ນະຄອນຫລວງເລັ່ງຄວບຄຸມສິນຄ້າ

ໃນວັນທີ 7 ເມ­ສານີ້, ພະແນກອຸດສາຫະກຳ ແລະ ການຄ້ານະຄອນຫຼວງວຽງຈັນ ສົມທົບກັບກົມການຄ້າພາຍໃນກະຊວງອຸດສາຫະກຳ-ການຄ້າ, ພ້ອມດ້ວຍຕຳຫຼວດເສດຖະກິດ ໄດ້ລົງມາຕິດຕາມກວດກາລາຄາສິນຄ້າ ແລະ ສະພາບການຊື້-ຂາຍຢູ່ຕະຫຼາດຫົວຂົວ ເມືອງໄຊເສດຖາ.
ຮອງຫົວໜ້າພະແນກອຸດສາຫະກຳ ແລະ ການຄ້ານະຄອນຫຼວງວຽງຈັນໃຫ້ຮູ້ວ່າ: ຜ່ານການລົງຕິດຕາມສະພາບການຊື້-ຂາຍດັ່ງກ່າວຕາມ ຄຳສັ່ງເລກທີ 0653/ອຄ.ນວ.ຄພນ ລົງວັນທີ 3 ເມສາ 2020 ທີ່ໄດ້ກຳນົດລາຄາສິນຄ້າຫຼາຍປະເພດໄວ້, ຊຶ່ງໜຶ່ງໃນນັ້ນແມ່ນລາຄາຊີ້ນໝູ ປະເພດ 1 ບໍ່ໃຫ້ເກີນ 40.000 ກີບ/ກິໂລ, ປະເພດ 2 ບໍ່ໃຫ້ເກີນ 38.000 ກີບ/ກິໂລ, ຕົ້ນຕໍແມ່ນ ຫຼາດໃຫຍ່ 8 ແຫ່ງຄື: ຕະຫຼາດໄຮຄຳ, ໂນນຄໍ້, ໜອງຈັນ, ໂພນສະຫວ່າງ, ໂພນຕ້ອງຈອມມະນີ, ຫ້ວຍຫົງ, ສີໄຄ,ຕະຫຼາດອົດຊີ ແລະ ຕະຫຼາດຫົວຂົວ, ໂດຍໄດ້ພົບເຫັນ ຕະຫຼາດບາງແຫ່ງຍັງລະເມີດການກຳນົດລາຄາດັ່ງກ່າວ.
ດັ່ງນັ້ນໃນໄລຍະການລະບາດຂອງພະຍາດໂຄວິດນີ້,ທາງຂະແຫນງການກ່ຽວຂອງຈະໄດ້ເພີ່ມທະວີຄວາມເຂັ້ມງວດໃນການກວດກາ ແລະ ຄວບຄຸມລາຄາສິນຄ້າໃຫ້ຢູ່ໃນເກນປົກກະຕິ, ສະກັດກັ້ນການສວຍໂອກາດກັກຕຸນສິນຄ້າ ແລະ ຂຶ້ນລາຄາໂດຍລຳພັງຖ້າ ພົບເຫັນຈະໄດ້ປະຕິບັດຕາມລະບຽບການທີ່ກຳນົດໄວ້,ຖ້າໃຜພົບເຫັນການລະເມີດດັ່ງກ່າວກະລຸນນາໂທແຈ້ງຜ່ານໝາຍເລກ 1510 ເພື່ອຈະໄດ້ແກ້ໄຂໃຫ້ທັນເວລາ.