ສ.ເກົາຫລີ ເລັ່ງຄວບຄຸມໂຄວິດ-19 ກັງວົນວ່າອາດຈະກັບລະບາດຮອບ 2

ສຳນັກຂ່າວຕ່າງປະເທດລາຍງານວ່າ: ທາງການ ສ.ເກົາຫລີ ເລັ່ງຄວບຄຸມການແພ່ລະບາດໂຄວິດ-19 ຫລັງພົບຜູ້ຕິດເຊື້ອເພີ່ມໃນກຸງໂຊກັບມາເພີ່ມອີກ, ເຮັດໃຫ້ທາງການຕ້ອງທົບທວນແຜນການເປີດຮຽນໃໝ່.

ໃນມື້ວານນີ້, ສ.ເກົາຫລີ ມີລາຍງານຜູ້ຕິດເຊື້ອເພີ່ມໃນທົ່ວປະເທດ 35 ຄົນ ນັບເປັນມື້ທີ 2 ຕິດຕໍ່ກັນທີ່ພົບຜູ້ຕິດເຊື້ອສູງສຸດໃນຮອບ 1 ກວ່າເດືອນ, ເຮັດໃຫ້ເກີດຄວາມວິຕົກກັງວັນວ່າເຊື້ອໂຄວິດອາດຈະກັບມາລະບາດຮອບ 2 ໄດ້. ຜູ້ຕິດເຊື້ອໃໝ່ສ່ວນຫລາຍແມ່ນມາຈາກກຸ່ມນັກທ່ອງທ່ຽວກາງຄືນ ຂະນະນີ້ທາງການກຳລັງເລັ່ງກວດສອບຫາຜູ້ຕິດເຊື້ອໃນກຸ່ມຄົນດັ່ງກ່າວ.

ຈຳນວນຜູ້ຕິດເຊື້ອທີ່ກັບມາເພີ່ມຂຶ້ນອີກເກີດຈຶ້ນຫລັງຈາກທີ່ລັດຖະບານຜ່ອນຜັນມາດຕະການເວັ້ນໄລຍະຫ່າງທາງສັງຄົມ, ພ້ອມກຽມເປີດທຸລະກິດ ແລະ ໂຮງຮຽນທັງໝົດຢ່າງເຕັມທີ່ໃນອີກໃນບໍ່ດົນນີ້.