WHO ຕອບໂຕ້ອາເມລິກາບໍ່ມີຫລັກຖານ ໄວຣັສມາຈາກຫ້ອງທົດລອງອູ່ຮັ່ນ
ອົງການອະນາໄມໂລກ (WHO) ຖະແຫລງວ່າ: ລັດຖະບານອາເມລິກາບໍ່ມີຫລັກຖານສະໜັບສະໜູນຂໍ້ອ້າງທີ່ເກີດຈາກການຄາດເດົາເອົາເອງຂອງປະທານາທິບໍດີ ໂດນັລ ທຣຳ ວ່າເຊື້ອໂຄໂຣນາໄວຣັສສາຍພັນໃໝ່ເກີດຂຶ້ນໃນຫ້ອງທົດລອງຂອງເມືອງອູ່ຮັ່ນ ປະເທດຈີນ.
“ເຮົາຍັງບໍ່ໄດ້ຮັບຂໍ້ມູນ ຫລື ຫລັກຖານສະເພາະຈາກລັດຖະບານອາເມລິກາກ່ຽວກັບຕົ້ນກຳເນີດຂອງໄວຣັສ ຈາກມຸມມອງຂອງເຮົາເລື່ອງນີ້ຍັງເປັນການຄາດເດົາ” ທ່ານ ໄມເຄິລ ໄຣອັນ ຜູ້ອຳນວຍການເຫດສຸກເສີນຂອງ WHO ກ່າວ.
ຜູ້ອຳນວຍການເຫດສຸກເສີນຂອງ WHO ກ່າວອີກວ່າ: “ເຊັ່ນດຽວກັບອົງການອື່ນໆ ທີ່ອີງກັບຫລັກຖານ, ເຮົາຍິນດີທີ່ຈະຮັບຂໍ້ມູນໃດໆກໍຕາມທີ່ອ້າງອີງເຖິງຕົ້ນກຳເນີດຂອງໄວຣັສ” ທ່ານ ໄຣອັນ ກ່າວ ໂດຍເນັ້ນວ່າ: ນີ້ເປັນຂໍ້ມູນດ້ານສາທາລະນະສຸກທີ່ສຳຄັນຫລາຍສຳລັບການຄວບຄຸມການລະບາດໃນອະນາຄົດ.
ໜຶ່ງວັນກ່ອນໜ້ານີ້, ທ່ານ ທຣຳ ໃຫ້ສັນຍາວ່າຈະມີລາຍງານທີ່ຊັດເຈນຈາກລັດຖະບານອາເມລິກາກ່ຽວກັບຕົ້ນກຳເນີດຂອງການລະບາດຂອງໂຄໂຣນາໄວຣັສໃນປະເທດຈີນ ໂດຍກ່າວອີກວ່າ: ທ່ານສົງໄສວ່າລັດຖະບານຈີນປົກປິດບໍ່ໃຫ້ໂລກຮັບຮູ້ຂອບເຂດການລະບາດ ແລະ ຄວາມສ່ຽງຂອງໂຣກກ່ອນຈະກາຍເປັນໂຣກລະບາດທົ່ວໂລກ.
ສ່ວນທ່ານ ໄມ ປອມເປໂອ ລັດຖະມົນຕີກະຊວງການຕ່າງປະເທດອາເມລິກາ ກ່າວວ່າ: ມີ “ຫລັກຖານອັນໃໝ່” ທີ່ຢືນຢັນວ່າໂຄໂຣນາໄວຣັສທີ່ເຮັດໃຫ້ເກີດການລະບາດໃຫຍ່ມີຈຸດເລີ່ມຂຶ້ນໃນຫ້ອງທົດລອງຢູ່ເມືອງອູ່ຮັ່ນ ປະເທດຈີນ.
