ຜູ້ຊ່ວຍສ່ວນຕົວ “ທ່ານ ທຣຳ” ຕິດເຊື້ອໂຄວິດ-19
ທຳນຽບຂາວເປີດເຜີຍວ່າ: ຜູ້ຊ່ວຍສ່ວນຕົວຂອງປະທານາທິບໍດີ ໂດນັລ ທຣຳ ມີຜົນການກວດຫາເຊື້ອໂຄວິດ-19 ເປັນບວກ ແຕ່ຜົນການກວດປະທານາທິບໍດີ ທຣຳ ແລະ ທ່ານ ໄມ ເພັນ ຮອງປະທານາທິບໍດີອາເມລິກາ ບໍ່ພົບການຕິດເຊື້ອແຕ່ຢ່າງໃດ.
ຜູ້ຊ່ວຍດັ່ງກ່າວ ເຊິ່ງເປັນຜູ້ຊາຍ ແລະ ເປັນເຈົ້າໜ້າທີ່ກອງທັບອາເມລິກາ ຖືເປັນຄົນໃກ້ຊິດຂອງປະທານາທິບໍດີ ທຣຳ ເນື່ອງຈາກທ່ານຈະຕ້ອງເບິ່ງແຍງເລື່ອງການແຕ່ງກາຍໃຫ້ປະທານາທິບໍດີ ທຣຳ ລວມທັງເລື່ອງສ່ວນຕົວອື່ນໆ.
ທັງນີ້ ຕຳແໜ່ງຜູ້ຊ່ວຍສ່ວນຕົວຂອງປະທານາທິບໍດີອາເມລິກາມີມາດົນແລ້ວນັບແຕ່ສະໄໝອະດີດປະທານາທິບໍດີ ຈອດ ວໍຊິງຕັນ ໂດຍປະທານາທິບໍດີອາເມລິກາ ຈະຕ້ອງມີຜູ້ຊ່ວຍສ່ວນຕົວຢ່າງໜ້ອຍໜຶ່ງຄົນ ເພື່ອເບິ່ງແຍງເລື່ອງເສື້ອຜ້າ ແລະ ຄວາມຕ້ອງການສ່ວນຕົວອື່ນໆໃນທຳນຽບຂາວ.
ສື່ລາຍງານວ່າ: ຜູ້ຊ່ວຍສ່ວນຕົວຂອງປະທານາທິບໍດີ ທຣຳ ເລີ່ມສະແດງອາການຂອງໂຄວິດ-19 ໃນວັນທີ 6 ພຶດສະພາ ແລະ ຜູ້ຊ່ວຍຄົນນີ້ບໍ່ໄດ້ມີການໃສ່ຜ້າອັດປາກ-ດັງເມື່ອຢູ່ໃກ້ປະທານາທິບໍດີ ທຣຳ.
ກະຊວງປ້ອງກັນປະເທດຖະແຫລງວ່າ: ຜູ້ຊ່ວຍຄົນນີ້ຈະຖືກກັກຕົວຢູ່ໃນເຮືອນພັກ ແລະ ຈະໄດ້ຮັບການປິ່ນປົວທາງການແພດ ຖ້າມີຄວາມຈຳເປັນ.
ເຖິງຢ່າງໃດກໍດີ, ທຳນຽບຂາວປະຕິເສດຈະລະບຸວ່າ: ປະທານາທິບໍດີ ທຣຳ ຈະຖືກກັກບໍລິເວນ ຫລື ບໍ່ ຫລັງມີການລາຍງານເລື່ອງດັ່ງກ່າວ.
