‘ອາເມລິກາ’ ໄຟຂຽວຢາ remdesivir ປິ່ນປົວຜູ້ຕິດເຊື້ອໂຄວິດສຸກເສີນ
ອາເມລິກາໄຟຂຽວໃຊ້ຢາ “ເຣມເດສິເວຍ” ປິ່ນປົວຜູ້ຕິດເຊື້ອໂຄວິດ-19 ໃນກໍລະນີສຸກເສີນ.
ສຳນັກງານອາຫານ ແລະ ຢາອາເມລິກາ (FDA) ເປີດເຜີຍໃນວັນທີ 1 ພຶດສະພາວ່າ: ໄດ້ຮັບການອະນຸມັດໃຫ້ມີການໃຊ້ຢາເຣເດສິເວຍ ຫລື remdesivir ເພື່ອປິ່ນປົວຜູ້ຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ພາຍໃຕ້ອຳນາດຕາມມາດຕະການສຸກເສີນ (Emergency Use Authorization).
FDA ລະບຸໃນເອກະສານຂໍ້ມູນຄວາມຈິງສຳລັບຜູ້ຕິດເຊື້ອ, ຄອບຄົວ ແລະ ຜູ້ເບິ່ງແຍງຜູ້ຕິດເຊື້ອລະບຸວ່າ: ຢາເຣມເດສິເວຍ ບໍ່ໄດ້ຜ່ານການກວດສອບປະເພດດຽວກັນກັບຜະລິດຕະພັນທີ່ໄດ້ຮັບການອະນຸມັດຈາກ FDA.
ທັງນີ້ ຢາເຣມເດສິເວຍ ເປັນຢາຕ້ານໄວຣັສທາງທົດລອງ ເພື່ອປິ່ນປົວຜູ້ຕິດເຊື້ອໂຄວິດ-19 ບາງຄົນໃນໂຮງໝໍ ໂດຍລະບຸອີກວ່າ: ຍັງມີການສຶກສາວິໄຈຕໍ່ໄປກ່ຽວກັບການໃຊ້ຢາດັ່ງກ່າວ.
ທັງນີ້ ບໍລິສັດ ກິລລຽດ ໄຊແອນເຊສ ເຊິ່ງພັດທະນາຢາເຣມເດສິເວຍ ໄດ້ຖະແຫລງໃນວັນທີ 29 ເມສາຜ່ານມາວ່າ: ບໍລິສັດໄດ້ຮັບຂໍ້ມູນທີ່ໜ້າເພິ່ງພໍໃຈໃນການໃຊ້ຢາດັ່ງກ່າວ ໃນການປິ່ນປົວຜູ້ຕິດເຊື້ອໂຄວິດ-19.
ເຖິງຢ່າງໃດກໍຕາມ, ບໍລິສັດກິລລຽດ ລະບຸວ່າ: ຜົນການສຶກສາການໃຊ້ຢາເຣມເດສິເວຍ ເຊິ່ງທາງບໍລິສັດດຳເນີນການຮ່ວມກັບສະຖາບັນພູມແພ້ ແລະ ໂຣກຕິດຕໍ່ແຫ່ງຊາດນັ້ນ ມີຜົນການປິ່ນປົວທີ່ເປັນໄປຕາມເປົ້າໝາຍໃນເບື້ອງຕົ້ນ ໂດຍຜູ້ຕິດເຊື້ອໂຄວິດ-19 ຈຳນວນຢ່າງໜ້ອຍ 50% ທີ່ໄດ້ຮັບຢາດັ່ງກ່າວ ເປັນເວລາ 5 ວັນ ມີອາການດີຂຶ້ນ ແລະ ຜູ້ຕິດເຊື້ອຫລາຍກວ່າ 50% ທີ່ໄດ້ຮັບຢາເຣມເດສິເວຍ ສາມາດອອກຈາກໂຮງໝໍໄດ້ພາຍໃນເວລາ 2 ອາທິດ.
