ຢ່າສວຍໃຊ້ໄລຍະວິກິດໄປໃນທາງທີ່ບໍ່ດີ

ສະບາຍດີເພື່ອນຜູ້ອ່ານທີ່ຮັກແພງ, ໃນຜ່ານມາກໍມີຫລາຍບົດຂ່າວ, ບົດຂຽນທີ່ໄດ້ເຕືອນກັນມາແລ້ວ, ເພື່ອບໍ່ໃຫ້ສັງຄົມສວຍໃຊ້ໄລຍະວິກິດໄປໃນທາງທີ່ບໍ່ດີ,ຫາຜົນປະໂຫຍດໃຫ້ຕົນເອງ, ກົດຂີ່ຂົ່ມເຫັງປະຊາຊົນ ຫລື ຮ້າຍແຮງໄປກ່ວານັ້ນແມ່ນການສ້າງຄວາມວຸ້ນວາຍໃນສັງຄົມ, ໂດຍສະເພາະໄລຍະບ້ານເມືອງໄດ້ຮັບຜົນກະທົບຈາກສົງຄາມ, ໄພທຳມະຊາດ, ໂຣກລະບາດ, ດັ່ງປັດຈຸບັນກໍແມ່ນການລະບາດຂອງພະຍາດໂຄວິດ-19 ທີ່ໄດ້ແຜ່ລາມໄປທົ່ວໂລກ, ແຕ່ລະມື້ຂ້າຊີວິດຄົນເຮົາໄປນັບເປັນຮ້ອຍເປັນພັນ ແລະ ທົ່ວທັງໂລກໃຜໆກໍສຸມໃສ່ຕ້ານພະຍາດຮ້າຍດັ່ງກ່າວ, ດ້ວຍທຸກສະຕິປັນຍາ, ວັດຖຸເງິນຄຳຢ່າງມະຫາສານເຂົ້າໃນວຽກງານນີ້ ແລະ ສະເພາະຢູ່ລາວເຮົາ, ພັກ ແລະ ລັດຖະບານກໍໄດ້ມີຄວາມເປັນຫ່ວງເປັນໃຍຕໍ່ປະເທດຊາດ, ບ້ານເມືອງ ແລະ ຊີວິດການເປັນຢູ່ຂອງປະຊາຊົນຢ່າງບໍ່ລົດລະ, ຊຶ່ງເພິ່ນໄດ້ວາງນະໂຍບາຍ ແລະ ອອກຄຳສັ່ງແນະນໍາຕ່າງໆໃຫ້ທຸກພາກສ່ວນສຸມໃສ່ຕ້ານການລະບາດຂອງພະຍາດຮ້າຍແຮງນີ້ ແລະ ຄຽງຄູ່ກັນນັ້ນກໍໄດ້ເຕືອນໃຫ້ຂະແຫນງການຕ່າງໆປະຕິບັດບົດບາດ ແລະ ຫນ້າທີ່ຂອງຕົນຢ່າງມີຄວາມຮັບຜິດຊອບ, ບໍ່ໄດ້ສວຍໂອກາດໄປໃນທາງທີ່ບໍ່ດີ, ເຮັດວຽກດ້ວຍຄວາມຍຸຕິທຳ ແລະ ໂປ່ງໃສ, ດັ່ງກະຊວງການຄ້າກໍໃຫ້ເອົາໃຈໃສ່ຄຸມຄອງລາຄາສິນຄ້າ, ປຸກລະດົມການຜະລິດພາຍໃນໃຫ້ແຂງແຮງ, ເບື້ອງເຈົ້າຫນ້າທີ່ສາທາລະນາສຸກກໍໃຫ້ສຸມໃສ່ສ້າງທຸກເງື່ອນໄຂຕ້ານ ແລະ ປິ່ນປົວຜູ້ຕິດເຊື້ອພະຍາດນີ້ຢ່າງມີຄວາມຮັບຜິດຊອບ, ສ່ວນກຳລັງ ປກຊ, ປກສ ກໍໃຫ້ເອົາໃຈໃສ່ເຮັດ ຫນ້າທີ່ປົກປັກຮັກສາຄວາມສະຫງົບປອດໄພຂອງບ້ານເມືອງ ແລະ ຂະແຫນງການອື່ນໆກໍໃຫ້ສຸມໃສ່ເຮັດຫນ້າທີ່ວຽກງານໃຜລາວດ້ວຍຄວາມເປັນເຈົ້າການ, ສຳລັບເບື້ອງອຳນາດການປົກຄອງທ້ອງຖິ່ນກໍຍິ່ງມີບົດບາດສຳຄັນໃນການເຕົ້າໂຮມຄວາມສາມັກຄີ, ຊ່ວຍເຫລືອປະຊາຊົນໃຫ້ສາມາດຕໍ່ສູ່ກັບວິກິດການນີ້ໃຫ້ຜ່ານພົ້ນໄປ, ຫ້າມການສວຍໃຊ້ຫນ້າທີ່ວຽກງານໄປໃນທາງທີ່ບໍ່ຊອບທຳ, ເອົາໃຈໃສ່ປະຕິບັດນະໂຍບາຍຕໍ່ຊາວຜູ້ອອກແຮງງານ, ປະຊາຊົນຜູ້ຫາເຊົ້າກິນຄໍ່າ, ຮັບໃຊ້ປະຊາຊົນຫລີກເວັ້ນການຮຽກຮ້ອງຄ່າຕອບແທນ ແລະ ຜົນປະໂຫຽດໃດໆເພື່ອຕົນເອງ, ຖ້າໃຜລະເມີດກໍເຖິງຂັ້ນລົງໂທດສຳຫລວດກວດກາ, ດຳເນີນຄະດີຕາມລະບຽບຂອງພັກ ແລະ ກົດຫມາຍຂອງບ້ານເມືອງໄດ້.

ແຕ່ກໍຫນ້າເສຍດາຍຄືເມື່ອມໍ່ໆມານີ້, ກໍມີບາງຂະແຫນງການ ແລະ ອຳນາດການປົກຄອງທ້ອງຖິ່ນມີການປະພຶດໄປໃນຄວາມບໍ່ຊອບທຳ, ມີການອອກແຈ້ງການປຸກລະດົມການຫາລາຍໄດ້ຈາກປະຊາຊົນ ແລະ ສັງຄົມ, ມີການຮຽກຮ້ອງເສຍຄ່າທຳນຽມຕ້ານໆທີ່ເກີດເຫດ, ໄດ້ສົ່ງຜົນກະທົບຮ້າຍແຮງຕໍ່ບົດບາດຂອງພັກ-ລັດຖະບານ, ກໍ່ໃຫ້ເກີດຫາງສຽງບໍ່ດີໃນສັງຄົມ, ໂດຍສະເພາະໄລຍະວິກິດຈາກການລະບາດຮ້າຍແຮງຂອງພະຍາດໂຄວິດນີ້, ແຕ່ກໍໂຊກດີທີ່ສັງຄົມໄດ້ສ່ອງແສງທ່ວງທັນເຖິງຂັ້ນເທິງ ແລະ ກໍມີການປັບປຸງແກ້ໄຂໄດ້ຢ່າງວ່ອງໄວ. ຊຶ່ງສິ່ງນີ້ອາດເປັນບົດຮຽນທີ່ດີ, ໃຫ້ແກ່ອຳນາດການປົກຄອງເຮົາໃນການບໍລິຫານບ້ານເມືອງ, ທັງຫມົດຕ້ອງໄດ້ຖືເອົາສິດ ແລະ ຜົນປະໂຫຍດຂອງຊາດ ແລະ ປະຊາຊົນເປັນກົກເພື່ອຄວາມຢູ່ເຢັນເປັນສຸກຂອງເຂົາເຈົ້າໂດຍສະເພາະໄລຍະວິກິດນີ້ຍິ່ງມີຄວາມສຳຄັນຫລາຍ.