ທະນາຄານແຫ່ງ ສປປ ລາວ ກຳນົດນະໂຍບາຍ ແກ້ໄຂຜົນກະທົບຈາກ ໂຄວິດ-19
ໃນວັນທີ 17 ພຶດສະພານີ້ ທ່ານ ພຸດທະໄຊ ສີວິໄລ ຮອງຫົວໜ້າຜູ້ວ່າການທະນະຄານ ແຫ່ງ ສປປ ລາວ ໃຫ້ຮູ້ວ່າ: ການກຳນົດນະໂຍບາຍ ເພື່ອຫລຸດຜ່ອນຜົນກະທົບ ຈາກການລະບາດຂອງພະຍາດ ໂຄວິດ-19 ຕໍ່ເສດຖະ ກິດຂອງລາວເຮົາ.ຊຶ່ງທະນາຄານ ໄດ້ອອກຂໍ້ຕົກລົງເລກທີ 238/ທຫລ ລົງວັນທີ 26 ມີນາ 2020 ໃຫ້ທະ ນາຄານທຸລະກິດ ແລະ ສະຖາບັນການເງິນ ຜ່ອນຜັນຕໍ່ລູກຄ້າຜູ້ທີ່ໄດ້ຮັບຜົນກະທົບຄື: ການເລື່ອນເວລາຊໍາລະໜີ້ທັງຕົ້ນທຶນ ແລະ ດອກເບ້ຍ, ການປັບຫລຸດອັດຕາດອກເບ້ຍ ແລະ ຄ່າທໍານຽມຕ່າງໆໃຫ້ລູກໜີ້ຂອງຕົນ ບົນພື້ນຖານການປຶກສາຫາລືເພື່ອຮ່ວມກັນແກ້ໄຂ, ການສະໜອງເງິນກູ້ບ້ວງໃໝ່ໃຫ້ແກ່ຜູ້ໄດ້ຮັບຜົນກະທົບຈາກການລະຍາດຂອງພະຍາດດັ່ງກ່າວ ເພື່ອຟື້ນຟູການຜະລິດ ແລະ ປັບປຸງໂຄງສ້າງເງິນກູ້ຄືນໃຫມ່ ໂດຍການກໍານົດອາຍຸສັນຍາ ຫລື ງວດຊໍາລະຕົ້ນທຶນ ແລະ ດອກເບ້ຍເປັນເວລາ 1 ປີ ຫລື ຕາມການຕົກລົງລະຫວ່າງເຈົ້າໜີ້ ແລະ ລູກໜີ້.
ຄ່ຽງຄູ່ກັນນີ້, ທະນາຄານທຸລະກິດ ແລະ ສະຖາບັນການເງິນໃດທີ່ປະຕິບັດມາດຕະການ ແລະ ນະໂຍບາຍດັ່ງກ່າວ ແມ່ນຈະໄດ້ຮັບການຍົກເວັ້ນຄືການ ຈັດຊັ້ນໜີ້ ແລະ ການຫັກເງິນແຮໜີ້ ທີ່ຖືກຈັດຊັ້ນຂອງ ທະນາຄານທຸລະກິດ ແລະ ສະຖາບັນການເງິນ, ສ່ວນ ດ້ານຫລັກການໃນການຈັດຕັ້ງປະຕິບັດຂໍ້ຕົກລົງດັ່ງກ່າວ, ໂດຍສະເພາະກໍານົດການເລື່ອນເວລາຊໍາລະໜີ້, ການຫລຸດອັດຕາດອກເບ້ຍ ແລະ ຄ່າທໍານຽມ ລວມທັງການປ່ອຍກູ້ໃໝ່ເພື່ອຟື້ນຟູທຸລະກິດ ແມ່ນມອບໃຫ້ທະນາຄານທຸລະກິດ ແລະ ສະຖາບັນການເງິນ ຮ່ວມກັນພິຈາລະນາຢ່າງສົມເຫດສົມຜົນ ທັງໝົດແມ່ນແນ່ໃສ່ໃຫ້ທະນາຄານທຸລະກິດ, ສະຖາບັນການເງິນ ແລະ ລູກຄ້າ ມີຄວາມເຂົ້າ ໃຈ ເຫັນໄດ້ຄວາມຫຍຸ້ງຍາກຕົວຈິງ ແລະ ພ້ອມກັນຫາວິທີແກ້ໄຂ ເພື່ອຜ່ານຜ່າຂໍ້ຫຍຸ້ງຍາກໃນຄັ້ງນີ້ໄປດ້ວຍກັນ.
