ສົກປີນີ້ກະຊວງສຶກສາຈະເອົາຈິງຕໍ່ຜູ້ລັກລອບສົ່ງຂໍ້ສອບອອກສູ່ພາຍນອກກ່ອນມື້ສອບເສັງ
ການສອບເສັງຈົບຊັ້ນມໍຕົ້ນ ແລະ ມໍປາຍ ທົ່ວປະເທດໃນສົກຮຽນນີ້, ຄາດວ່າຈະມີຂຶ້ນໃນມໍ່ໆນີ້ ແລະ ກະຊວງສຶກສາທິການ ແລະ ກິລາ ຈະເອົາຈິງເອົາຈັງໃນການວາງລະບຽບ ເພື່ອໃຫ້ການສອບເສັງມີຄຸນນະພາບ ແລະ ປະສິດທິພາບສູງຂຶ້ນ, ໂດຍການຮ່ວມມືກັບກະຊວງປ້ອງກັນຄວາມສະຫງົບ ແລະ ກະຊວງໄປສະນີໂທລະຄົມ ແລະ ການສື່ສານ, ໃນການກວດກາ ແລະ ຕິດຕາມຜູ້ກະທຳຜິດລັກລອບສົ່ງຂໍ້ສອບອອກສູ່ພາຍນອກກ່ອນຈະມີການສອບເສັງມາດຳເນີນຄະດີຕາມລະບຽບກົດໝາຍ.
ທ່ານຫົວໜ້າກົມມັດທະຍົມສຶກສາ ກະຊວງສຶກສາທິການ ແລະ ກິລາ ໃຫ້ຮູ້ວ່າ: ສຳລັບກົດລະບຽບການສອບເສັງຂອງນັກຮຽນປີນີ້, ຄະນະກຳມະການຄຸ້ມຄອງຫ້ອງສອບເສັງ ຈະບໍ່ອະນຸຍາດໃຫ້ນຳໃຊ້ໂທລະສັບມືຖື, ເຄື່ອງສື່ສານ ແລະ ເອກະສານທຸກຊະນິດເຂົ້າໄປໃນຫ້ອງເສັງ, ຖ້າຫາກພົບເຫັນຜູ້ລະເມີດແມ່ນຈະຖືກຕັດສິດສອບເສັງທຸກວິຊາ, ສ່ວນຄະນະກຳມະການຄຸ້ມຄອງຫ້ອງສອບເສັງຖ້າພົບເຫັນປ້ອນຂໍ້ມູນ, ປ່ອຍໃຫ້ນັກຮຽນຈົດກ່າຍນຳເອກະສານ ແມ່ນຈະໄດ້ລົງວິໄນຕາມລະບຽບຫລັກການຂອງກະຊວງສຶກສາທິການ ແລະ ກິລາວາງອອກຢ່າງເຂັ້ມງວດ, ທັງນີ້ ກໍເພື່ອຮັບປະກັນຄຸນນະພາບຂອງການສອບເສັງ ແລະ ຄວາມສະຫງົບໃນສັງຄົມ. ຂະນະດຽວກັນ ກະຊວງສຶກສາທິການ ແລະ ກິລາ ຍັງໄດ້ຮ່ວມມືກັບກະຊວງປ້ອງກັນຄວາມສະຫງົບ ແລະ ກະຊວງໄປສະນີໂທລະຄົມ ແລະ ການສື່ສານ ໃນການຕິດຕາມເອົາຜູ້ກະທຳຜິດໃນການສອບເສັງ, ໂດຍສະເພາະ ຜູ້ລັກລອບສົ່ງຂໍ້ສອບເສັງອອກສູ່ພາຍນອກມາດຳເນີນຄະດີຕາມລະບຽບກົດໝາຍໃຫ້ໄດ້.
ທ່ານຫົວໜ້າກົມ ໃຫ້ຮູ້ອີກວ່າ: ສົກຮຽນ 2016-2017ນີ້, ທົ່ວປະເທດ, ມີນັກສອບເສັງຈົບຊັ້ນ ມ4 ແລະ ມ7 ຈຳນວນ 159.349 ຄົນ, ໃນນີ້ ເສັງຈົບຊັ້ນ ມ4 ມີ 97.095 ຄົນ, ຍິງ 46.488 ຄົນ, ເພີ່ມຂຶ້ນ 7.872 ຄົນເມື່ອທຽບໃສ່ສົກຮຽນຜ່ານມາ, ໂດຍແບ່ງອອກເປັນ 688 ສູນສອບເສັງ, ມີ 4.560 ຫ້ອງສອບເສັງ ແລະ ຈະສອບເສັງໃນ 6 ວິຊາຄື: ພາສາລາວ-ວັນນະຄະດີ, ຄະນິດສາດ, ວິທະຍາສາດ-ທຳມະຊາດ, ວິທະຍາສາດ-ສັງຄົມ, ສຶກສາພົນລະເມືອງ ແລະ ພາສາອັງກິດ, ຊຶ່ງຈະມີຂຶ້ນໃນລະຫວ່າງວັນທີ 13-18 ມີຖຸານີ້. ສຳລັບມໍ ມ7 ມີນັກຮຽນເຂົ້າສອບເສັງທັງໝົດ 62.254 ຄົນ, ຍິງ 29.042 ຄົນ, ເພີ່ມຂຶ້ນ 3.369 ຄົນທຽບກັບສົກປີຜ່ານມາ, ສະເພາະປີນີ້ມີ 281 ສູນສອບເສັງ, ມີ 2.997 ຫ້ອງ, ປະກອບມີ 4 ວິຊາສອບເສັງຄື: ພາສາລາວ-ວັນນະຄະດີ, ຄະນິດສາດ, ຟີຊິກສາດ ແລະ ປະຫວັດສາດ, ຊຶ່ງຈະມີການສອບເສັງໃນລະຫວ່າງວັນທີ 20-21 ມີຖຸນານີ້.
ຂະນະດຽວກັນ ໃນບາງວິຊາທີ່ບໍ່ໄດ້ນຳມາສອບເສັງຈົບຊັ້ນ ແມ່ນໄດ້ມອບໃຫ້ໂຮງຮຽນຈັດຕັ້ງສອບເສັງ ແລະ ເກັບຄະແນນ ເພື່ອຮັບປະກັນໃຫ້ໄດ້ຄຸນນະພາບ, ບໍ່ໃຫ້ມີປາກົດການຫຍໍ້ທໍ້ໃນການສອບເສັງເກີດຂຶ້ນຄືກັບໄລຍະຜ່ານມາ, ກະຊວງສຶກສາທິການ ແລະ ກິລາ ໄດ້ແຕ່ງຕັ້ງພະນັກງານວິຊາການຈຳນວນໜຶ່ງ ໄປປະຈຳຢູ່ສູນອອກຂໍ້ສອບເສັງ, ໂດຍສູນດັ່ງກ່າວບໍ່ອະນຸຍາດໃຫ້ນຳໃຊ້ໂທລະສັບ ແລະ ເຄື່ອງມີືສື່ສານໃດໆທັງສິ້ນ, ເພື່ອຈຳກັດບໍ່ໃຫ້ມີການພົວພັນລະຫວ່າງພາຍໃນ ແລະ ພາຍນອນສູນ, ທັງຮັບປະກັນບໍ່ໃຫ້ຂໍ້ສອບເສັງຮົ່ວໄຫລ, ເຊິ່ງການອອກຂໍ້ສອບເສັງມີທັງຕົ້ນສະບັບ ແລະ ສະບັບສຳຮອງ ເພື່ອຮອງຮັບກໍລະນີເກີດເຫດສຸກເສີນ ເມື່ອອອກຂໍ້ສອບສຳເລັດກ່ອນການສອບເສັງ ແມ່ນໄດ້ມີການຫຸ້ມຫໍ່ເອກກະສານເປັນຢ່າງດີແລ້ວນຳສົ່ງໄປສູນສອບເສັງຕ່າງໆໃນຂອບເຂດທົ່ວປະເທດໃຫ້ປອດໄພ.
