ຊົມເຊີຍແພດໝໍລາວເກັ່ງຫຼາຍ

ໂດຍ: ລູກເມືອງພວນ

ຜ່ານມາ, ໃຜກໍຄິດວ່າແພດໝໍລາວບໍ່ມີຄວາມຮູ້ຄວາມສາມາດ(ບໍ່ເກັ່ງ) ແຕ່ເມື່ອມີສະຖານະການແບບນີ້ເກີດຂຶ້ນຈຶ່ງຮູ້, ເຫັນລິດເດດຂອງແພດໝໍລາວ. ຊຶ່ງບໍ່ຕ່າງຫຍັງກັບແພດໝໍຕ່າງປະເທດ, ຊຶ່ງສະແດງອອກໃຫ້ເຫັນຄວາມເກັ່ງ ບາງດ້ານດັ່ງນີ້:
1. ສາມາດປິ່ນປົວຜູ້ຕິດເຊື້ອໃຫ້ຫາຍຂາດໄດ້(ບໍ່ມີຜູ້ເສຍຊີວິດ).
2. ປິ່ນປົວຜູ້ຕິດເຊື້ອທີ່ກຳລັງນອນຢູ່ໂຮງໝໍໃນຂະນະນີ້ໃຫ້ມີອາການດີຂື້ນຕາມລຳດັບ.
3. ສາມາດຕິດຕາມ ແລະ ບົ່ງມະຕິພະຍາດໄດ້ຢ່າງຖືກຕ້ອງຊັດເຈນ. ຜູ້ປ່ວຍຈຳນວນໜຶ່ງຫາຍດີເກີນຄາດໝາຍ.
4. ມີຄວາມສາມາດປະສານງານ, ເຮັດວຽກຮ່ວມ ແລະ ປະຕິບັດມາດຕະການ ຕາມທຸກຂັ້ນຕອນຂອງສາກົນໄດ້ດີ.
5. ມີຄວາມຮູ້ ຄວາມສາມາດນຳໃຊ້ເຄື່ອງມື, ອຸປະກອນການແພດທີ່ທັນສະໃໝໄດ້, ຮູ້ນຳໃຊ້ຢາປົວພະຍາດຢ່າງຖືກຕ້ອງແມ່ນຢຳ.
6. ສາມາດເປັນເສນາທິການທີ່ເຂັ້ມແຂງ ແລະ ເຊື່ອໝັ້ນໃຫ້ລັດຖະບານ.
7. ມີນໍ້າໃຈເສຍສະຫຼະເພື່ອພີ່ນ້ອງຮ່ວມຊາດຢ່າງແທ້ຈິງ.
ໃນຂະນະທີ່ມີຫຼາຍປະເທດຍັງມີຜູ້ຕິດເຊື້ອ ແລະ ເສຍຊີວິດເພີ່ມຂຶ້ນຢ່າງຕໍ່ເນື່ອງ.
ສ່ວນລາວເຮົາບໍ່ສະເພາະແຕ່ຕົວເລກຜູ້ຕິດເຊື້ອຢຸດຈຶ້ງເທົ່າເກົ່າ(19 ຄົນ) ແຕ່ຫາກຍັງປິ່ນປົວດີອີກຈຳນວນໜຶ່ງ, ສ່ວນທີ່ຍັງເຫຼືອກໍມີອາການດີຂຶ້ນຕາມລຳດັບ. ຄາດວ່າບໍ່ດົນກໍຈະໄດ້ອອກຈາກໂຮງໝໍທັງໝົດ.
ທັງໝົດນັ້ນແມ່ນຜົນງານຊິ້ນໃໝ່ໃນວົງການແພດໝໍລາວ, ຊຶ່ງພິສູດໃຫ້ສາກົນ ແລະ ປະຊາຊົນລາວເຫັນວ່າແພດໝໍລາວກໍເກັ່ງ ບໍ່ນ້ອຍໜ້າໃກ້ປະເທດໃດໃນໂລກ.

ພວກເຮົາຈົ່ງມີຄວາມເຊື່ອໝັ້ນໃນຄວາມສາມາດຂອງແພດໝໍລາວເທີ້ນ. ພວກເຮົາຈົ່ງພ້ອມໃຈກັນເປັນກຳລັງໃນໃຫ້ແພດໝໍລາວ ເພື່ອເອົາຊະນະສັດຕູໂຄວິດ-19 ຄັ້ງນີ້ໄດ້ຢ່າງມີໄຊ. ຊົມເຊີຍແພດໝໍລາວເກັ່ງຫຼາຍ!