ສື່ອາເມລິກາເຜີຍອິດສະລາແອນພົບ IS ວາງແຜນເຮັດລະເບີດໂນດບຸກ
ວໍຊິງຕັນ 13 ມິຖຸນາ: ສື່ອາເມລິກາລາຍງານວ່າ: ໜ່ວຍຈາລະກຳຂອງລັດຖະບານອິດສະລາແອນເຈາະເຂົ້າລະບົບປະຕິບັດການໃນເຄືອຂ່າຍມືລະເບີດກຸ່ມລັດອິສລາມ (IS) ພົບວ່າ: IS ກຳລັງພັດທະນາລະເບີດໂນດບຸກ ເພື່ອກໍ່ເຫດຢູ່ເຮືອບິນການຄ້າ.
+ ອາເມລິກາອາດຫ້າມເອົາໂນດບຸກຂຶ້ນເຮືອບິນເຂົ້າປະເທດຈາກທົ່ວໂລກ
+ ອາເມລິກາ-ອີຢູ ບໍ່ອອກຄຳສັ່ງຫ້າມເອົາໂນ໊ດບຸກຈາກຖ້ຽວບິນເອີຣົບຂຶ້ນເຮືອບິນ
+ ອາເມລິກາຫ້າມບໍ່ໃຫ້ຜູ້ໂດຍສານ 8 ປະເທດນຳເອົາເຄື່ອງເອເລັກໂຕຣນິກທີ່ໃຫຍ່ກວ່າມືຖືຂຶ້ນເຮືອບິນ
ໜັງສືພິມນິວຢອກທາມສະບັບວັນທີ 12 ມິຖຸນາ ລາຍງານວ່າ: ໜ່ວຍປະຕິບັດການອິນເຕີເນັດຂອງອິດສະລາແອນສາມາດເຂົ້າເຖິງລະຫັດລັບທີ່ມີການປ້ອງກັນຢ່າງແໜ້ນໜາ ແລະ ການພັດທະນາຂັ້ນສູງໃນເຄືອຂ່າຍທາງອິນເຕີເນັດກຸ່ມຕິດອາວຸດ. ນັກເຈາະລະບົບອິດສະລາແອນສາມາດເຂົ້າເຖິງຂັ້ນຂໍ້ມູນເຄືອຂ່າຍມືລະເບີດຢູ່ຊີຣີໃນຫລາຍເດືອນກ່ອນ ເຊິ່ງນຳໄປສູ່ການປະກາດໃນວັນທີ 21 ມີນາ ຫ້າມນຳໂນດບຸກ ແລະ ອຸປະກອນເອເລັກໂຕຣນິກຂະໜາດໃຫຍ່ກວ່າໂທລະສັບມືຖືຂຶ້ນເຮືອນບິນມາອາເມລິກາຈາກສະໜາມບິນ 10 ແຫ່ງໃນຕວກກີ, ຕາເວັນອອກກາງ ແລະ ອາຟຣິກາເໜືອ. ສື່ອາເມລິກາລາຍງານອ້າງເຈົ້າໜ້າທີ່ວ່າ: ການເຈາະລະບົບອິນເຕີເນັດເທື່ອນີ້ເປັນຂໍ້ມູນສຳລັບອາເມລິກາວ່າກຸ່ມ IS ໄດ້ພັດທະນາລະເບີດທີ່ເຄື່ອງສະແກນທົ່ວໄປບໍ່ສາມາດກວດສອບໄດ້ ເພາະຈະເຮັດໃຫ້ມີລັກສະນະຄືແບັດເຕີຣີຂອງໂນດບຸກ. ນອກຈາກນີ້ ຂ່າວລັບອິດສະລາແອນຍັງເຮັດວຽກໄດ້ດີຈາກການທີ່ມີວິທີປົດລະເບີດດ່ັງກ່າວ ໂດຍການທີ່ອິດສະລາແອນເຂົ້າເຖິງຂໍ້ມູນລະເບີດຕິດໄວ້ໃນໂນດບຸກກາຍເປັນຂ່າວສາທາລະນະພາຍຫລັງປະທານາທິບໍດີ ໂດນັນ ທຣຳ ຜູ້ນຳອາເມລິກາ ເປີດເຜີຍແຜນລັບກັບທ່ານ ເຊີເກ ລາບຣອບ ລັດຖະມົນຕີຕ່າງປະເທດຣັດເຊຍ ໃນການພົບກັນຢູ່ທຳນຽບຂາວ ໃນວັນທີ 10 ພຶດສະພາ. ສື່ລາຍງານວ່າ: ການທີ່ອາເມລິການຳເລື່ອງນີ້ມາເປີດເຜີຍສ້າງຄວາມບໍ່ພໍໃຈໃຫ້ແກ່ເຈົ້າໜ້າທີ່ອິດສະລາແອນ.
