UN ເຕືອນຢຸດສ້າງ “ຄວາມກຽດຊັງ” ຊ່ວງລະບາດໂຄວິດ
“ເລຂາທິການ ສປຊ” ເຕືອນຢຸດສ້າງ “ຄວາມກຽດຊັງ” ໃນຊ່ວງລະບາດໂຄວິດ-19 ເຫດພົບຄົນອາຊີຖືກທຳຮ້າຍຮ່າງກາຍ 1.000 ກວ່າຄະດີ ຢູ່ອາເມລິກາ.
ທ່ານ ອັນໂຕນິໂອ ກູເຕີເຣັສ ເລຂາທິການສະຫະປະຊາຊາດ (UN) ໄດ້ຮຽກຮ້ອງໃຫ້ຢຸດການສ້າງຄວາມກຽດຊັງ ໂດຍມຸ່ງເປົ້າໃສ່ການຢຽດເຊື້ອຊາດ ດ້ວຍການເຊື່ອມໂຍງກັບການແຜ່ລະບາດໄວຣັສໂຄໂຣນາສາຍພັນໃໝ່ (ໂຄວິດ-19).
“ການແຜ່ລະບາດໂຄວິດ-19 ຍັງດຳເນີນຕໍ່ໄປ ແລະ ໄດ້ສ້າງຄື້ນສຶນາມິແຫ່ງຄວາມກຽດຊັງ ແລະ ຢ້ານກົວຊາວຕ່າງປະເທດ ເຂົ້າທຳລາຍລ້າງສ້າງຄວາມແຕກແຍກໃຫ້ສັງຄົມ” ເລຂາ ສປຊ ກ່າວ.
ທັງນີ້ ທ່ານ ກູເຕີເຣັສ ບໍ່ໄດ້ກ່າວເຖິງປະເທດໃດປະເທດໜຶ່ງ ແຕ່ການປ່ອຍຂ່າວລືຂອງຄົນບາງກຸ່ມໄດ້ສ້າງຄວາມຢ້ານກົວຄົນຕ່າງປະເທດຢ່າງຕໍ່ເນື່ອງ ທັງຕາມທ້ອງຖະໜົນ ແລະ ໃນໂລກອອນລາຍ. ເຫດນີ້ທຸກປະເທດຕ້ອງຊ່ວຍກັນຢຸດຢັ້ງພຶດຕິກຳດັ່ງກ່າວ.
ສຳນັກຂ່າວ BBC ລາຍງານວ່າ: ເລຂາ ສປຊ ໄດ້ອອກມາກ່າວເຕືອນ ພາຍຫລັງເກີດເຫດການປຸກກະແສຄວາມກຽດຊັງຄົນອາຊີຢູ່ອາເມລິກາ ແລະ ເອີຣົບ ໄລຍະທີ່ມີການແຜ່ລະບາດໂຄວິດ-19 ອີກທັງມີຄົນອາຊີຈຳນວນຫລາຍຖືກທຳຮ້າຍຮ່າງກາຍເພີ່ມຂຶ້ນ.
ເວັບໄຊ Racismiscongtagious.com ລາຍງານສະຖິຕິໃນການຕິດຕາມກະແສການທຳຮ້າຍ ແລະ ຢຽດຄົນອາຊີຢູ່ອາເມລິກາ ນັບແຕ່ວັນທີ 26 ມີນາ ຈົນເຖິງວັນທີ 6 ພຶດສະພາ ພົບວ່າ: ມີເຫດການທຳຮ້າຍຮ່າງກາຍຈາກການສ້າງຄວາມກຽດຊັງຄົນອາຊີສູງເຖິງ 1.497 ກໍລະນີ ໃນຈຳນວນນີ້ເກີດຂຶ້ນໃນທຸລະກິດຫ້າງຮ້ານເຖິງ 44% ໂດຍເຫຍື່ອ 69% ເປັນຜູ້ຍິງຊາວອາຊີ.
