ເປັນມື້ທີ 14 ແລ້ວລາວບໍ່ມີກໍລະນີຕິດເຊື້ອໂຄວິດ-19 ໃຫມ່ພ້ອມສາມາດປິ່ນປົວ ຜູ້ປ່ວຍຫາຍດີແລ້ວ 7 ຄົນ

ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ COVID-19 ໄດ້ຖະແຫລງຂ່າວຕໍ່ສື່ມວນຊົນໃນວັນທີ 26 ເມສານີ້ວ່າ: ມາຮອດມື້ນີ້ເປັນມື້ທີ 14 ມື້ແລ້ວທີ່ລາວເຮົາ ບໍ່ມີຜູ້ຕິດເຊື້ອໃໝ່. ຊຶ່ງຍັງສາມາດປິ່ປົວຜູ້ຕິດເຊື້ອສະສົມ 19 ຄົນນັ້ນ, ໄດ້ອອກໂຮງໝໍແລ້ວ 7 ຄົນ ແລະ ຍັງເຫຼືອ 12 ຄົນ ກຳລັງສືບຕໍ່ຕິດຕາມ ປິ່ນປົວອາການຢ່າງໃກ້ຊິດ ແລະ ມີອາການປົກກະຕິດີຂຶ້ນ, ສ່ວນສະພາບການແຜ່ລະບາດຂອງພະຍາດດັ່ງກ່າວເຫັນວ່າຜ່ອນຄາຍລົງ,ນີ້ກໍ່ຍ້ອນວ່າ ປະຊາຊົນບັນດາເຜົ່າ ໄດ້ເປັນເຈົ້າການ ຮ່ວມໄມ້ຮ່ວມມື ໃນການຈັດຕັ້ງປະຕິບັດ ຄໍາສັ່ງ ເລກທີ 06/ນຍ, ໄປຄຽງຄູ່ກັບການບໍ່ລົດລະມາດຕະການເຝົ້າລະວັງ ຕິດຕາມຄົ້ນຫາ ຜູ້ສົງໄສທີ່ຈະຕິດເຊື້ອ, ໂດຍສະເພາະຜູ້ທີ່ຍັງຈຳກັດບໍລິເວນຕົນເອງຢູ່ສູນ ແລະ ຢູ່ເຮືອນ. ສໍາລັບຜູ້ທີ່ຈະເດີນທາງຜ່ານຊາຍແດນເຂົ້າມາໃໝ່,ກໍໄດ້ເຂັ້ມງວດກວດກາກັ່ນຕອງຕາມມາດຕະການ ເລີ່ມແຕ່ປະເທດຕົ້ນທາງເຂົ້າມາຜ່ານຊາຍແດນ ແລະ ເວລາເຂົ້າມາເຖິງປະເທດເຮົາຢ່າງຖືກຕ້ອງ ແລະ ເຂັ້ມງວດ ເພື່ອສະກັດກັ້ນ ບໍ່ໃຫ້ມີການລະບາດຄືນຄັ້ງທີ2.

ສະນັ້ນ ຈຶ່ງຮຽກຮ້ອງໃຫ້ປະຊາຊົນບັນດາເຜົ່າ, ອົງການຈັດຕັ້ງທຸກພາກສ່ວນ ຈົ່ງສືບຕໍ່ຮ່ວມໄມ້ຮ່ວມມື ເປັນເຈົ້າການຈັດຕັ້ງປະຕິບັດຄຳສັ່ງ ເລກທີ 06/ນຍ ແລະ ບັນດາຂໍ້ແນະນຳຕ່າງໆຢ່າງຖືກຕ້ອງ ແລະ ເຂັ້ມງວດ ຈົນຮອດວັນທີ 03 ພຶດສະພາທີ່ຈະມາເຖິງນີ້,ຖ້າວ່າບັນດາທ່ານ ຫຼື ຄົນໃນຄອບຄົວມີອາການຄ້າຍຄືໄຂ້ຫວັດ, ໄຂ້ ຫຼື ອາການຜິດປົກກະຕິອື່ນໆ ຂໍໃຫ້ມາກວດນໍາແພດໝໍຢູ່ໂຮງໝໍ ບໍ່ໃຫ້ຢ້ານວ່າຈະມາຕິດເຊື້ອ, ເພາະຢູ່ໂຮງໝໍ ແຕ່ລະແຫ່ງໄດ້ມີການຈັດສັນລະບົບ ຄັດແຍກຜູ້ສົງໃສເປັນພະຍາດ COVID-19 ແລະ ຜູ້ເຈັບເປັນທົ່ວໄປອອກຈາກກັນ ເປັນເຂດໜຶ່ງສະເພາະຢ່າງມີຄວາມປອດໄພ. ພັກ ແລະ ລັດຖະບານເຮົາຍາມໃດກໍໄດ້ເປັນຫ່ວງເປັນໄຍ ຕໍ່ການຄວບຄຸມ ແລະ ການແກ້ໄຂການ ລະບາດຂອງພະຍາດດັ່ງກ່າວ ແລະ ໄດ້ວາງມາດຕະການ ແລະ ຂໍ້ແນະນຳຕ່າງໆ ເພື່ອຊ່ວຍແກ້ໄຂຜົນກະທົບຕໍ່ການດຳລົງຊີວິດປະຈໍາວັນຂອງປະຊາຊົນ ກໍ່ຄືການກະ ທົບຕໍ່ການດໍາເນີນທຸລະກິດ,ແຕ່ກໍ່ຂໍຮຽກຮ້ອງໃຫ້ທຸກຄົນມີຄວາມອົດທົນ ພ້ອມກັນຜ່ານຜ່າວິກິດນີ້ ແລະ ຂໍໃຫ້ມີສະຕິປ້ອງກັນຕົນເອງ, ປ້ອງກັນ ຄອບຄົວ ແລະ ຜູ້ທີ່ຮັກແພງໃກ້ຊິດກັບບັນດາທ່ານຈາກການຕິດເຊື້ອພະຍາດນີ້, ສິ່ງນັ້ນຖືວ່າແມ່ນພັນທະ ແລະ ຄວາມຮັບຜິດຊອບຂອງບັນດາທ່ານ ແລະ ເປັນການປະກອບສ່ວນອັນສຳຄັນໃຫ້ແກ່ປະເທດຊາດ ແລະ ພ້ອມນີ້ກໍເຕືອນສະຕິໃຫ້ປະຊາຊົນບັນດາເຜົ່າເອົາໃຈໃສ່ປ້ອງກັນໂຕເອງຕໍ່ພະຍາດຕາມລະດູການວ່າເລີ້ມເຂົ້າລະດູຝົນ ແມ່ນລະດູການຂອງໄຂ້ເລືອດອອກ ແລະ ພະຍາດຊືມເຊື້ອອື່ນໆ ໂດຍສະເພາະພະຍາດທີ່ກັນໄດ້ດ້ວຍວັກຊີນ ເປັນຕົ້ນ: ພະຍາດຄໍຕີບ, ໄຂ້ໝາກແດງ, ໄອໄກ່ແລະ ອື່ນໆ.

ຄະນະສະເພາະກິດດັ່ງກ່າວໃຫ້ຮູ້ວ່າ: ສະພາບການລະບາດຂອງປະເທດໃກ້ຄຽງ ແລະ ຢູ່ໃນໂລກ ເຫັນວ່າ:ມາຮອດເວລາ 6:00 ໂມງເຊົ້າ ຂອງວັນທີ 26 ເມສາ ນີ້, ທົ່ວໂລກມີລາຍງານການລະບາດ ທັງໝົດ 210 (ປະເທດ/ເຂດ). ມີການຢັ້ງຢືນ ຜູ້ຕິດເຊື້ອພະຍາດ COVID-19 ເກືອບ 3 ລ້ານຄົນແລ້ວ ໃໝ່85.884 ຄົນ, ມີຜູ້ເສຍຊິວິດ 202.991 (ໃໝ່5,892ຄົນ),ປີ່ນປົວຫາຍດີ 834.396 (ໃໝ່54,313ຄົນ). ຜູ້ປິ່ນປົວຫາຍດີປະຈໍາວັນກວມເອົາ 63,2% ຂອງຈໍານວນຜູ້ຕິດເຊື້ອໃໝ່ປະຈໍາວັ, ມີບາງປະເທດ ຈຳນວນຜູ້ຕິດເຊື້ອມື້ດຽວ ມີເຖິງ 32.064 ຄົນ ແລະ ເສຍຊີວິດສູງເຖິງ1.946ຄົນຕໍ່ມື້.ມາຮອດມື້ນີ້ອັດຕາຄວາມຮ້າຍແຮງຂອງການແຜ່ລະບາດ ເທົ່າກັບວານນີ້ 6,96 % ເຊັ່ນກັນ. ສະເພາະກຸ່ມປະເທດອາຊຽນ ຍັງມີບາງປະເທດທີ່ມີອັດຕາການຕິດເຊື້ອ ແລະ ເສຍຊີວິດສູງຢູ່ ບາງປະເທດຕິດເຊື້ອໃໝ່ຄື: ໃນວັນທີ 26 ເມສານີ້ມີກໍລະນີສູງເຖິງ 618 ຄົນ ແລະ ເສຍຊີວິດໃນມື້ດຽວ ຢູ່ກຸ່ມປະເທດອາຊຽນ ມີ 51 ຄົນ.