ບູຖານຖືເອົາວິກິດຊຸກຍູ້ກະສິກຳ
ການລະບາດຂອງພະຍາດໂຄວິດ19ໄດ້ສ້າງຄວາມຫຍຸ້ງຍາກຫຼາຍປະການແກ່ບັນດາປະເທດໃນໂລກໃນການພັດທະນາແຕ່ຢູ່ບູຖານໄດ້ຖືເອົາວິກິດຄັ້ງນີ້ພັດທະນາ ແລະ ສົ່ງເສີມການຜະລິດກະສິກຳພາຍໃນປະເທດຫຼາຍກວ່າເກົ່າ.
ໃນໄລຍະການລະບາດຂອງພະຍາດທຳອິດນັ້ນລັດຖະບານບູຖານໄດ້ຍົກເລີກການນຳເຂົ້າອາຫານຈາກປະເທດໃກ້ຄຽງໂດຍສະເພາະປະເທດອິນເດຍແຕ່ພໍໄດ້ໄລຍະໜຶ່ງຈຶ່ງເຫັນວ່າການຍົກເລີກດັ່ງກ່າວແມ່ນບໍ່ສາມາດດຳເນີນໄດ້ເພາະບູຖານຍັງບໍ່ທັນກຸ້ມຕົນເອງທາງດ້ານສະບຽງອາຫານຢ່າງຮອບດ້ານເທື່ອ,ເພາະສະນັ້ນລັດຖະບານບູຖານຈຶ່ງຄິດວ່າເຖິງເວລາແລ້ວທີ່ຈະເຮັດໃຫ້ປະເທດຕົນກຸ້ມຕົນເອງທາງດ້ານສະບຽງອາຫານ.
ຈາກວິກິດກາຍເປັນໂອກາດ!ທ່ານເຢສເຊເປັນຈໍ(YesheyPenjor)ລັດຖະມົນຕີກະຊວງກະສິກຳຂອງບູຖານກ່າວວ່າ“ຂ້າພະເຈົ້າແຈ້ງໄປຫາເຈົ້າໜ້າທີຂັ້ນເມືອງໃຫ້ຊຸກຍູ້ສົ່ງເສີມການຜະລິດສະບຽງອາຫານຫຼາຍຂຶ້ນໂດຍບໍ່ຕ້ອງກັງວົນເລື່ອງຕະຫຼາດເພື່ອເປັນການກະຕຸ້ນໃຫ້ເຂົາເຈົ້າມີຄວາມກະຕືລືລົ້ນໃຫ້ແກ່ຊາວກະສິກອນ”.
ພ້ອມນັ້ນລັດຖະມົນຕີກະສິກຳຂອງບູຖານຍັງໄດ້ສະເໜີຕໍ່ການນຳຂອງປະເທດໃນການສ້າງທະນາຄານທີ່ສາມາດສະໜອງສິນເຊື່ອທີ່ມີດອກເບ້ຍຕ່ຳຫຼືບໍ່ມີດອກເບ້ຍເລີຍເພື່ອໃຫ້ຊາວກະສິກອນສາມາດນຳໄປລົງທຶນ,ພ້ອມນັ້ນລັດຖະບານຍັງກະກຽມໃຫ້ການຊ່ວຍເຫຼືອທາງດ້ານແນວພັນ ແລະ ວິຊາການໃນການຜະລິດຕື່ມອີກ.
ແຕ່ສິ່ງທ້າທາຍຂອງບູຖານໃນການສົ່ງເສີມການຜະລິດນີ້ກໍຄ້າຍຄືກັນກັບປະເທດເຮົາເຊັ່ນຍັງຂາດລະບົບຊົນລະປະທານ,ບໍ່ມີຕະຫຼາດຈຳໜ່າຍບໍ່ມີການຄ້ຳປະກັນລາຄາ,ຂາດສະຖານທີ່ເກັບມ້ຽນຜົນຜະລິດໄວ້ດົນເຊິ່ງບັນຫາເຫຼົ່ານີ້ໄດ້ຖືກພິຈາລະນາຢ່າງຈິງຈັງກວ່າເກົ່າເມື່ອເຫັນຄວາມຈຳເປັນຂອງປະເທດໃນຊ່ວງວິກິດໂຄວິດ19.
ພ້ອມນັ້ນອີກບົດຮຽນໜຶ່ງທີ່ບູນຖານພົບພໍ້ຄືກັນກັບສປປລາວກໍຄືການອີງອາໄສການນຳເຂົ້າອາຫານຈາກຕ່າງປະເທດອ້ອມຂ້າງຄືສປຈີນ ແລະ ອິນເດຍມາຍາວນານເຊິ່ງເມື່ອມາພົບພໍ້ກັບວິກິດຄັ້ງນີ້ລັດຖະບານຂອງບູຖານຈຶ່ງຖືວ່າເຖິງເວລາແລ້ວທີ່ປະເທດຕ້ອງກຸ້ມຕົນເອງ,ເພິ່ງຕົນເອງເລື່ອງການຜະລິດສະບຽງອາຫານ ແລະ ລັດຖະບານບູຖານຍັງຕັ້ງປະນິທານວ່າ“ອາຫານທີ່ຜະລິດພາຍໃນປະເທດຈະຕ້ອງມີຄຸນນະພາບສູງກວ່າອາຫານນຳເຂົ້າ”.
“ຖ້າເວົ້າແຕ່ປາກບໍ່ລົງທຶນພວກເຮົາຈະບໍ່ສາມາດດຶງດູດຊາວກະສິກອນໂດຍສະເພາະຊາວໜຸ່ມເຂົ້າໃນວຽກງານການຜະລິດນີ້ໄດ້”ທ່ານໂລໄຕເຊຣິງ(LotayTshering)ນາຍົກລັດຖະມົນຕີບູຖານກ່າວ,ເພາະສະນັ້ນລັດຖະບານໄດ້ອະນຸມັດງົບປະມານ13ລ້ານໂດລາໃສ່ສະເພາະແຜນງານການຜະລິດກະສິກຳອິນຊີເຊິ່ງມີຄວາມຕ້ອງການຍິ່ງກວ່າເວລາໃດ.
ບູຖານກຳລັງຈະຖືເອົາບົດຮຽນທີ່ປະສົບຜົນສຳເລັດດ້ານການທ່ອງທ່ຽວທີ່ວ່າ“ເຮັດໜ້ອຍໄດ້ຫຼາຍ”ເຊິ່ງບູຖານຈຳກັດນັກທ່ອງທ່ຽວເຂົ້າປະເທດໂດຍເນັ້ນຄຸນນະພາບເຊິ່ງບູຖານກໍຖືວ່າບົດຮຽນນີ້ສາມາດນຳໃຊ້ກັບການຜະລິດກະສິກຳໄດ້ໂດຍເນັ້ນໃສ່ການຜະລິດທີ່ມີຄຸນນະພາບ,ສະນັ້ນແຜນງານກະຜະລິດກະສິກຳອິນຊີຈຶ່ງເປັນແຜນງານນຳທາງງໃຫ້ປະເທດກ້າວໄປສູ່ການກຸ້ມຕົນເອງແບບຖາວອນ.
ສປປລາວເຮົາກໍເຮັດໄດ້ຖ້າໃຈເຮົາເຖິງ!
