ໃສ່ໜ້າກາກອະນາໄມ ເພື່ອປອມຕົວອອກຈາກຄຸກ

ໂດຍ: ລູກເມືອງພວນ

Jahquez Scott ນັກໂທດ ອາຍຸ 21 ປີ ສວຍໂອກາດໃນຂະນະທີ່ມີນະໂຍບາຍໃຫ້ນັກໂທດທຸກຄົນຕ້ອງໃສ່ຜ້າອັດປາກ-ດັງ ປອມຕົວເປັນເພື່ອນນັກໂທດອີກຄົນເພື່ອໃຫ້ໄດ້ອອກຈາກຄຸກ.

Jahquez Scott, ອອກຈາກຄຸກ, ໃນລັດ Illinois ໃນວັນທີ 2 ພຶດສະພານີ້, ມາເຖິງປັດຈຸບັນເຈົ້າໜ້າທີ່ຍັງບໍ່ທັນຈັບຕົວຜູ້ກ່ຽວກັບຄືນມາໄດ້. ເຈົ້າໜ້າທີ່ຄ້າຍຄຸມຂັງໃຫ້ຮູ້ວ່າ Jahquez Scott ຖືກກັກຂັງດ້ວຍຂໍ້ຫານຳໃຊ້ອາວຸດໂດຍບໍ່ໄດ້ຮັບອະນຸຍາດ, ດ້ວຍການຄໍ້າປະກັນ 50.000 ໂດລາ. ເມື່ອຮູ້ຂ່າວວ່າ ເພື່ອນນັກໂທດອີກຄົນໜຶ່ງດ້ວຍກັນ ຊື່ Quintin Henderson ອາຍຸ 28 ປີ ໃກ້ຈະໄດ້ຮັບອິດສະຫຼະ (ອອກຈາກຄຸກ), Scott ໄດ້ເວົ້າກັບ Henderson ວ່າຈະໃຫ້ຄ່າຕອບແທນ 1.000 USD ຖ້າປ່ຽນໃຫ້ເຂົາອອກຈາກຄຸກແທນ.

ວັນທີ 2 ພຶດສະພານິ້, Scott ໄດ້ໃສ່ໜ້າກາກອານາໄມໄປປະກອບເອກະສານເພື່ອຈະໄດ້ອອກຈາກຄຸກ ໂດຍແຈ້ງອອກຂໍ້ມູນສ່ວນຕົວຂອງ Henderson. ຊຶ່ງຄ້າຍຄຸມຂັງ Cook ມີນະໂຍບາຍໃຫ້ນັກໂທດທຸກຄົນຕ້ອງໃສ່ໜ້າກາກອານາໄມເພື່ອປ້ອງກັນພະຍາດ ໂຄວິດ-19. Scott ບໍ່ຖືກສົງໄສ ແລະ ສຸດທ້າຍກໍໄດ້ອອກຈາກຄຸກໄປ.

ຫຼັງຈາກນັ້ນ, ເຈົ້າໜ້າທີ່ຈິ່ງພົບເຫັນວ່າ ປ່ອຍຄົນຜິດຕົວ ເມື່ອ Henderson ໄປແຈ້ງຂໍ້ມູນສ່ວນຕົວປະກອບເອກະສານເພື່ອຈະໄດ້ອອກຈາກຄຸກເຊັ່ນດຽວກັນ ແຕ່ບໍ່ມີເອກະສານຕິດຕົວຈັກຢ່າງເລີຍ ເພາະໃຫ້ Scott ເອົາໄປໝົດແລ້ວ. ດັ່ງນັ້ນ Henderson ຈຶ່ງຖືກລົງໂທດອີກໜຶ່ງກະໂທງ: ຊ່ວຍຜູ້ອື່ນໃຫ້ໄດ້ອອກຈາກຄຸກ ແລະ ໃນທີ່ສຸດເຂົາກໍຍັງບໍ່ທັນໄດ້ອອກຄຸກຕາມເຄີຍ. ພ້ອມດຽວກັນນັ້ນ, ເຈົ້າໜ້າທີ່ຄ້າຍຄຸມຂັງກໍໄດ້ຄົ້ນຫານຳຕົວຂອງ Scott ກັບຄືນມາໃຫ້ໄດ້.