ປະຫວັດການເດີນທາງຊອກຫາ ເສັ້ນທາງກູ້ຊາດ ປະທານ ໂຮ່ຈີມິນ
(ເນື່ອງໃນໂອກາດວັນເກີດປະທານ ໂຮ່ຈິມິນ ຄົບຮອບ 130 ປີ, 19/5/1890 – 19/5/2020)
ໃນການເດີນທາງຊອກຫາເສັ້ນທາງກູ້ຊາດ, ປະທານ ໂຮ່ຈິມິນ ໄດ້ເດີນຕາມລັດທິ ມາກ – ເລນິນ, ເຂົ້າຮ່ວມການສ້າງຕັ້ງພັກກອມມູນິດຝຣັ່ງ ປີ 1920 ແລະ ກາຍເປັນນັກກອມມູນິດຫວຽດນາມຄົນທຳອິດ.ຈາກນັ້ນ, ເພິ່ນໄດ້ນຳພາສ້າງຕັ້ງພັກກອມມູນິດອິນດູຈີນ ຊຶ່ງເປັນພັກປະຕິວັດຂອງຊົນຊັ້ນກຳມະກອນ ແລະ ຊາວຜູ້ອອກແຮງງານຢູ່ອິນດູຈີນ ຊຶ່ງເປັນຕົ້ນກຳເນີດຂອງພັກກອມມູນິດຫວຽດນາມ ແລະ ພັກ ປປ ລາວ. ບັນດາການອຸທິດຂອງປະທານ ໂຮ່ຈິມິນ ນັ້ນກໍໄດ້ຮັບຄວາມນິຍົມນັບຖືເປັນພິເສດຈາກບັນດາເພື່ອນມິດສາກົນ.
ໃນຊີວິດແຫ່ງການເຄື່ອນໄຫວປະຕິວັດຂອງຕົນ, ປະທານ ໂຮ່ຈິມິນ ໄດ້ເດີນທາງຫຼາຍປະເທດໃນໂລກ, ສະເພາະ ສປ ຈີນ ແມ່ນປະເທດທີ່ເພິ່ນໄດ້ໃຊ້ເວລາການດໍາລົງຊີວິດຢູ່ດົນທີ່ສຸດ. ກ່ອນທີ່ຈະສ້າງຕັ້ງພັກກອມມູນິດຫວຽດນາມ, ປະທານ ໂຮ່ຈິມິນ ໄດ້ສ້າງຕັ້ງສະມາຄົມຊາວໜຸ່ມປະຕິວັດຫວຽດນາມ ຢູ່ຈີນ, ນີ້ແມ່ນອົງການເພື່ອໃຫ້ ປະທານ ໂຮ່ຈິມິນ ໂຄສະນາແນວຄິດກ້າວໜ້າ ແລະ ຈິດໃຈສູ້ຊົນໃຫ້ແກ່ການປົດປ່ອຍປະເທດຊາດ, ຍາດເອົາເອກະລາດມາໃຫ້ປະເທດຊາດໃຫ້ແກ່ໄວໜຸ່ມຫວຽດນາມ.
ເນື່ອງໃນໂອກາດນີ້, ເພື່ອນມິດສາກົນຫຼາຍຄົນກໍໄດ້ຕີລາຄາສູງບົດບາດຂອງພັກກອມມູນິດຫວຽດນາມ ພາຍໃຕ້ການຊີ້ນຳ-ນຳພາຂອງ ປະທານ ໂຮ່ຈິມິນ. ບັນດາເພື່ອນມິດລ້ວນແຕ່ໃຫ້ຮູ້ວ່າ: ພາຍໃຕ້ການຊີ້ນຳ-ນຳພາຂອງພັກກອມມູນິດຫວຽດນາມ ແລະ ປະທານ ໂຮ່ຈິມີນ, ປະຊາຊົນຫວຽດນາມ ນັບມື້ນັບມີຊີວິດທີ່ອີ່ມໜຳສຳລານ, ມີຄວາມຜາສຸກ ແລະ ມີການພັດທະນາ.
ໃນຕະຫຼອດຊີວິດ, ປະທານ ໂຮ່ຈິມິນ ໄດ້ເປັນແບບຢ່າງອັນສູງສົ່ງ, ໄດ້ອຸທິດຕະຫຼອດຊີວິດຂອງຕົນ ໃຫ້ແກ່ພາລະກິດການປະຕິວັດຂອງປະຊາຊົນຫວຽດນາມ ແລະ ປະຊາຊົນໃນໂລກ. 50 ປີໄດ້ຜ່ານໄປ, ເມື່ອອ່ານຄືນຄຳພິໄນກຳຂອງປະທານ ໂຮ່ຈິມິນ, ທຸກໆຄົນ, ພິເສດແມ່ນພະນັກງານສະມາຊິກພັກ ຍິ່ງມີ ຄວາມເຊື່ອມຊຶມຄຳສັ່ງສອນຂອງເພິ່ນ, ສູ້ຊົນອົດທົນ, ຝຶກຝົນຫຼໍ່ຫຼອມ ເພື່ອປັບປຸງຕົນເອງຢ່າງບໍ່ຢຸດຢັ້ງ. ການເປັນແບບຢ່າງຄວາມຈິງແລ້ວແມ່ນການຝຶກຝົນຫຼໍ່ຫຼອມ ເພື່ອກ້າວໄປສູ່ສິ່ງທີ່ດີງາມ, ສູງສົ່ງ ແລະ ກໍແມ່ນການສະກັດກັ້ນບັນດາຄວາມຜິດພາດຂອງສະມາຊິກພັກ.
ໃນຫຼາຍປີທີ່ຜ່ານມາ, ການຮ່ຳຮຽນ, ປະຕິບັດຕາມແນວຄິດ, ຄຸນສົມບັດ, ແບບແຜນການດຳລົງຊີວິດ ໂຮ່ຈິມິນ ແມ່ນປະກົດການຢ່າງມີຊີວິດຊີວາຂອງຄວາມເຄົາລົບຮັກແພງ, ຄວາມໄວ້ເນື້ອເຊື່ອໃຈຕໍ່ເສັ້ນທາງ ແລະ ພາລະກິດການປະຕິວັດຂອງເພິ່ນ ເພື່ອໃຫ້ປະຊາຊົນຫວຽດນາມແຕ່ລະຄົນມີການດຳລົງຊີວິດ ແລະ ເຮັດວຽກໄດ້ດີກວ່າ.
ໃນພິໄນກຳຂອງ ປະທານ ໂຮ່ຈິມິນ, ກ່ອນທີ່ເພິ່ນຈະຈາກໄປ, ປະທານ ໂຮ່ຈິມິນ ໄດ້ຕັກເຕືອນວ່າ: ພາຍຫຼັງການປະຕິວັດປະສົບຜົນສຳເລັດ, ວຽກງານຕ້ອງປະຕິບັດ ກ່ອນອື່ນໝົດແມ່ນກໍ່ສ້າງ, ປັບປຸງພັກຄືນໃໝ່. ຕາມຄຳແນະນຳຂອງເພິ່ນ, ໃນມະຕິສູນກາງພັກຄັ້ງທີ 4 ຊຸດທີ 12, ພັກກອມມູນິດຫວຽດນາມ ໄດ້ວາງອອກບັນດາມາດຕະການຮອບດ້ານ, ຄົບຊຸດ ເພື່ອເພີ່ມທະວີການກໍ່ສ້າງ, ປັບປຸງພັກ, ປັບໄໝລົງໂທດບັນດາພະນັກງານ, ສະມາຊິກພັກທີ່ລະເມີດລະບຽບວິໄນຂອງພັກຢ່າງເຂັ້ມງວດ. ພ້ອມກັບການຮັດແໜ້ນກົດລະບຽບ, ວິໄນ. ພັກກອມມູນິດຫວຽດນາມໄດ້ປະກາດໃຊ້ບັນດາເອກະສານກ່ຽວກັບຄວາມຮັບຜິດຊອບເປັນແບບຢ່າງ. ພິເສດ ແມ່ນການກຳນົດຢ່າງຈະແຈ້ງກ່ຽວກັບຄວາມຮັບຜິດຊອບເປັນແບບຢ່າງໃນມະຕິກອງປະຊຸມສູນກາງພັກຄັ້ງທີ 8 ຊຸດທີ 12. ການເປັນແບບຢ່າງຂອງພະນັກງານ, ສະມາຊິກພັກ ແມ່ນສະແດງໃຫ້ເຫັນຢ່າງຈະແຈ້ງຕໍ່ຄວາມຮູ້ບຸນຄຸນ, ຄວາມເອກອ້າງທະນົງໃຈ ແລະ ສະໝັກໃຈປະຕິບັດຕາມ ປະທານ ໂຮ່ຈິມິນ.
ພະນັກງານ, ສະມາຊິກພັກ ເປັນແບບຢ່າງກ່ຽວກັບຈິດໃຈຈົງຮັກພັກດີຕໍ່ອຸດົມການປະຕິວັດ, ຮັບໃຊ້ປະເທດຊາດ, ຮັບໃຊ້ປະຊາຊົນຕະຫຼອດຊີວິດ, ປະຕິບັດໜ້າທີ່ທີ່ໄດ້ຮັບມອບໝາຍເປັນຢ່າງດີທີ່ສຸດ. ພະນັກ ງານ, ສະມາຊິກພັກເປັນແບບຢ່າງກ່ຽວກັບຄຸນສົມບັດ, ແບບແຜນດຳລົງຊີວິດໂປ່ງໃສ; ມີຄຸນທາດ, ຄວາມຮັບຜິດຊອບ ແລະ ຄວາມໄວ້ເນື້ອເຊື່ອໃຈ. ການເປັນແບບຢ່າງຕ້ອງມີຄວາມແທດຈິງໃນວຽກງານ, ໃນການດຳລົງຊີວິດຂອງພະນັກງານແຕ່ລະຄົນ.
ໃນສະພາບຄວາມເປັນຈິງ, ພະນັກງານທຸກຄົນຢາກເປັນແບບຢ່າງທີ່ດີນັ້ນ, ຄຳເວົ້າຕ້ອງໄປຄຽງຄູ່ກັບການກະທຳ. ເປັນຄະຕິເຕືອນໃຈຢູ່ສະເໝີເມື່ອຕົນເອງເວົ້າອັນໃດຕ້ອງປະຕິບັດໃຫ້ໄດ້ ແລະ ຖືກຕ້ອງ. ການນຶກຄິດ ແລະ ກະທຳຕ້ອງຖືຜົນປະໂຫຍດລວມຢູ່ເໜືອກວ່າສິ່ງໃດໝົດ, ນັບແຕ່ວຽກງານພະນັກງານຈົນເຖິງການຊີ້ນຳປະຕິບັດໜ້າທີ່ ເປັນຕົ້ນແມ່ນຕ້ອງມີຈິນຕະນາການເພື່ອການພັດທະນາລວມ. ຄວາມປາຖະໜາຂອງປະເທດຊາດແມ່ນພັກຕ້ອງເຂັ້ມແຂງ, ອຳນາດການປົກຄອງຕ້ອງມີການກະທຳ, ເວົ້າຕ້ອງໄປຄຽງຄູ່ກັບການກະທຳ.
ຄວາມຮັບຜິດຊອບເປັນແບບຢ່າງຕ້ອງໄດ້ຮັບການຍົກສູງພາຍໃນພັກ. ນັບແຕ່ການຮ່ຳຮຽນ, ປະຕິບັດຕາມແນວຄິດ, ຄຸນສົມບັດ, ແບບແຜນການດຳລົງຊີວິດຂອງປະທານ ໂຮ່ຈິມິນ ຈົນເຖິງການກຳນົດຄວາມຮັບຜິດຊອບຕ້ອງເປັນແບບຢ່າງຂອງພະນັກງານ, ສະມາຊິກພັກ ເປັນຕົ້ນແມ່ນພະນັກງານການນຳຂັ້ນສູງແມ່ນບາດກ້າວພັດທະນາສຳຄັນທີ່ສຸດໃນການກໍ່ສ້າງ, ປັບປຸງພັກກອມມູນິດຫວຽດນາມ. ຄວາມຮັບຜິດຊອບເປັນແບບຢ່າງໄດ້ຮັບການຍົກສູງ, ນັບແຕ່ຂໍ້ກຳນົດຂອງພັກຈົນເຖິງຄວາມຕື່ນຕົວໃນການປະຕິບັດຂອງແຕ່ລະຄົນ, ໄດ້ປະກອບສ່ວນບຳລຸງສ້າງຄຸນທາດອັນສູງສົ່ງຂອງພະນັກງານ, ສະມາຊິກພັກ, ລັກສະນະນຳໜ້າຂອງພັກ ແລະ ປັບປຸງຄວາມສາມັກຄີ, ຄວາມເປັນເອກະພາບພາຍໃນພັກ ແລະ ການພົວພັນສະໜິດແໜ້ນ ລະຫວ່າງ ພັກກັບປະຊາຊົນ. ການເປັນແບບຢ່າງຄວາມຈິງແມ່ນການຝຶກຝົນຫຼໍ່ຫຼອມ ເພື່ອກ້າວໄປສູ່ສິ່ງທີ່ດີງາມ, ອັນສູງສົ່ງ, ກໍແມ່ນການສະກັດກັ້ນບັນດາຄວາມຜິດພາດໃນໝູ່ພະນັກງານ, ສະມາຊິກພັກແຕ່ລະຄົນ ແລະ ໃນທົ່ວພັກກອມມູນິດຫວຽດນາມ.
ທ່ານ ຫງວຽນຈ້ອງຟຸກ ສັງກັດສະຖາບັນການເມືອງແຫ່ງຊາດໂຮ່ຈິມິນ ຢືນຢັນວ່າ: ເມື່ອອ່ານຄຳພິໄນກຳຂອງ ປະທານ ໂຮ່ຈິມິນ ກ່ຽວກັບຄວາມຮັບຜິດຊອບໃນການເປັນແບບຢ່າງ, ຖ້າແຕ່ລະຄົນເຮັດຖືກຕາມມະໂນທຳ, ຄວາມຮັບຜິດຊອບຂອງຕົນ ແນ່ນອນຈະສ້າງການຫັນປ່ຽນຢ່າງຕັ້ງໜ້າ. ຖ້າສະມາຊິກພັກທຸກຄົນບໍ່ມີຄວາມບໍລິສຸດໃຈໃນການປະຕິບັດວຽກງານນັ້ນຈະບໍ່ສາມາດແກ້ໄຂໄດ້ບັນດາບັນຫາຕົວຈິງທີ່ຂຶ້ນກັບຂົງເຂດຕົນເອງນຳພາ. ທ່ານ ຫງວຽນຈ້ອງຟຸກ ກ່າວວ່າ: ໃນແຕ່ລະກົມກອງຕ້ອງສ້າງການຫັນປ່ຽນໃນໝູ່ພະນັກງານ, ສະມາຊິກພັກກ່ຽວກັບການເປັນແບບຢ່າງ ຫຼື ໃນການດຳເນີນຊີວິດພັກກໍຕ້ອງເອົາໃຈໃສ່ເຖິງການເປັນແບບຢ່າງນັ້ນ ວຽກງານຄຸ້ມຄອງນຳພາສະມາຊິກພັກ, ວຽກງານຄຸ້ມຄອງສິດອຳນາດຈຶ່ງໄດ້ດີ.
ຊີວິດ, ພາລະກິດ, ແບບຢ່າງຂອງປະທານ ໂຮ່ຈິມິນ ຍາມໃດກໍມີຄວາມໝາຍດ້ານການສຶກສາຢ່າງເລິກເຊິ່ງ. ການຮ່ຳຮຽນ ແລະ ປະຕິບັດຕາມແນວຄິດ, ຄຸນສົມບັດ, ແບບແຜນດຳລົງຊີວິດ ໂຮ່ຈິມິນ ແມ່ນຄຳສັ່ງສອນຈາກດວງໃຈ, ກາຍເປັນການກະທຳທີ່ມີຄວາມຕື່ນຕົວໃນທຸກໄລຍະການປະຕິວັດ, ໃນທຸກຂົງເຂດວຽກງານຂອງພະນັກງານ, ສະມາຊິກພັກ, ປະຊາຊົນຫວຽດນາມແຕ່ລະຄົນ. ເຄົາລົບຮັກແພງເພິ່ນ, ພະນັກງານ, ສະມາຊິກພັກແຕ່ລະຄົນຍິ່ງອອກແຮງເປັນແບບຢ່າງ, ຝຶກຝົນຫຼໍ່ຫຼອມ ແລະ ປັບປຸງຕົນເອງໃຫ້ດີກວ່າ, ຍົກສູງຄວາມຮັບຜິດຊອບໃນການເປັນແບບຢ່າງຂອງພະນັກງານ.
