WHO ເຜີຍບຸກຄະລາກອນການແພດ ກວ່າ 22.000 ຄົນທົ່ວໂລກຕິດເຊື້ອໂຄວິດ-19

     ອົງການອະນາໄມໂລກ (WHO) ເຜີຍ ບຸກຄະລາກອນທາງການແພດກວ່າ 22.000 ຄົນໃນ 52 ປະເທດ ແລະ ເຂດປົກຄອງ ຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19).

     ອົງການອະນາໄມໂລກເປີດເຜີຍໃນລາຍງານສະຖານະການແຕ່ລະວັນວ່າ: ວັນທີ 8 ເມສາ ມີບຸກຄະລາກອນທາງການແພດຕິດເຊື້ອໂຄວິດ-19 ຈຳນວນ 22.073 ຄົນ ແຕ່ຕົວເລກອາດຫລາຍກວ່ານັ້ນ ເນື່ອງຈາກປັດຈຸບັນຍັງບໍ່ມີການລາຍງານທີ່ເປັນລະບົບກ່ຽວກັບການຕິດເຊື້ອໃນກຸ່ມບຸກຄະລາກອນທາງການແພດ.

      ລາຍງານເຜີຍອີກວ່າ: ບຸກຄະລາກອນທາງການແພດຕິດເຊື້ອຈາກທັງໃນສະຖານທີ່ເຮັດວຽກ ແລະ ຈາກທ້ອງຖິ່ນ ໂດຍສ່ວນຫລາຍຕິດເຊື້ອຜ່ານທາງສະມາຊິກໃນຄອບຄົວ.

      ນອກຈາກນີ້ WHO ຍັງໄດ້ເນັ້ນເລື່ອງການໃຊ້ອຸປະກອນປ້ອງກັນທີ່ຖືກຕ້ອງເຊັ່ນ: ຜ້າອັດປາກ, ແວ່ນຕາປ້ອງກັນ, ຖົງມື ແລະ ຊຸດກາວ ເພື່ອເປັນການປົກປ້ອງບຸກຄະລາກອນທາງການແພດແນວໜ້າ ຕະຫລອດຈົນຮຽກຮ້ອງໃຫ້ເຄົາລົບສິດຂອງບຸກຄະລາກອນແພດໃນເລື່ອງສະພາບການເຮັດວຽກທີ່ເໝາະສົມ ທ່າມກາງຄວາມສ່ຽງວ່າບຸກຄະລາກອນທາງການແພດຈະເຂົ້າສູ່ສະພາບໝົດໄຟໃນການເຮັດວຽກ (Burnout).