ປະມູນຕ້ອງມີຄວາມໂປ່ງໃສ
ເພື່ອນຜູ້ອ່ານທີ່ຮັກແພງ, ໄດ້ຍິນວ່າໃນປັດຈຸບັນນີ້ການປະມູນໂຄງການ ຫລື ເຮັດກິດຈະການໃດໜຶ່ງ ບໍ່ວ່າດ້ານໃດທີ່ມີລັກສະນະສາກົນແລ້ວ ແມ່ນມັກຈະມີນັກລົງທຶນຕ່າງຊາດເຂົ້າມາກໍ່ກວນ ແລະ ເຮັດໃຫ້ການປະມູນດັ່ງກ່າວຂາດຄວາມໂປ່ງໃສ ແລະ ຜູ້ອັບປະໂຫຍດກໍບໍ່ຮູ້ວ່າຈະໄປຂໍຄວາມເປັນທຳຈາກໃຜ, ເມື່ອເປັນເຊັ່ນນີ້ກໍອາດຈະຍັງເຮັດໃຫ້ການຈັດຕັ້ງປະຕິບັດຄຳສັ່ງຂອງນາຍົກລັດຖະມົນຕີວ່າດ້ວຍການປະຢັດລາຍຈ່າຍງົບປະມານເປັນໄປໄດ້ຍາກ. ມີຫລາຍຄົນເບື້ອງນັກທຸລະກິດໃຫ້ເຫດຜົນວ່າ: ປາກົດການຫຍໍ້ທໍ້ດັ່ງກ່າວເກີດຂຶ້ນແມ່ນມາຈາກພະນັກງານເຈົ້າຂອງໂຄງການເອງ ເຊິ່ງຍັງມີນອກມີໃນອັນເປັນຊ່ອງຫວ່າງໃຫ້ນັກລົງທຶນພາຍນອກສວຍໃຊ້ໄດ້ແລ້ວກໍຈະສົ່ງຜົນກະທົບໃຫ້ເບື້ອງລັດເຮົາເສຍຜົນປະໂຫຍດໄປເປັນຈຳນວນບໍ່ໜ້ອຍ ແລະ ປາກົດການນີ້ເບິ່ງຄືວ່າຍັງບໍ່ມີວີ່ແວວທີ່ຈະປ່ຽນແປງແຕ່ຢ່າງໃດ ນັບແຕ່ຂອດຕະຫລາດທຶນກໍເຊັ່ນກັນ. ເມື່ອຈຸດນີ້ຫາກຂາດຄວາມໂປ່ງໃສແລ້ວກໍຈະເຮັດໃຫ້ການລະດົມທຶນມີປະສິດທິຜົນໜ້ອຍ. ໃນຂະນະທີ່ຄຳສັ່ງປະຢັດຂອງນາຍົກລັດຖະມົນຕີກໍເນັ້ນໃຫ້ທຸກຂະແໜງການນັບທັງສູນກາງ ແລະ ທ້ອງຖິ່ນຈົ່ງເອົາໃຈໃສ່ຈັດຕັ້ງປະຕິບັດນະໂຍບາຍປະຢັດແຫ່ງຊາດໃນການນຳໃຊ້ງົບປະມານ, ທຶນ, ຊັບສິນ ແລະ ເວລາທາງລັດຖະການຢ່າງເຂັ້ມງວດ, ເຄັ່ງຂັດປະຕິບັດແຜນງົບປະມານແຫ່ງລັດ ແລະ ປະຕິບັດລະບຽບການປະມູນ, ຈັດຊື້, ຈັດຈ້າງໃຫ້ມີຄວາມໂປ່ງໃສ ແລະ ສາມາດຕິດຕາມກວດສອບໄດ້ ແລະ ໃຫ້ທົ່ວສັງຄົມມີຄວາມເຂົ້າໃຈ ແລະ ມີສະຕິສູງຕໍ່ການນຳໃຊ້ງົບປະມານແຫ່ງລັດຢ່າງປະຢັດ ແລະ ມີຈຸດສຸມ, ພ້ອມໃຫ້ຖືເອົາວຽກງານດັ່ງກ່າວເຂົ້າໃນຂະບວນການແຂ່ງຂັນຮັກຊາດ ແລະ ພັດທະນາຢ່າງມີປະສິດທິຜົນ.
ໂດຍ: ທ່ຽງທຳ
