‘ອາເມລິກາ’ ຕິດເຊື້ອໂຄວິດທະລຸ 1 ລ້ານຄົນ ດຶງຄະແນນສຽງສະໜັບສະໜູນ ‘ທ່ານ ທຣຳ’
“ອາເມລິກາ” ຕິດເຊື້ອໂຄວິດທະລຸ 1 ລ້ານຄົນ ທ່າມກາງຄວາມກັງວົນຈຳນວນຜູ້ເສຍຊີວິດເພີ່ມ ດຶງຄະແນນສຽງສະໜັບສະໜູນປະທານາທິບໍດີ ທຣຳ.
ເວັບໄຊ Worldometers.info ລາຍງານຂໍ້ມູນຕົວເລກຜູ້ຕິດເຊື້ອໄວຣັສໂຄໂຣນາສາຍພັນໃໝ່ ຕົ້ນຕໍໂຣກໂຄວິດ-19 ໃນເວລາ 12:00 ໂມງ ວັນທີ 28 ເມສາ 2020 ຕາມເວລາຢູ່ລາວວ່າ: ຈຳນວນຜູ້ຕິດເຊື້ອຢູ່ອາເມລິກາເພີ່ມເຖິງ 1.010.507 ຄົນ ໂດຍໃນຈຳນວນນີ້ເປັນຜູ້ຕິດເຊື້ອໃໝ່ 151 ຄົນ, ສ່ວນຜູ້ເສຍຊີວິດມີຈຳນວນ 56.803 ຄົນ ໂດຍອາເມລິກາຍັງເປັນປະເທດທີ່ມີຈຳນວນຜູ້ຕິດເຊື້ອໂຄວິດ-19 ຫລາຍທີ່ສຸດໃນໂລກ.
ຮອງລົງມາເປັນ ສະເປນ ຕິດເຊື້ອ 229.422 ຄົນ, ເສຍຊີວິດ 23.521 ຄົນ; ອິຕາລີ ຕິດເຊື້ອ 199.414 ຄົນ, ເສຍຊີວິດ 26.977 ຄົນ; ຝຣັ່ງ ຕິດເຊື້ອ 165.842 ຄົນ, ເສຍຊີວິດ 23.293 ຄົນ; ເຢຍລະມັນ ຕິດເຊື້ອ 158.434 ຄົນ, ເສຍຊີວິດ 6.061 ຄົນ ແລະ ອັງກິດ ຕິດເຊື້ອ 157.149 ຄົນ, ເສຍຊີວິດ 21.092 ຄົນ. ຕາມລຳດັບ.
ຂະນະທີ່ ຈຳນວນຜູ້ຕິດເຊື້ອທົ່ວໂລກ 3.065.176 ຄົນ, ເສຍຊີວິດແລ້ວ 211.631 ຄົນ ແລະ ປິ່ນປົວຫາຍແລ້ວ 922.862 ຄົນ.
ຫລັງຈາກຈຳນວນຜູ້ຕິດເຊື້ອຢູ່ອາເມລິກາເພີ່ມຂຶ້ນຮອດຫລັກລ້ານເປັນທີ່ຮຽບຮ້ອຍ, ດ້ານປະທານາທິບໍດີ ໂດນັລ ທຣຳ ຂອງອາເມລິກາ ໄດ້ອອກມາປະຕິເສດຄຳສັ່ງໄລ່ທ່ານ ອາເລັກ ອາຊາ ທີ່ປຶກສາຝ່າຍສາທາລະນະສຸກ ແລະ ກ່າວພຽງວ່າ: ທ່ານ ອາຊາ ໄດ້ປະຕິບັດໜ້າທີ່ຢ່າງດີທີ່ສຸດແລ້ວ.
ເລື່ອງດັ່ງກ່າວເກີດຂຶ້ນຫລັງມີລາຍງານຂ່າວຜ່ານສື່ຢູ່ອາເມລິກາວ່າ: ປະທານາທິບໍດີ ທຣຳ ກຳລັງສູນເສຍຄະແນນສຽງສະໜັບສະໜູນລົງເລື້ອຍໆ ຖ້າອັດຕາການຕິດເຊື້ອ ແລະ ຄົນຕາຍຈາກໂຄວິດ-19 ຍັງເພີ່ມຂຶ້ນຢ່າງຕໍ່ເນື່ອງ ຫລາຍຝ່າຍຍັງຫວັງໄປເຖິງອັດຕາການວ່າງວຽກຢູ່ອາເມລິກາອາດຈະເພີ່ມຂຶ້ນ 16% ອາດຈະເກີດຂຶ້ນໄດ້.
