‘ຟີລິບປິນ-ຍີ່ປຸ່ນ’ ກຽມທົດສອບ Avigan ທາງຄລີນິກ
ຟີລິບປິນ-ຍີ່ປຸ່ນ ກຽມທົດສອບຢາ Avigan ຫລື ຊື່ທາງການແພດ Favipiravir ປິ່ນປົວຜູ້ຕິດເຊື້ອໂຄວິດ.
ມີລາຍງານວ່າ: ຟີລິບປິນ ແລະ ຍີ່ປຸ່ນ ກຳລັງກະກຽມສຳລັບທົດສອບທາງຄລີນິກສຳລັບຢາອາວີແກນ (Avigan) ຫລື ຮູ້ຈັກກັນໃນຊື່ທາງການແພດວ່າ: ຟາວິພິຣາເວຍ (Favipiravir) ເຊິ່ງເປັນຢາປິ່ນປົວພະຍາດໄຂ້ຫວັດໃຫຍ່ ກ່ອນທ້າຍເດືອນນີ້ ໂດຍຫວັງວ່າຈະສາມາດໃຊ້ຢາອາວີແກນ ໃນການປິ່ນປົວຜູ້ຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19).
ທັງນີ້ ຜູ້ນຳຟີລິບປິນສະແດງຄວາມເຕັມໃຈໃນການເຂົ້າຮ່ວມໂຄງການທົດສອບທາງຄລີນິກສຳລັບຢາອາວີແກນ. ຂະນະທີ່ ຍີ່ປຸ່ນຈະແຈກຢາດັ່ງກ່າວຟຣີໃຫ້ແກ່ 50 ປະເທດທີ່ສະແດງຈຸດປະສົງກັບຍີ່ປຸ່ນ. ນອກຈາກນີ້ ຟີລິບປິນ ຈະເຂົ້າຮ່ວມໂຄງການຂອງອົງການອະນາໄມໂລກ (WHO) ໃນການທົດສອບທາງຄລີນິກສຳລັບຢາ hydroxychloroquine, chloroquine, lopinavir, ritonavir plus interferon ແລະ remdesivir ເພື່ອເບິ່ງປະສິດທິພາບໃນການປິ່ນປົວໂຄວິດ-19.
ເຖິງຢ່າງໃດກໍຕາມ, ປັດຈຸບັນ ຟີລິບປິນມີຜູ້ຕິດເຊື້ອໂຄວິດ-19 ຈຳນວນ 5.660 ຄົນ ແລະ ມີຜູ້ເສຍຊີວິດຈຳນວນ 362 ຄົນ.
