ຮອງນາຍົກລັດຖະມົນຕີ ສອນໄຊ ສີພັນດອນ ໄຫວຢ້ຽມຢາມແຂວງຈຳປາສັກ
ໃນວັນທີ 7 ມິຖຸນາຜ່ານມານີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະໄດ້ໄປເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງຈຳປາສັກ, ເຊິ່ງມີທ່ານ ບຸນຖອງ ດີວິໄຊ ເຈົ້າແຂວງໆຈຳປາສັກ ພ້ອມດ້ວຍຄະນະນຳແຂວງໃຫ້ການຕ້ອນຮັບຢ່າງອົບອຸ່ນ.
ໂອກາດນີ້, ທ່ານ ສອນໄຊ ສີພັນດອນ ກໍໄດ້ພົບປະໂອ້ລົມການນໍາ ແລະ ພະນັກງານຫລັກແຫລ່ງແຂວງ, ຊຶ່ງໄດ້ຍົກໃຫ້ເຫັນບາງບັນຫາທີ່ຈະໄດ້ພ້ອມກັນເອົາໃຈໃສ່ແກ້ໄຂຄື: ໃຫ້ເອົາໃຈໃສ່ກວດກາຕິດຕາມບັນຫາການລັກລອບຕັດໄມ້ທໍາລາຍປ່າ, ກວດຄືນຂອດບໍລິການທີ່ມີຫລາຍຈຸດ-ຫລາຍປ່ອງ ອັນເປັນການສ້າງຂໍ້ຫຍຸ້ງຍາກໃຫ້ແກ່ນັກລົງທຶນ, ສືບຕໍ່ເສີມຂະຫຍາຍສາຍພົວພັນ ກັບບັນດາປະເທດອ້ອມຂ້າງ, ພ້ອມສຸມໃສ່ພັດທະນາເສດຖະກິດໃຫ້ສືບຕໍ່ຂະຫຍາຍຕົວບໍ່ຫລຸດ 7% ແລະ ເອົາໃຈໃສ່ຄຸ້ມຄອງໂຄງການລົງທຶນຂອງລັດ, ເພີ່ມທະວີວຽກງານກວດສອບ ແລະ ມີມາດຕະການແກ້ໄຂຢ່າງເຂັ້ມງວດ, ສ້າງເງື່ອນເອື້ອອຳນວຍໃຫ້ແກ່ການດຳເນີນທຸລະກິດ, ສ້າງລະບົບປະຕູດຽວ ແລະ ເພີ່ມທະວີການປະສານງານໃຫ້ຫລາຍ, ວ່ອງໄວ, ກວດຄືນການຈັດຕັ້ງປະຕິບັດຄຳສັ່ງເລກທີ 474/ນຍ ວ່າດ້ວຍການຄຸ້ມຄອງລາຄາສິນຄ້າ, ສຸມໃສ່ຈັດຕັ້ງປະຕິບັດການເກັບລາຍຮັບງົບປະມານ, ຊຸກຍູ້ການລົງທຶນ ແລະ ກຸ່ມການຜະລິດຕ່າງໆໃຫ້ມີການຈັດຕັ້ງ ແລະ ການເຄື່ອນໄຫວມີປະສິດທິຜົນ, ຕິດຕາມກວດກາບັນດາໂຄງການໃຫຍ່ຢູ່ໃນແຂວງໃຫ້ເຄື່ອນໄຫວຖືກຕ້ອງຕາມລະບຽບກົດໝາຍ, ພ້ອມເອົາໃຈໃສ່ພັດທະນາວຽກງານວັດທະນະທຳ-ສັງຄົມ ຕິດພັນກັບການສ້າງຮາກຖານການເມືອງ ແລະ ບັນດາທ່າແຮງບົ່ມຊ້ອນຂອງແຂວງ, ໂດຍການມີສ່ວນຮ່ວມຂອງປະຊາຊົນ, ເອົາໃຈໃສ່ການຈັດສັນພູມລຳເນົາ ແລະ ອາຊີບໝັ້ນທ່ຽງ, ພ້ອມກັນຈັດຕັ້ງປະຕິບັດເປົ້າໝາຍພັດທະນາແບບຍືນຍົງ (SDGs), ສືບຕໍ່ປັບປຸງກົງຈັກການຈັດຕັ້ງ, ກວດຄືນການຈັດຕັ້ງປະຕິບັດບັນດານິຕິກຳທີ່ສູນກາງວາງອອກໃນໄລຍະຜ່ານມາໃຫ້ປະກົດຜົນເປັນຈິງ.
ພ້ອມນີ້, ທ່ານຮອງນາຍົກລັດຖະມົນຕີ ແລະ ຄະນະ ກໍໄດ້ໄປຢ້ຽມຢາມຊຸກຍູ້ໂຄງການກໍ່ສ້າງເຂດນິຄົມອຸດສາຫະກຳປາກເຊ-ຍີປຸ່ນ ທີ່ໄດ້ຮັບການສ້າງຕັ້ງຂຶ້ນໃນປີ 2015 ມີເນື້ອທີ່ທັງໝົດ 195 ເຮັກຕາ, ມີໄລຍະສຳປະທານ 50 ປີ, ໂດຍນຳໃຊ້ທຶນທັງໝົດ 62,5 ລ້ານໂດລາສະຫະລັດ ເພື່ອສ້າງເປັນນິຄົມອຸດສາຫະກຳດຶງດູດການລົງທຶນຈາກປະເທດຍີ່ປຸ່ນ ແລະ ສ້າງໃຫ້ເປັນເຂດທີ່ເປັນມິດກັບສິ່ງແວດລ້ອມ. ຈາກນີ້ກໍໄດ້ໄປຢ້ຽມຢາມໂຄງການກໍ່ສ້າງເຂື່ອນໄຟຟ້າເຊນ້ຳນ້ອຍ 2 – ເຊກະຕຳ 1 ທີ່ມີກຳລັງຕິດຕັ້ງ 20,1 ເມັກກາວັດ, ຢ້ຽມຢາມການປູກໝາກໜອດເປັນສິນຄ້າຂອງບໍລິສັດ ດ້າຖັງ ໃນກຸ່ມບໍລິສັດ ຮວ່າງແອງຢາລາຍ ສສ ຫວຽດນາມ, ເຊິ່ງເປັນ 1 ໃນ 4 ກິດຈະກຳພົ້ນເດັ່ນຂອງບໍລິສັດດັ່ງກ່າວໃນເນື້ອທີ່ 870 ກວ່າເຮັກຕາ.
