ລາວຕ້ອງໄດ້ເພີ່ມທະວີສະກັດກັ້ນການລະບາດຂອງພະຍາດໂຄວິດ-19
ມາຮອດປັດຈຸບັນເຖິງວ່າຕົວເລກຜູ້ຕິດເຊື້ອພະຍາດໂຄວິດ-19 ຢູ່ລາວ ເຮົາຍັງບໍ່ທັນສູງ, ຊຶ່ງຄົງຕົວຢູ່ຕົວພຽງ 11 ກໍລະນີເທົ່ານັ້ນ, ໃນຂະນະມີຜູ້ສົງໄສພຽງ ຈໍານວນກວ່າ 430 ກໍລະນີ. ແຕ່ກໍໜ້າເປັນຫ່ວງຖ້າພວກເຮົາບໍ່ເຂັ້ມງວດສະກັດກັ້ນ ແລະ ກັກບໍລິເວນບໍ່ໃຫ້ປະຊາຊົນອອກຈາກບ້ານໄປທາງນອກ, ຕາມຄຳສັ່ງເພີ່ມເຕີມຂອງທ່ານນາຍົກລັດຖະມົນຕີເມື່ອມໍ່ໆມານີ້, ເພື່ອຍົກລະດັບການປ້ອງກັນ ແລະ ສະກັດກັ້ນພະຍາດຮ້າຍນີ້ໃຫ້ມີປະສິດທິຜົນສູງຂຶ້ນໄປຈົນເຖິງວັນທີ 20 ເມສານີ້ ເພື່ອຢັບຢັ້ງການລະບາດຂອງພະຍາດດັ່ງກ່າວ ບໍ່ໃຫ້ແຜ່ລາມອອກເປັນວົງກວ້າງ, ຊຶ່ງໃນຜ່ານມາປະຊາຊົນໄດ້ມີຄວາມຮູ້ສຶກຕື່ນຕົວປະຕິບັດບັນດາຂໍ້ຫ້າມຕ່າງໆ ທີ່ລັດຖະບານໄດ້ວາງອອກ ແລະ ຂະນະດຽວກັນ ກໍມີຫລາຍພາກສ່ວນທຸລະກິດ ທັງພາຍໃນແລະ ຕ່າງປະເທດ ໄດ້ໃຫ້ການສະຫນັບສະຫນູນເຄື່ອງມືອຸປະກອນທາງການແພດເປັນຈຳນວນບໍ່ຫນ້ອຍເຊັ່ນ: ນໍ້າຢາຂ້າເຊື້ອ, ເຈວລ້າງມື, ຜ້າອັດປາກ-ດັງ, ຊຸດປ້ອງກັນສໍາລັບແພດໝໍ (PPE), ເຄື່ອງແທກອຸນຫະພູມ ແລະ ອື່ນໆ ເພື່ອນໍາໄປແຈກຢາຍໃຫ້ທ້ອງຖິ່ນຕ່າງໆ ໄດ້ນໍາໃຊ້ເຂົ້າໃນການປ້ອງກັນພະຍາດລະບາດຄັ້ງນີ້ ໃຫ້ມີປະສິດທິຜົນ; ພ້ອມນີ້, ລັດຖະບານ ກໍໄດ້ເພີ່ມທະວີປະສານສົມທົບກັບບັນດາປະເທດເພື່ອນມິດ ແລະ ສາກົນເພື່ອແລກປ່ຽນບົດຮຽນ ແລະ ປະສົບການຕ່າງໆ ເພື່ອໃຫ້ສາມາດຕອບໂຕ້ຕໍ່ການລະບາດຂອງພະຍາດໃຫ້ສະຫງົບລົງໂດຍໄວ.
ດັ່ງຄະນະສະເພາະກິດຕ້ານພະຍາດດັ່ງກ່າວໃໃຫ້ຮູ້ວ່າ: ປັດຈຸບັນພະຍາດ ສາຍພັນ ໃໝ່ COVID-19 ຍັງສືບຕໍ່ຂ້າຊີວິດ ແລະ ຂົ່ມຂູ່ສຸຂະພາບຂອງມວນມະນຸດໃນໂລກຢ່າງໜັກໜ່ວງ,ຊຶ່ງມີຫລາຍກ່ວາ 200 ປະເທດປະສົບກັບການລະບາດຂອງມັນອັນໄດ້ເຮັດໃຫ້ຕົວເລກຜູ້ຕິດເຊື້ອໃນທົ່ວໂລກເພີ່ມຂຶ້ນເປັນ 1 ລ້ານກວ່າຄົນແລ້ວ.
ໃນນີ້ມີຜູ້ເສຍຊີວິດຫລາຍກວ່າ 50 ພັນຄົນ,ຫລາຍກ່ວາຫມູ່ແມ່ນ: ສະຫະລັດອາເມລິກາ, ອີຕາລີ, ແອສປາຍ, ເຢຍລະມັນ, ສ ປຈີນ, ຝລັ່ງ, ອີຣ່ານ, ສວິດ, ອັງກິດ ແລະ ອື່ນໆ , ໂດຍອັດຕາຄວາມຮ້າຍແຮງແມ່ນຢູ່ໃນລະດັບ 4,90% ຂອງຈໍານວນຄົນເຈັບທີ່ຕິດເຊື້ອທັງ ແລະ ເມື່ອມໍ່ໆມານີ້ ຜູ້ຊ່ຽວຊານຂອງ ອົງການອະນາໄມໂລກ (WHO) ປະຈໍາ ລາວ ກໍໄດ້ອອກມາຮຽກຮ້ອງໃຫ້ປະຊາຊົນລາວ ຈົ່ງໃຫ້ການຮ່ວມມືປະຕິບັດມາດຕະການປ້ອງກັນການລະບາດ ຂອງເຊື້ອພະຍາດສາຍພັນໃໝ່ COVID-19 ທີ່ລັດຖະບານ ກໍຄືຫລັກການຂອງສາກົນໄດ້ກໍານົດອອກຢ່າງເຄັ່ງຄັດ.ການຮຽກຮ້ອງນີ້ມີຂຶ້ນຢູ່ກອງປະຊຸມປຶກສາຫາລື ກ່ຽວກັບບົດຮຽນການລາຍງານຂ່າວສະພາບການລະບາດຂອງພະຍາດໂຄວິດ-19 ໃຫ້ວ່ອງໄວ,ຊັດເຈນ ແລະ ຖືກຕ້ອງ ລວມເຖິງວິທີການປ້ອງກັນພະຍາດດັ່ງກ່າວໃຫ້ແກ່ສັງຄົມ ໄດ້ຮັບຮູ້ ເຂົ້າໃຈ ແລະ ຕື່ນຕົວປະຕິບັດຢ່າງຈິງຈັງຮ່ວມກັນ.ແຕ່ໃນຕົວຈິງແລ້ວໃນຜ່ານມາຍັງພົບເຫັນຜູ້ຄົນຈໍານວນບໍ່ໜ້ອຍໄດ້ອອກຈາກເຮືອນໄປເຄື່ອນໄຫວສ້າງກິດຈະກໍາຕ່າງໆ ໂດຍສະເພາະຢູ່ຕາມຕະຫລາດຫລາຍແຫ່ງໃນຕົວເມືອງຍັງເປີດບໍລິການໃຫ້ຜູ້ຄົນເຂົ້າໄປຊື້ສິນຄ້າຕາມປົກກະຕິ, ວັດບາງແຫ່ງຍັງມີຄົນຈໍານວນບໍ່ໜ້ອຍເຂົ້າໄປໂຮມຕົວກັນ ເພື່ອເຮັດພິທີທາງສາສະໜາ; ຂະນະດຽວກັນ ກໍມີແຮງງານທີ່ກັບມາຈາກປະເທດໃກ້ຄຽງຈໍານວນໜຶ່ງຍັງບໍ່ໄດ້ຮັບການກັກຕົວເອງຕາມຫລັກການເຝົ້າລະວັງ 14ວັນ. ພ້ອມນີ້ມີຫລາຍຄອບຄົວຍັງສືບຕໍ່ ຊຸມແຊວກິນດື່ມມ່ວນຊື່ນ ຊຶ່ງພຶດຕິກໍາດັ່ງກ່າວລ້ວນແລ້ວແຕ່ເປັນຄວາມສ່ຽງພາໃຫ້ພະຍາດນີ້ແຜ່ລາມໄວ ແລະ ອາດເກີດການລະບາດໃຫຍ່ໃນປະເທດເຮົາກໍເປັນໄດ້.
ສະນັ້ນການປະຕິບັດມາດຕະການປ້ອງກັນຕົນເອງທີ່ເຂັ້ມງວດດ້ວຍການໝັ່ນລ້າງມືດ້ວຍສະບູ ຫລືເຈວນໍ້າຢາຂ້າເຊື້ອ, ການໃສ່ໜ້າກາກ, ບໍ່ອອກຈາກເຮືອນ ແລະ ການຢູ່ຫ່າງ 2 ແມັດ ແມ່ນວິທີທີ່ປ້ອງກັນພະຍາດນີ້ໄດ້ດີທີ່ສຸດ.
