ສິງກະໂປໜັກສຸດໃນອາຊຽນ ຕິດໂຄວິດມື້ດຽວ 876 ຄົນ ຍອດລວມເພີ່ມເກີນ 2,3 ໝື່ນຄົນ
ສິງກະໂປຍັງໜັກ ພົບຜູ້ຕິດເຊື້ອໂຄວິດຄົນໃໝ່ ມື້ດຽວ 876 ສົ່ງຜົນຈຳນວນຜູ້ຕິດເຊື້ອໄວຣັສມໍລະນະເພີ່ມເກີນ 23.000 ຄົນແລ້ວ ເປັນປະເທດທີ່ມີຜູ້ຕິດເຊື້ອຫລາຍສຸດໃນອາຊຽນ.
ໃນວັນທີ 10 ພຶດສະພາ 2020 ສຳນັກຂ່າວຣອຍເຕີ ແລະ ເວັບໄຊສະເຕຣດທາມຢູ່ສິງກະໂປລາຍງານສະຖານະການການລະບາດຂອງໄວຣັສໂຄໂຣນາສາຍພັນໃໝ່ 2019 ຫລື ໂຄວິດ-19 ຢູ່ສິງກະໂປຍັງໜ້າກັງວົນຕໍ່ເນື່ອງ, ກະຊວງສາທາລະນະສຸກສິງກະໂປຖະແຫລງຢືນຢັນໃນວັນທີ 10 ພຶດສະພາ ພົບຜູ້ຕິດເຊື້ອໃໝ່ໃນໄລຍະ 24 ຊົ່ວໂມງ ອີກ 876 ຄົນ ເຮັດໃຫ້ຈຳນວນຜູ້ຕິດເຊື້ອໂຄວິດ-19 ໃນປະເທດເພີ່ມເປັນ 23.336 ຄົນ ແລະ ມີຜູ້ເສຍຊີວິດຈາກໂຄວິດ-19 ທັງໝົດ 20 ຄົນ.
ກະຊວງສາທາລະນະສຸກສິງກະໂປຖະແຫລງເພີ່ມອີກວ່າ: ສ່ວນຫລາຍຂອງຜູ້ຕິດເຊື້ອໂຄວິດ-19 ໃໝ່ເຫລົ່ານີ້ ເປັນແຮງງານຕ່າງປະເທດທີ່ມີໃບອະນຸຍາດເຮັດວຽກຢູ່ສິງກະໂປ ແລະ ພັກຢູ່ຫໍພັກແຮງງານຄົນຕ່າງປະເທດ ໂດຍໃນຈຳນວນຜູ້ຕິດເຊື້ອໂຄວິດໃໝ່ 876 ຄົນນີ້ ມີພຽງ 3 ຄົນ ເປັນຄົນສິງກະໂປ ແລະ ຜູ້ມີຖິ່ນອາໄສຖາວອນຢູ່ສິງກະໂປ.
ສະເຕຣດທາມລະບຸວ່າ: ສິງກະໂປ ເປັນປະເທດທີ່ພົບຜູ້ຕິດເຊື້ອໄວຣັສໂຄໂຣນາສາຍພັນໃໝ່ຫລາຍທີ່ສຸດໃນພາກພື້ນອາຊຽນ ໂດຍໃຊ້ເວລາ 13 ອາທິດ ນັບແຕ່ພົບຜູ້ຕິດເຊື້ອໂຄວິດຄົນທຳອິດເມື່ອວັນທີ 23 ມັງກອນ ແລະ ຈຳນວນຜູ້ຕິດເຊື້ອໄດ້ຜ່ານຫລັກ 10.000 ຄົນ ໃນວັນທີ 22 ເມສາ ແລະ ໃຊ້ເວລາພຽງ 2 ອາທິດ ຈຳນວນຜູ້ຕິດເຊື້ອເພີ່ມເກີນ 20.000 ຄົນ ໃນວັນທີ 6 ພຶດສະພາຜ່ານມາ.
