ຍາມວິກິດ ຄິດເລື່ອງອາຫານ

ໂດຍ:​ມຶກບໍ່ແຫ້ງ

ອາຫານແມ່ນປັດໄຈ ພື້ນຖານທີ່ຈຳເປັນທີ່ສຸດລຳລັບພວກເຮົາ, ຄວາມໝັ້ນຄົງທາງດ້ານສະບຽງອາຫານ ສາມາດຕ້ານຄວາມອຶດຫິວ ໃນຍາມວິກິດໄດ້.

ການປິດບ້ານ ປິດເມືອງ ຈົນໄປຮອດ ການປິດປະເທດ, ຫ້າມຄົນອອກຈາກບ້ານຈາກເຮືອນ ເພື່ອຄວບຄຸມການ ລະບາດຂອງພະຍາດໂຄວິດ 19 ທີ່ກຳລັງຂົ່ມຂູ່ຊີວິດມະນຸດນທົ່ວໂລກ ປັດຈຸບັນ ນັ້ນ ສິ່ງທີ່ແຕ່ລະຄົນຄິດຮອດກ່ອນໝູ່ແມ່ນອາຫານ.

ຈາກນະໂຍບາຍການ ຄວບຄຸມການແຜ່ລະບາດ ຂອງພະຍາດໂຄວິດ 19​ ນັ້ນ ໄດ້ເຮັດໃຫ້ ຜູ້ຜະລິດ ອາຫານ ຈຳນວນໜຶ່ງຂາດທຶນ ເນື່ອງຈາກບໍ່ສາມາດຈຳໜ່າຍໄດ້ ເພາະ ການຈັບຈ່າຍຊື້ຂາຍໜ້ອຍລົງ ເຊິ່ງອາດມີຜົນກະທົບ ໃນໄລຍະ ສອງສາມ ເດືອນຕໍ່ໜ້າທີ່ວ່າ ອາຫານຈະຂາດແຄນ ເນື່ອງຈາກບໍ່ມີຜູ້ຜະລິດ ຫຼື ການຜະລິດ ອາດບໍ່ພຽງພໍ ເຊິ່ງອາດມີຄວາມສ່ຽງຕໍ່ການຂາດແຄນອາຫານຫຼາຍຂຶ້ນ.​  

ໃນປີ 2019 ດັດສະນີ ຄວາມໝັ້ນຄົງທາງດ້ານສະບຽງອາຫານຂອງລາວ ແມ່ນຢູ່ອັນດັບທີ 92 ຂອງ 113 ປະເທດ ທີ່ສຳຫຼວດ ທົ່ວໂລກ, ອີງໃສ່ການສຳຫຼວດນີ້ ພວກເຮົາຍັງມີຄວາມໝັ້ນຄົງທາງດ້ານສະບຽງອາຫານ ໜ້ອຍກວ່າ  ຫວຽດນາມ, ມຽນມາ ແລະ ກຳປູເຈຍ.

ໃນຫຼາຍປີ ທີ່ຜ່ານມາ ກໍຄື ປັດຈຸບັນ ພວກເຮົາຍັງນຳເຂົ້າອາຫານ ຈາກຕ່າງປະເທດບໍ່ແມ່ນໜ້ອຍ ນັບແຕ່ ພືດຜັກ ທັນຍາຫານ, ໝາກໄມ້, ປາ, ຊີ້ນ ແລະ ອື່ນໆ ເຊິ່ງເຮັດໃຫ້ ອາຫານເຫຼົ່ານັ້ນ ມີລາຄາແພງ ແລະບໍ່ໝັ້ນຄົງ ເພາະສະນັ້ນ ການຜະລິດອາຫານ ພາຍໃນປະເທດ, ສ້າງຄາມໝັ້ນຄົງ ທາງດ້ານສະບຽງອາຫານນັ້ນ ມີຄວາມ ຈຳເປັນ ທີ່ສຸດ ໂດຍສະເພາະ ໃນຍາມວິກິດ ຄືແນວນີ້.

ການແຜ່ລະບາດຂອງພະຍາດ ໂຄວິດ 19 ເກີດຂຶ້ນໃນທ່າມກາງທີ່ ລັດຖະບານເຮົາກຳລັງສຸມໃສ່ ການສົ່ງເສີມ ຜະລິດພາຍໃນ ແທນທີ່ການນຳເຂົ້າ ໂດຍສະເພາະ ການຜະລິດ ສະບຽງອາຫານ ເພື່ອຫຼີກລ່ຽງການນຳເຂົ້າ ເຊິ່ງໄດ້ ຮັບການສະໜັບສະໜູນທົ່ວປວງຊົນທີ່ ສຸດ ເພາະມັນຈະເຮັດໃຫ້ ປະເທດພວກເຮົາ ເຂັ້ມແຂງຂຶ້ນ ດ້ວຍການສົ່ງເສີມຜະລິດຕະພັນ ໂດຍສະເພາະອາຫານ ທີ່ຜະລິດພາຍໃນປະເທດເຮົາ ແລະ ຈະເປັນການປະກອບ ສ່ວນເຮັດໃຫ້ ຄ່າຄອງຊີບຖືກລົງ.

ການຜະລິດອາຫານ ດ້ວຍຕົວເອງເທົ່າທີ່ມີຄວາມສາມາດນັ້ນ ຈະສາມາດຫຼຸດຜ່ອນຄວາມສ່ຽງ ການຂາດແຄນອາຫານ ຫຼາຍຂຶ້ນ, ໃນປັດຈຸບັນ ປະຊາກອນຂອງລາວ 35% ແມ່ນຖືວ່າເປັນຄົນໃນເມືອງ (ຂໍ້ມູນທະນາຄານໂລກ 2018), ນັ້ນກໍສະແດງວ່າ ພວກເຮົາຈະມີຄົນຈຳນວນຫຼາຍຂຶ້ນ ທີ່ຟາກທ້ອງໄວ້ກັບ ບັນດາຮ້າງຮ້ານ, ສັບພະສິນຄ້າຕ່າງໆ ແຕ່ ເມື່ອພົບວິກິດ ການສະໜອງອາຫານຈະຫຼຸດລົງ ເຮັດໃຫ້ ການເຂົ້າເຖິງອາຫານຍາກຂຶ້ນ ເຖິງວ່າມີເງິນໃນກະເປົ໋າກໍຕາມ.

ພ້ອມນັ້ນ ການສ້າງຄວາມໝັ້ນຄົງທາງດ້ານສະບຽງອາຫານ ພາຍໃນປະເທດ ຫຼຸດຜ່ອນການນຳເຂົ້າ ຖືວ່າຈຳເປັນ ທີ່ສຸດ ແລະ ເຮົາຄວນຖືເອົາບົດຮຽນຈາກການເກີດວິກິດຄັ້ງນີ້ ເປັນໂອກາດໃນການສ້າງຄວາມເຂັ້ມແຂງພາຍໃນ ໃຫ້ໄວທີ່ສຸດ, ບັນດານັກຊ່ຽວຊານທົ່ວໂລກ ຕ່າງກໍເຫັນພ່ອງກັນວ່າ ນີ້ ບໍ່ແມ່ນໂລກລະບາດເທື່ອສຸດທ້າຍ, ໂລກພວກເຮົາຍັງຈະພົບພໍ້ກັບ ວິກິດແບບນີ້ ໃນອະນາຄົດ, ເພາະສະນັ້ນ ພວກເຮົາຕ້ອງກຽມພ້ອມ ທາງດ້ານອາຫານ ຕ້ານຄວາມອຶດຫິວໃນຍາມວິກິດ.