ພາລະກິດທີ່ໜັກໜ່ວງຂອງນັກຮົບຊຸດຂາວ ລາວຮັບມືສັດຕູສອງໂຕພາບດຽວ

ໂດຍ: ລູກເມືອງພວນ

ໃນຂະນະນີ້, ນັກຮົບຊຸດຂາວກຳລັງຂຸ້ນຂ້ຽວເຮັດໜ້າທີ່ໜັກໜ່ວງກັບສັດຕູໂຄວິດ-19 ທັງເວັນ ແລະ ຄືນ. ສັດຕູໂຄວິດ ຍັງບໍ່ທັນຖືກຕີຖອຍຢ່າງຮາບຄາບອອກຈາກປະເທດລາວ ຊໍ້າພັດມີສັດຕູໂຕໃໝ່ລຸກລໍ້າເຂົ້າມາສົມທົບກັບໂຄວິດ ເອົາຊີວິດຂອງຄົນລາວໄປອີກ ນັ້ນຄືສັດຕູ ໄຂ້ຍຸງລາຍ ຫຼື ໄຂ້ເລືອດອອກທີ່ກຳລັງລະບາດຢູ່ໃນຫຼາຍແຂວງຂອງປະເທດລາວໃນຂະນະນີ້.

ອີງຕາມຫຼາຍແຫຼ່ງຂ່າວໃຫ້ຮູ້ວ່າ ຂະນະນີ້ ໄຂ້ຍຸງລາຍ ຫຼື ໄຂ້ເລືອດອອກກຳລັງລະບາດເປັນວົງກ້ວາງຢູ່ໃນປະເທດລາວ, ຊຶ່ງມາເຖິງປັດຈຸບັນມີຜູ້ປ່ວຍໄຂ້ຍຸງລາຍໄປແລ້ວ 904 ຄົນ, ໃນນັ້ນມີຜູ້ເສຍຊີວິດແລ້ວ 1 ຄົນ ໃນນະຄອນຫຼວງວຽງຈັນ.

ອີງຕາມການລາຍງານຂອງກະຊວງສາທາລະນະສຸກໃຫ້ຮູ້ວ່າ ວັນທີ 27 ເມສານີ້, ນັບແຕ່ວັນທີ 28 ທັນວາ 2019 ຜ່ານມາ ຫາວັນທີ 24 ເມສາ 2020ນີ້ ທົ່ວປະເທດໄດ້ມີກໍລະນີສະສົມພະຍາດໄຂ້ຍຸງລາຍທັງໝົດ 904 ຄົນ, ເສຍຊີວິດ 1 ຄົນ.

ກະຊວງດັ່ງກ່າວຍັງຊີ້ໃຫ້ເຫັນຈຳນວນຜູ້ໄຂ້ຍຸງລາຍໃນແຕ່ລະແຂວງດັ່ງນີ້: ນະຄອນຫຼວງ 283 ກໍລະນີ, ອັດຕະປື 153 ກໍລະນີ, ແຂວງວຽງຈັນ 105 ກໍລະນີ, ສາລະວັນ 62 ກໍລະນີ, ບໍລິຄຳໄຊ 55 ກໍລະນີ, ສະຫວັນນະເຂດ 48 ກໍລະນີ, ໄຊຍະບູລີ 37 ກໍລະນີ, ເຊກອງ 27 ກໍລະນີ, ຫຼວງນໍ້າທາ 37 ກໍລະນີ, ອຸດົມໄຊ 21 ກໍລະນີ, ຈຳປາສັກ 6 ກໍລະນີ, ຜົ້ງສາລີ 5 ກໍລະນີ, ຫຼວງພະບາງ 3 ກໍລະນີ. ຊຽງຂວາງ, ໄຊສົມບຸນ, ບໍ່ແກ້ວ ຍັງບໍ່ພົບຈັກກໍລະນີ.

ເມື່ອມີສັດຕູສອງໂຕບຸກລຸກຄືແນວນັ້ນ, ເປັນອັນແນ່ນອນວ່າ ພາລະກິດປະຕິວັດທີ່ທີ່ເຂັ້ມແຂງ ແລະ ອົງອາດກ້າຫານທີ່ສຸດກໍບໍາມົ້ມນັກຮົບຊຸດຂາວນັ້ນເອງ. ໂດຍສືບຕໍ່ມູນເຊື້ອປະຕິວັດອັນອົງອາດກ້າແກ່ນກັບສັດຕູໂຄວິດ-19 ມາແລ້ວ ຫວັງຢ່າງຍິ່ງວ່າ ນັກຮົບຊຸດຂາວຈະເອົາຊະນະສັດຕູໄຂ້ຍຸງລາຍໄດ້ຢ່າງມີໄຊ ດັ່ງທີ່ໄດ້ເຮັດກັບ ໂຄວິດທີ່ຜ່ານມາ.

ແຕ່ສີ່ງທີ່ສຳຄັນ ຈະແມ່ນເຫດການໃດເກີດຂຶ້ນກໍຕາມ ປັດໄຈຕັດສິນເອົນຊະນະຍັງຂຶ້ນຢູ່ກັບຄວາມສາມັກຄີ, ການສະໜັບສະໜູນ ແລະ ການຮ່ວມມືຂອງປະຊາຊົນທັງຊາດນັ້ນເອງ.