ນິວຊີແລນ ປະກາດເອົາຊະນະ ໂຄວິດ-19 ແລ້ວ
ໂດຍ: ລູເມືອງພວນ
ນາຍົກລັດຖະມົນຕີ ນິວຊີແລນ Jacinda Ardern ຢືນຢັນວ່າ ນິວຊີແລນ ໄດ້ “ຮັບໄຊຊະນະແລ້ວ” ໃນບັ້ນຮົບຕໍ່ສູ້ກັບໄພມະຫາພິບັດໃນຄັ້ງນີ້ ແລະ ໄດ້ປົດລ໊ອກດາວ ປະເທດແລ້ວ.
ທ່ານ ນາຍົກກ່າວວ່າ: “ບໍ່ມີການແຜ່ລະບາດເປັນວົງກວ້າງອີກຕໍ່ໄປ ແລະ ບໍ່ພົບກໍລະນີຕິດເຊື້ອອີກໃນ ນິວຊີແລນ. ພວກເຮົາໄດ້ຮັບໄຊຊະນະແລ້ວ. ແຕ່ພວກເຮົາຍັງຈະຕ້ອງມີສະຕິລະວັງຕົວຕໍ່ໄປ ຖ້າຫາກຢາກເອົາຊະນະຢ່າງແທ້ຈິງ”.
ພາຍຫຼັງ 5 ອາທິດທີ່ມີການແຈ້ງເຕືອນໂຄວິດ-19 ຢູ່ໃນລະດັບ 4 ຊຶ່ງເປັນການແຈ້ງເຕືອນຂັ້ນສູງສຸດ ແລະ ປະກາດປິດປະເທດຢ່າງສົມບູນແບບແລ້ວ, ວັນທີ 27 ເມສານີ້, ນິວຊີແລນໄດ້ປະກາດຫຼຸດການແຈ້ງເຕືອນລະດັບ 4 ມາເປັນລະດັບ 3 ໃນເວລາ 0 ໂມງຂອງວັນດຽວກັນນີ້. ພາກທຸລະກິດ, ຮ້ານຄ້າຂາຍພືດຜັກ, ໂຮງຮຽນ ໄດ້ກັບຄືນມາເປີດໃຫ້ບໍລິການອີກຄັ້ງ.
ເຖິງຢ່າງໃດກໍດີ, ນາຍົກລັດຖະມົນຕີ ທ່ານ ນາງ Ardern ກ່າວເຕືອນວ່າ ຍັງບໍ່ທັນມີຄວາມແນ່ນອນວ່າຈະບໍ່ມີການແຜ່ລະບາດຂອງໂຄວິດ-19ອີກຄັ້ງ. ທຸກຄົນລ້ວນແຕ່ຢາກກັບຄືນມາເຫັນສະພາບເໝືອນເດີມ. ແຕ່ເພື່ອໃຫ້ມີຄວາມແນ່ໃຈນັ້ນ ພວກເຮົາຕ້ອງມີຄວາມລະມັດລະວັງ ໃນການປະພຶດກະທຳຂອງຕົວເຮົາເອງ.
ທ່ານ ຢືນຢັນວ່າ ບໍ່ສ່ຽງທີ່ຈະເອົາຊີວິດຂອງປະຊາຊົນນິວຊີແລນມາແລກກັບໝາກຜົນທີ່ຍາດມາໄດ້.
ພາຍຫຼັງປົດລ໊ອກປະເທດແລ້ວ, ນິວຊີແລນ ພົບເຫັນຜູ້ຕິດເຊື້ອພຽງ 1 ກໍລະນີເທົ່ານັ້ນ ຕະຫຼອດໄລຍະ 24 ຊົ່ວໂມງທີ່ຜ່ານມາ, ເຮັດໃຫ້ຕົວເລກຜູ້ຕິດເຊື້ອທັງໝົດຂຶ້ນເປັນ 1.122 ຄົນ, ໃນນັ້ນ 19 ເສຍຊີວິດ ແລະ 1.180 ຄົນ ປິ່ນປົວດີ.
