມຝັ່ງ.
ທ່ານ ນາງ ມາມາຕາ ບາເນີຈີ ເຈົ້າຄອງລັດເບັງກໍຕາເວັນຕົກ ກ່າວວ່າ: ໄດ້ຮັບລາຍງານຜູ້ເສຍຊີວິດໃນພື້ນທີ່ແລ້ວ 10 ຄົນ ເຖິງວ່າມີການອົບພະຍົບປະຊາຊົນແລ້ວ 500.000 ຄົນ, ແຕ່ການປະເມີນຄວາມເສຍຫາຍຍັງບໍ່ສາມາດດຳເນີນການໄດ້ ເນື່ອງຈາກພື້ນທີ່ປະສົບໄພຫລາຍແຫ່ງບໍ່ສາມາດເຂົ້າເຖິງໄດ້ ເນື່ອງຈາກລະດັບນ້ຳຖ້ວມສູງ. ນອກຈາກນີ້ ທຸກຝ່າຍມີຄວາມກັງວົນວ່າ: ຂອບເຂດຄວາມເສຍຫາຍ “ຫລາຍກວ່າທີ່ປະເມີນຈາກສາຍຕາ” ເພາະໃນເວລາດຽວກັນຍັງຕ້ອງຕໍ່ສູ້ກັບພະຍາດລະບາດໂຄວິດ-19 ນຳອີກ.
ຂະນະທີ່ບັງກະລາເທດລາຍງານຜູ້ເສຍຊີວິດຢ່າງໜ້ອຍ 4 ຄົນ, ການອົບພະຍົບປະຊາຊົນແລ້ວປະມານ 2,4 ລ້ານຄົນ, ການກຽມສູນອາໄສຊົ່ວຄາວຫລາຍກວ່າ 15.000 ແຫ່ງ, ພ້ອມທັງເລັ່ງລະບາຍຜູ້ລີ້ໄພຊາວໂຣຮິນຈາບາງສ່ວນຈາກຄ້າຍໃນເມືອງຄ໊ອກ ບາຊາ ເຊິ່ງເປັນພື້ນທີ່ຕໍ່າ ໃຫ້ຂຶ້ນສູ່ພື້ນທີ່ສູງກ່ອນ ທ່າມກາມຄວາມກັງວົນເລື່ອງພະຍາດລະບາດໂຄວິດ-19 ເຊັ່ນກັນ ໂດຍມີການຢືນຢັນຜູ້ຕິດເຊື້ອໃນຜູ້ລີ້ໄພຊາວໂຣຮິນຈາແລ້ວ 10 ຄົນ, ແຕ່ທຸກຝ່າຍເຊື່ອວ່າ: “ຍັງມີອີກຫລາຍ”.
ສຳລັບໄຊໂຄນອຳພັນຖືເປັນພາຍຸຫົວທຳອິດໃນປີນີ້ ທີ່ເກີດຂຶ້ນຢູ່ມະຫາສະໝຸດອິນເດຍ ແລະ ເປັນຊຸບເປີໄຊໂຄນຫົວທຳອິດໃນຮອບ 21 ປີ ຕໍ່ຈາກຊຸບເປີໄຊໂຄນ “ໂອຣິສາ” ໃນທ້າຍເດືອນຕຸລາ 1999 ທີ່ສ້າງຄວາມເສຍຫາຍໃຫ້ແກ່ອິນເດຍ, ບັງກະລາເທດ, ມຽນມາ ແລະ ໄທ ມີຜູ້ເສຍຊີວິດລວມກັນເກືອບ 10.000 ຄົນ.
