ພົບແມວ 2 ໂຕໃນນິວຢອກຕິດໂຄວິດ-19
ແມວ 2 ໂຕນີ້ຖືເປັນສັດລ້ຽງ 2 ໂຕທຳອິດຢູ່ອາເມລິກາທີ່ຕິດເຊື້ອໂຄໂຣນາໄວຣັສ.
ທາງການອາເມລິກາຢືນຢັນພົບແມວ 2 ໂຕໃນລັດນິວຢອກຕິດເຊື້ອໂຄໂຣນາ ໂດຍທັງສອງໂຕມີອາການບໍ່ຮຸນແຮງ. ຖືເປັນສັດລ້ຽງ 2 ໂຕທຳອິດທີ່ຕິດເຊື້ອດັ່ງກ່າວ ຫລັງຈາກສິງໂຕ 8 ໂຕ ແລະ ເສືອອີກ 1 ໂຕໃນສວນສັດນິວຢອກຕິດເຊື້ອໄປກ່ອນໜ້ານີ້.
ແມວທັງສອງໂຕໄດ້ຮັບການກວດຫາເຊື້ອໂຄໂຣນາໄວຣັສຫລັງຈາກມີອາການກ່ຽວກັບທາງເດີນຫາຍໃຈ ໂດຍໂຕທຳອິດເຈົ້າຂອງ ແລະ ຄົນໃນເຮືອນດຽວກັນບໍ່ມີໃຜຕິດເຊື້ອ Covid-19 ເຈົ້າໜ້າທີ່ຈຶ່ງສັນນິຖານວ່າມັນອາດໄດ້ຮັບເຊື້ອຈາກຄົນອື່ນຈາກນອກເຮືອນ ຫລື ອາດຕິດຈາກຄົນໃນເຮືອນທີ່ມີອາການບໍ່ຮຸນແຮງ ຫລື ບໍ່ສະແດງອາການ.
ສ່ວນໂຕທີສອງ ເຊິ່ງຢູ່ກັນຄົນລະພື້ນທີ່ ເຈົ້າຂອງຖືກກວດພົບວ່າຕິດເຊື້ອ Covid-19 ກ່ອນທີ່ມັນຈະມີອາການຕິດເຊື້ອ, ແຕ່ແມວກອີກໂຕໜຶ່ງທີ່ຢູ່ໃນເຮືອນດຽວກັນບໍ່ມີອາການ.
ເຖິງຢ່າງໃດກໍດີ, ແອນໂທນີ ຟໍຊີ ຜູ້ຊ່ຽວຊານດ້ານໂຣກຕິດຕໍ່ຂອງອາເມລິກາ ເປີດເຜີຍວ່າ: ຍັງບໍ່ພົບຫລັກຖານວ່າແມວສາມາດແຜ່ເຊື້ອໂຄໂຣນາໄວຣັສສູ່ມະນຸດ.
ຂະນະທີ່ສູນຄວບຄຸມ ແລະ ປ້ອງກັນໂຣກອາເມລິກາ (CDC) ແນະນຳໃຫ້ເຈົ້າຂອງຫລີກລ່ຽງການສຳຜັດກັບສັດລ້ຽງ ລວມທັງຈຳກັດບໍ່ໃຫ້ສັດລ້ຽງສຳຜັດກັນ ໂດຍຖ້າເປັນໄປໄດ້ບໍ່ຄວນພາແມວອອກນອກເຮືອນໃນໄລຍະນີ້, ສ່ວນໝາຄວນໃຊ້ເຊືອກຈູງ ແລະ ເວັ້ນໄລຍະຫ່າງຈາກຄົນ ແລະ ສັດລ້ຽງອື່ນຢ່າງໜ້ອຍ 1,8 ແມັດ.
